ސްރީލަންކާގެ 76 ވަނަ މިނިވަން ދުވަހުގެ ތަހުނިޔާ މެސެޖް ރައީސް ޑރ.މުއިއްޒު އެގައުމުގެ ރައީސް ރަނިލް ވިކްރަމަސިންހައަށާއި، ބޮޑުވަޒީރު ދިނޭޝް ގުނަވަރުދަނާއަށް ފޮނުއްވައިފިއެވެ.
މި މެސެޖް ރައީސް ޑރ.މުއިއްޒު މި ދެބޭފުޅުންނަށް ފޮނުއްވީ ވަކިވަކިންނެވެ. މި ދެ މެސެޖުގައި ވެސް އެމަނިކުފާނު ވަނީ ސްރީލަންކާގެ މި ޚާއްޞަ މުނާސަބަތާ ގުޅިގެން އެކަން ފާހަގަ ކުރައްވައި، ދިވެހި ސަރުކާރާއި ރައްޔިތުންގެ ނަމުގައި އަދި އެމަނިކުފާނުގެ އަމިއްލަ ނަންފުޅުގައި، ސްރީލަންކާގެ ސަރުކާރަށާއި ރައްޔިތުންނަށް ހޫނު މަރްހަބާއެއް ވިދާޅުވެފައެވެ.
ރައީސް ޑރ.މުއިއްޒު ފޮނުއްވި މި މެސެޖްގައި ވަނީ ސްރީލަންކާ އާއި ރާއްޖެއާއި ދެމެދު އޮންނަ ޒަމާންވީ ގާތް ގުޅުމަށް އަލި އަޅުއްވާލައްވާފައެވެ. މިގޮތުން އެމަނިކުފާނު ވަނީ މި ގުޅުމަކީ އެއްބަޔަކު އަނެއްބަޔަކަށް އިޙްތިރާމްކުރުމާއި، ދެފަރާތުން އިސްކަންދޭ ކަންކަމުގެ މައްޗަށް ބިނާވެފައިވާ، އަދި ސަރަޙައްދީ ހަމަޖެހުމަށް އިސްކަންދޭ ގުޅުމެއްކަމުގައި ވިދާޅުވެފައިއެވެ.
މީގެ އިތުރުންވެސް ރައީސް ޑރ.މުއިއްޒު ވަނީ ރާއްޖެ އާއި ސްރީލަންކާ އާއި ދެމެދުގައިވާ ރަހްމަތްތެރި ކަމުގެ ގުޅުން ކުރިއަށް އޮތް ދުވަސްތަކުގައި އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމުގައި ވެސް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
