ރައްޔިތުން ހޮވާފައިވާ ވެރިޔަކު ކެބިނެޓަށް އައްޔަންކޮށްފައިވާ ވަޒީރުންނަށް މަޖިލީހުން ރުހުން ނުދިނުމަކީ ރައްޔިތުންނަށް ދެވޭ ވަރަށް ބޮޑު އަނިޔާއެއް ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް މިއަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ ކެބިނެޓްގައި ހިމެނިވަޑައިގަންނަވާ ވަޒީރުންނަށް ރުހުން ދިނުމަށް ދައުރުން ބޭރުން މިއަދު ބޭއްވި ޖަލްސާގައި ބައެއް ވަޒީރުންނަށް ރުހުން ނުދިނުމަށް މަޖިލީހުގެ މެޖޯރިޓީ ޕާޓީ އެމްޑީޕީ އާއި އެޕާޓީއާއި އެއްބައިވެފައިވާ ޑިމޮކްރެޓްސްއިން ވަނީ ވަކާލާތު ކޮށްފައެވެ.

މިކަމާއި ގުޅިގެން ޝިޔާމް ކުރެއްވި ޓްވީޓެއްގައި ވިދާޅުވެފައިވަނީ ރައްޔިތުންގެ މަޖިލީހަކީ ޒިންމާދާރު ކަމާއެކީ ޤައުމީ މަސްލަހަތު އިސްކޮށް މުހިއްމު ކަންކަމުގައި ގޮތްނިންމާ ބާރަކަށް ވާންޖެހޭ ކަމަށެވެ.

Advertisement

އަދި ޑިމޮކްރެސީގެ ރީތި މަގުން ރައްޔިތުން އިންތިޚާބުކުރާ ވެރިޔަކު އެކުލަވާލާ ވަޒީރުންގެ މަޖިލީހަކީ ރައްޔިތުން ޚިޔާރުކުރެއްވި މެނިފެސްޓޯ ތަންފީޒުކުރައްވަން އެވެރިއެއް އިޚްތިޔާރުކުރެއްވި ބަޔެއް ކަމަށާއި އެއްވެސް އަސާސެއްގެ މައްޗަށް ބިނާނުވާ ނިންމެވުމެއް ވާނީ ރައްޔިތުންނަށް ދެވޭ ވަރަށްބޮޑު އަނިޔާއެއް ކަމަށް ވެސް އޭނާ ވިދާޅުވި އެވެ. 

ރައީސް ޑރ.މުއިއްޒުގެ ސަރުކާރަށް ދެމަސް ވެގެން ދިޔައިރުވެސް މި ސަރުކާރުގެ ކެބިނެޓުގައި ހިމެނޭ ވަޒީރުނަށް މަޖިލީހުން ރުހުން ދީފައެއް ނުވެއެވެ.

މިއަދު ކުރިއަށްދާ 19 ވަނަ ރައްޔިތުންގެ މަޖިލީހުގެ ހާއްސަ ޖަލްސާގައި ވަޒީރުނަށް ރުހުން ދިނުން އެޖެންޑާކޮށް މިކަމާއި ގުޅޭގޮތުން ބަހުސްކުރުން ކުރިއަށް ދިޔައިރު މަޖިލީހުގެ ތަޅުން ހަލަބޮލި ވެގެން ދިޔައެވެ. އަދި ތަޅުން ހޫނުވެ، މަޖިލީހުގައި ތިބި ސަރުކާރަށް ތާއީދު ކުރާ މެމްބަރުން ވަނީ މަޖިލިސް ތެރޭގައި އިހުތިޖާޖް ކޮށް، މަޖިލީހަށް ވަދެވެން ހުރި ހުރިހާ ދޮރެއް އެތެރެއިން ތަޅުލައި، މަޖިލިސް ފެށުމަށް ހުރަސްތައް ކުރިމަތި ކުރުވާފައެވެ.

ވަޒީރުންނަށް ރުހުން ނުދޭން ނިންމައި، ދަ ޑިމޮކްރެޓްސް އިން ނެރުނު ބަޔާނެއްގައި ބުނީ މި ނިންމުން ނިންމާފައިވަނީ އެ ޕާޓީގެ ޕީޖީން ބޭއްވި މަޝްވަރާ ބައްދަލުވުމެއްގައި ބައިވެރިވި މެންބަރުންގެ އިއްތިފާގުން ކަމަށެވެ. އިދިކޮޅުން ރުހުން ނުދޭން ނިންމި ވަޒީރުންގެ ތެރޭގައި ހިމެނެނީ އެޓާނީ ޖެނެރަލް އަހްމަދު އުޝާމްއާއި ފޮރިން މިނިސްޓަރ މޫސާ ޒަމީރުއާއި އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރ ޑރ.ހައިދަރުއެވެ.

މި މައްސަލަ އާއި ގުޅިގެން އާންމުން ވެސް މަޖިލީހުގެ ބޭރަށް އެއްވެ އިހުތިޖާޖް ކުރަމުންދާކަން ފާހަގަ ކޮށްލަންޖެހެއެވެ.