ކުރިއަށް އޮތް 20 ވަަނަ ރައްޔިތުންގެ މަޖިލިސް އިންތިހާބު އަންނަ ރޯދަ މަހުގެ ފަހުން ބާއްވާ ގޮތަށް، އެމްޑީޕީ އާއި ދަ ޑިމޮކްރެޓްސް ގުޅިގެން، އިންތިހާބުތަކާ ބެހޭ ގާނޫނަށް ބަދަލު ގެނައުމަށް ހުށަހެޅި އިސްލާހު ކޮމިޓީ އަށް ފޮނުވަން ފާސްކޮށްފި އެވެ.

ރާއްޖޭގެ އިންތިހާބުތަކާއި ބެހޭ މައި އިދާރާ އިލެކްޝަންސް ކޮމިޝަން (އީސީ) އިން މިހާރު ނިންމާފައި ވަނީ ރޯދަ މަހުގެ ފުރަތަމަ ހަފުތާ ތެރޭގައި، އަންނަ މާޗް މަހުގެ 17 ގައި އިންތިހާބު ބާއްވާށެވެ.

ރައްޔިތުންގެ މަޖިލސް މި ދައުރުގެ ޖަަލްސާތައް ފެށުމާއިއެކު އެމްޑީޕީގެ ފަރާތުން އިހަވަންދޫ ދާއިރާގެ މެންބަރު މުހައްމަދު ޝިފާއު ހުށަހެޅުއްވި މި އިސްލާހުގައި އެދިފައިވަނީ އިންތިހާބުތަކާއި ބެހޭ ގާނޫނުގެ 43 ވަނަ މާއްދާ އަށް އަކުރުތަކެއް އިތުރުކުރުމަށެވެ.

Advertisement

ގާނޫނަށް ގެންނަށް ހުށަހަޅާފައިވާ އިސްލާހުގައިވާ ގޮތުން ރޯދަ މަހުގެ ތެރޭގައި އެއްވެސް އިންތިހާބެއް ބާއްވައިގެން ނުވާނެ އެވެ. އަދި އިންތިހާބު ބާއްވަންޖެހޭ ތާރީހު ރޯދަ މަހުގެ ދުވަހަކާއި ދިމާވާ ނަމަ، އެ އިންތިހާބެއް ބާއްވަން ވާނީ ރޯދަ މަސްް ނިމި 10 ދުވަސް ފަހުން ކަމަށް ވެސް އިސްލާހުގަ ބުނެފައިވެއެވެ. .

ބިލާއިމެދު ވާހަކަ ދެއްކެވި ގިނަ މެމްބަރުން ބިލަށް ތާއިދުކޮށް ވާހަކަ ދެއްކެވި ނަމަވެސް ޕީއެންސީގެ ފަރާތުން ވާހަކަދެއްކެވި މެމްބަރުން ކަނޑައެޅިގެން ބިލަށް ތާއީދުކުރާކަން ހާމަކޮށްފައެއް ނުވެއެވެ.

ބިލް ކޮމެޓީއަށް ފޮނުވަން ފެނޭތޯ ބެލުމަށް ނެގުނު ވޯޓުގައި ޕީޕީއެމް/ޕީއެންސީ ކޯލިޝަންގައި ހިމެނިލައްވާ މެމްބަރުން ވޯޓްދެއްވާފައި ވަނީ ބިލް ކޮމެޓީއަށް ފޮނުވަން ނުފެންނަ ކަމަށެވެ.

މަޖިލިހުގައި ނެގުނު ވޯޓުގައި ކޮމެޓީއަށް ބިލް ފޮނުވުމަށް 39 މެމްބަރުން ވޯޓްދެއްވިއިރު ނުފެންނަ ކަމަށް 11 މެމްބަރަކު ވޯޓްދެއްވާފައި ވެއެވެ.