އިންޑިޔާގެ އެންމެ ބޮޑު އިދިކޮޅު ޕާޓީ، އިންޑިއަން ނެޝަނަލް ކޮންގްރެސްގެ ޒުވާނުންގެ ގޮފީގެ ޗެއާޕާސަން އަދި ގާނޫނު ހަދަ މަޖިލީހުގެ މެންބަރު، ރާހުލް ގާންދީއާއި، އެ ޕާޓީގެ އިސް ލީޑަރުންތަކެއް، ހަމަނުޖެހުން ހިންގައި، ދައުލަތުގެ މުދަލަށް ގެއްލުން ދީފައިވާކަމަށް ބުނެ، އެ ގައުމުގެ ސަރުކާރުގެން އެ ފަރާތްތަކާއި ދެކޮޅަށް ފުލުހަށް މައްސަލަ ހުށަހަޅައިފިއެވެ. 

ސަރުކާރުގެ ފަރާތުން، މި މައްސަލަ ފުލުހަށް ހުށަހަޅާފައި ވަނީ، އަސަމް ގެ ސްޓޭޓް ޗީފް މިނިސްޓަރު ހިމަންތާ ބިސްވާ ސަރުމާ އެވެ. 

މިކަމާއި ގުޅިގެން ޗީފް މިނިސްޓަރު އެކްސްގައި ކުރި ޕޯސްޓެއްގައި ބުނީ، ރާހުލް ގާންދީގެ އިތުރުން، ދެން މައްސަލަ ހުށަހަޅާފައިވަނީ ކޮންގްރެސް ޕާޓީގެ، ކޭސީ ވެނުގޯޕާލް، ކަންނައްޔާ ކުމާރާއި، އެނޫންވެސް އެޕާޓީގެ އެހެން ބައެއް މެންބަރުންނާ ދެކޮޅަށް ކަމަށެވެ.

އަދި އެ މައްސަލަ ހުށަހަޅާފައިވަނީ, ހަމަނުޖެހުން ހިންގުމަށް އާއްމުންނަށް ހިތްވަރު ދިނުމާއި، ދައުލަތުގެ މުދާ ހަލާކު ކުރުމާއި, އަދި ފުލުހުންނަށް ހަމަލާ ދިނުމުން ކަމަށެވެ. 

ރާހުލް ގާންދީއާއި، ކޮންގްރެސްގެ ލީޑަރުންތަކަކާއި ދެކޮޅަށް މައްސަލަ ހުށަހަޅާފައި މިވަނީ, ކުރިއަށް އޮތް އިންތިޚާބާއި ދިމާކޮށް އެ ޕާޓީން ކުރިއަށް ގެންދާ ބޮޑު ހިނގާލުން، "އިންޑިޔާ ޔުނިޓީ އެންޑް ޖަސްޓިސް މާޗް" އަށް ފުލުހުން ހުރަސް އެޅުމާއި ގުޅިގެން ހިނގި ހަމަނުޖެހުންތަކާއި ގުޅިގެން ކަމަށް އެގައުމުގެ މީޑިޔާ ރިޕޯޓުތައް ބުނެއެވެ. 

ކޮންގްރެސް ޕާޓީން ކުރިއަށް ގެންދާ "އިންޑިޔާ ޔުނިޓީ އެންޑް ޖަސްޓިސް މާޗް" އަކީ މިމަހު 14 ވަނަ ދުވަހުން ފެށިގެން މާރިޗު މަހުގެ 20 ވަނަ ދުވަހާއި ހަމައަށް ކުރިއަށް ގެންދާ ބޮޑު ހިނގާލުމެކެވެ. މިހިނގާލުން މަނިޕޫރު ސިޓީން ފަށާފައިވާއިރު، ނިންމާލަން ހަމަޖެހިފައިވަނީ މުމްބައި ސިޓީންނެވެ.

މި ހިނގާލުމުގެ ތެރެއިން، ސަރުކާރުން، ބޭއިންސާފުން ކުރަމުން އަންނަ ކަންކަމާއި، ތަކެތީގެ އަގު ބޮޑު ވުމާއި، ވަޒީފާގެ ބާޒާރުގައި ހިންގަމުންދާ ކޮރަޕްޝަނާއި، އަދި ފަގީރުންގެ މައްސަލަ ފަދަ ކަންކަމާއި ދެކޮޅަށް އަޑު އުފުލުން ކުރިއަށް ގެންދެއެވެ. 

މީގެ ކުރިންގެ މިފަދަ ހިނގާލުން ކޮންގްރެސް ޕާޓީގެ ފަރާތުން ކުރިއަށް ގެންގޮސްފައިވާއިރު، މިފަހަރުގެ ހިނގާލުމުގެ ތެރެއިން ހަމަނުޖެހުން އުފެދި، މަޝްރަހު ހޫނު ވެގެންދިޔައީ، ހިނގާލުމުގެ ބައިވެރިންނަށް ފުލުހުން ހުރަސް އެޅުމާއި ގުޅިގެންނެވެ. 

އެގޮތުން، އަސަމްގެ ފުލުހުން ވަނީ ބައިވެރިންނަށް ހުރަސް އެޅުމަށް މަގުމައްޗަށް ނުކުމެ، މަގުމަތީގައި ބެރިކޭޑް ޖަހައި މަގު ބަންދު ކޮށްފަ އެވެ. އެއާއެކު ހިނގާލުމުގެ ބައިވެރިންނާއި ފުލުހުންނާއި ދެމެދު ކުރިމަތިލުންތައް ހިނގާފައިވާއިރު, ބައެއް ބައިވެރިންނާއި ފުލުހުންނާއި، ތަކެއްޗަށްވެސް ގެއްލުން ވެފައިވާ ކަމަށް ރިޕޯޓްތައް ބުނެއެވެ. 

އެއާއެކު ރާހުލް ގާންދީއާއި ކޮންގްރެސްގެ ލީޑަރުންނާއި ދެކޮޅަށް މައްސަލަ ހުށަހަޅާފައިވާއިރު، އެކަމާއި ގުޅިގެން މީޑިއާ ތަކަށް މައުލޫމަތު ދެމުން ރާހުލް ގާންދީ ވަނީ، "ބެރިކޭޑްތައް ފޫއަޅުވާލި ނަމަވެސް، ގާނޫނާއި ޚިލާފް" ކަމެއް ނުކުރާ ކަމަށް ބުނެފައެވެ. 

މީގެ އިތުރުން ރާހުލް ގާންދީ ވަނީ އަސަމްގެ ޗީފް މިނިސްޓަރަކީ އެންމެ ކޮރަޕްޓް ޗީފް މިނިސްޓަރު ކަމަށް ބުނެ، އޭނާ އާއި ދެކޮޅަށް 'ހަނގުރާމަ' ކުރާނެ ކަމަށް ބުނެފައެވެ. 

ކޮންގްރެސް ޕާޓީން ވަނީ، އެޕާޓީގެ ލީޑަރުންނާއި ދެކޮޅަށް މައްސަލަ ހުށަހަޅަން ބޭނުން މިންވަރަކަށް ހުށަހަޅަން ވީ ކަމަށާ، އެހެން ނަމަވެސް، ޕާޓީން ފަހަތަށް ނުޖެހޭނެ ކަމަށް ބުނެފައެވެ.