މިހާރު ހިނގަމުންދާ 19 ވަނަ ރައްޔިތުންގެ މަޖިލިހުގައި ކާށިދޫ ދާއިރާ ތަމްސީލްކުރައްވަމުން ގެންދަވާ އަބުދުﷲ ޖާބިރާއި އޭނާގެ ދަރިފުޅު އަހުމަދު މުއާޒް އަބްދުﷲ ޖާބިރު ކުރިއަށް އޮތް 20 ވަނަ ރައްޔިތުން މަޖިލިހުގެ އެމްޑީޕީ ޓިކެޓް ކަށަވަރު ކުރައްވައިފިއެވެ.

ކުރިއަށް އޮތް 20 ވަނަ ރައްޔިތުން މަޖިހުގެ އިންތިހާބުގައި ވާދަކުރެއްވުމަށް އެމްޑީޕީގެ ޕްރައިމަރީގެ ޓިކެޓް ހޯއްދެވުމަށް ޖާބިރު ވާދަކުރައްވާފައި ވަނީ މިހާރުވެސް އޭނާ ތަމްސީލްކުރައްވަމުން ގެންދާވާ ކާށިދޫ ދާއިރާއަށެވެ.

ޖާބިރުގެ ދަރިކަލުން އަހުމަދު މުއާޒް އަބްދުﷲ ޖާބިރު ވާދަކުރައްވާ އެމްޑީޕީގެ ޓިކެޓް ހޯއްދެވީ މަހިބަދޫ ދާޢިރާ އިންނެވެ. އެދާއިރާއަށް އެމްޑީޕީގެ ޓިކެޓް ހޯދުމަށް 4 ފަރާތަކުން ވާދަކޮށްފައި ވެއެވެ.

މިއަދު ކާށިދޫ ދާއިރާގެ އެމްޑީޕީގެ ޓިކެޓް ހޯއްދެވި މެމްބަރ އަބްދުﷲ ޖާބިރު އެންމެ ބޮޑަށް ފާހަގަވެގެން ދިޔައީ އެންމެ ހައިރާން ކުރުވަނިވި ގޮތަކަށް 19 ވަނަ ރައްޔިތުންގެ މަޖިލހަށް އިންތިހާބުވެ ވަޑައިގެންނެވި މެމްބަރުގެ ގޮތުގައެވެ.

އެފަހަރު މަޖިލިހަށް ވަޑައިގެންނެވި މެމްބަރުންގެ ތެރެއިން އެންމެ އާދަޔާ ޚިލާފް މެނިފެސްޓޯއެއް ހުށައަޅުއްވާ އެންމެ އާދަޔާ ޚިލާފް ވަޢުދުތަކެއް ވެ ވަޑައިގެންނެވި މެމްބަރަކީވެސް ޖާބިރެވެ.

މިހާރު ހިނަގމުންދާ 19 ވަނަ މަޖިލިހުގައި ކުރެވޭ ބަހުސްތަކުގައި ޖާބިރު ފާހަގަކުރެވެނީ ބުނަން ބޭނުންވާ އެއްޗެއް ވަރަށް ސާފުކޮށް ސަރުކާރަށް ވިޔަސް އަދި އިދިކޮޅަށް ވިޔަސް ބުނުންވަމުން ގެންދަވާ މެމްބަރެއްގެ ގޮތުގައެވެ.