އަހަރެމެންގެ ލޮބުވެތި ރަސޫލާ މުހައްމަދު ޞައްލައްالله ޢަލައިހި ވަސައްލަމް، މުޞީބާތުގެ ވަގުތުގައި ޤުނޫތުއްނާޒިލާ 1 މަސް ވަންދެން ކިޔުއްވުމަށް ފަހު ދޫކޮށްލެއްވި ކަމަށް އިސްލާމީ ކަންތައްތަކާއިބެހޭ ވުޒާރާގެ ވަޒީރު ޑރ. މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އިޒްރޭލުން ފަލަސްތީނުގައި ހިންގަމުންދާ ގަތުލްއާމާއި ޔަހޫދީންގެ އަނިޔާއިން ފަލަސްތީނުގެ ރައްޔިތުން ސަލާމަތްކޮށްދެއްވުން އެދި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފަރުޟު ފަސްނަމާދުގައި ކިޔަން ފެށި ޤުނޫތުއްނާޒިލާ ކިޔުން ހުއްޓާލަން އިސްލާމިކް މިނިސްޓްރީން މިއަދު ވަނީ މިސްކިތް ތަކަށް އަންގާފައެވެ.
އެކަމާއި ގުޅިގެން ޑރ. ޝަހީމް މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ޤުނޫތުއްނާޒިލާއަކީ ދާއިމީކޮށް ފަރުޟު ފަސް ނަމާދުގައި ކިޔަން އޮންނަ ޤުނޫތެއްނޫން ކަމަށެވެ.
"ކީރިތި ރަސޫލާ ޞައްލައްالله ޢަލައިހި ވަސައްލަމަ މުޞީބާތުގެ ވަގުތުގައި ޤުނޫތުއްނާޒިލާ 1 މަސް ދުވަސް ވަންދެން ކިޔުއްވުމަށް ފަހު ދޫކޮށްލެއްވި." ޑރ. ޝަހީމް ވިދާޅުވި އެވެ.
ޝަހީމް އިތުރަށް ވިދާޅުވީ ޤުނޫތު ނާޒިލާ ނޫނަސް އަބަދުވެސް ފަލަސްތީނަށްޓަކައި ދުޢާކުރެވޭނެ ކަމަށާ އެގޮތުން ކޮންމެ ހުކުރު ޚުޠުބާއެއްގައި ވެސް ވާނީ ފަލަޞްޠީނަށްޓަކައި ދުޢާ ހިމެނިފައިވާ ކަމަށެވެ. އަދި އެކަން އެގޮތައް ދެމިގެންދާނެ ކަންވެސް ފާހަގަ ކުރެއްވިއެވެ.
"އަދި އިތުރަށް ޙާލަތު ގޯސްވެގެންދާ ނަމަ ޤުނޫނުއްނާޒިލާ އިޢާދަވާނެ. ސުންނަތް ގޮތަކީ މުޞީބާތުގެ ވަގުތުގައި ކިއުން. އިޢުލާނުގައި ވާ ފަދައިން ޤުނޫތު ނާޒިލާ މެދުކަނޑާލާފަ ވަނީ ވަގުތީ ގޮތުން. ވީމާ މިފަދަ ދީނީ ކަމެއް ސިޔާސީ ކަމަކަށް ނުހެއްދެވުމަށް ނަސޭހަތްތެރިވަން." ޝަހީމް ވިދާޅުވި އެވެ.
މިދިޔަ އަހަރުގެ އޮކްޓޯބަރު ހަތެއްގައި އިޒްރޭލުން ދޭން ފެށި ހަމަލާތަކާ ގުޅިގެން ރާއްޖޭގެ ރައްތަކުގައި ރޭގަނޑުގެ ނަމާދުތަކަށްފަހު ގުނޫތު ކިޔަން އެންމެ ފުރަތަމަ އެންގީ އެ މަހުގެ 11 ގަ އެވެ. އެއަށްފަހު ފަސް ނަމާދަށްފަހު ގުނޫތު ކިޔަން ސަރުކާރުން އެންގީ އޮކްޓޯބަރު 18، 2024.
Advertisement
This content is created and paid for by advertisers and does not involve Voice Journalists
