ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ ފ. އަތޮޅު، އަތޮޅު ބުރުގެ ފައިނަލުގައި ބުދަދުވަހުގެ ރޭ ދަރަނބޫދޫ އާއި ބިލެއްދޫ ވާދަކުރި މެޗު 4-5 ގެ ނަތީޖާއަކުން ކާމިޔާބުކޮށް ބިލެއްދޫ އިން އަތޮޅު ޗެންޕިއަންކަން ހޯދައިފި އެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގެ ކުޅުން ނިމިގެންދިޔައީ ވަރަށް ވާދަވެރި ކުޅުމަކަށްފަހު 3-3 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ބިލެއްދޫ އިން އިތުރު ދެ ލަނޑު ކާމިޔާބުކުރި އިރު ދަރަނބޫދޫ އިން ވެސް ވަނީ މިހާފުގައި އެއް ލަނޑު ކާމިޔާބުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 4-5 ގެ ނަތީޖާއަކުން ބިލެއްދޫ ކުރީގައި އޮވެގެންނެވެ.

މިމެޗުގައި ބިލެއްދޫގެ ރިމާން އަލީ އާއި މުހައްމަދު ޒީދާން ޒުހުރީ މިއިން ކޮންމެ ކުޅުންތެރިއެއް ދެލަނޑު ކާމިޔާބު ކުރި އިރު އެޓީމުގެ އަނެއް ލަނޑު ކާމިޔާބުކޮށްދިނީ ނަދީފް އިބްރާހިމް އެވެ. އަދި މިމެޗުގައި ދަރަނބޫދޫގެ ސާޖިދު އަހުމަދު އިބްރާހިމް، މުއައްލިމް އުމަރު އަދި މުޒްދާން ހަސަން މިއިން ކޮންމެ ކުޅުންތެރިއެއް އެއް ލަނޑު ކާމިޔާބުކުރިއިރު އެޓީމުގެ އަނެއް ލަނޑަކީ ބިލެއްދޫގެ ކީޕަރު ޝުހާން އަބްދުލް ލަތީފް އަތުން ބައިކޮޅަށް ވަން ލަނޑެކެވެ. އަދި ފައިނަލް މެޗުގެ މޭން އޮފް ދަ މެޗަކަށް ހޮވުނީ ބިލެއްދޫގެ މުހައްމަދު ޒީދާން ޒުހުރީ އެވެ.

މީގެ އިތުރުން މުބާރާތުގެ ޓޮޕް ސްކޯރާގެ މަގާމުގެ އިތުރުން މުޅި މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެސް ބިލެއްދޫގެ މުހައްމަދު ޒީދާން ޒުހުރީ އެވެ.

މިއަހަރުގެ ގޯލްޑަން ފުޓްސަލް ޗެލެންޖުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ފ. އަތޮޅުން ފަސް ޓީމު ބައިވެރިވެފައިވާއިރު، މިއަތޮޅުގެ އަތޮޅު ބުރު ކުރިއަށް ގެންގޮސްފައި ވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ. 

އެގޮތުން ލީގުބުގެ އެއްވަނަ ޓީމުގެ ގޮތުގައި ބިލެއްދޫ ފައިނަލުން ޖާގަ ހޯދިއިރު، ދަރަނބޫދޫ ފައިނަލުން ޖާގަ ހޯދީ ލީގު ބުރުގެ ދެވަނަ ޓީމުގެ ގޮތުގައެވެ. މީގެ އިތުރުން ލީގުބުރުގައި މިދެޓީމު ވާދަކުރި މެޗު 3-0 ގެ ނަތީޖާއަކުން ކާމިޔާބުކުރީ ވެސް ބިލެއްދޫ އިންނެވެ.