ހުޅުމާލޭގެ ބަލާލި ކޮންމެ ދިމާލަކުން ފެންނަނީ މިދިޔަ ފަސް އަހަރު ސަރުކާރުން ވެފައިވާ އިހުމާލު ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރ ފަޒުލް ރަޝީދު ވިދާޅުވެއްޖެއެވެ.
ފަޒުލް މިފަދައިން ވިދާޅުވީ ރޭގައި ކުރިއަށްދިޔަ މަޖިލީހުގެ ހުޅުމާލެ ދެކުނު ދާއިރާ އަށް ޕީޕީއެމް/ޕީއެންސީގެ ޓިކެޓުގައި ވާދަކުރައްވާ ޝާނީޒް ހާޝިމްގެ ކެމްޕެއިން ފެށުމުގެ ޖަލްސާގައި ވާހަކަފުޅު ދައްކަވަމުންނެވެ.
މިގޮތުން ފަޒުލް ވިދާޅުވީ ހުޅުމާލޭގެ ބޮޑު ސަރަހައްދަށް ބަލާލިޔަސް މިދިޔަ ފަސް އަހަރު ސަރުކާރުން ވެފައިވާ އިހުމާލު ފެންނަކަމަށެވެ. އަދި އެޗްޑީސީގެ އެތެރޭގައި ހިންގާފައި ހުރި ކަންކަމުގެ ވާހަކަ ނުދެއްކެވިޔަސް ރައްޔިތުންނަށް އެނގިގެންދާނެ ކަމަށް ފަޒުލް ވިދާޅުވިއެވެ.
"އަޅުގަނޑުމެން ހުޅުމާލޭގެ އެއްކޮޅުން ފެށިގެން އަނެއް ކޮޅަށް ބެލި ކަމުގައި ވިޔަސް އަޅުގަނޑަށް ހަމަގައިމުވެސް ފެންނަނީ ހަމަ މިދިޔަ ފަސް އަހަރުގެ އިހުމާލު. މިދިޔަ ފަސް އަހަރުގެ ތެރޭގައި އެޗްޑީސީގެ ތެރޭން ހިންގާފަ ހުރި ކަންތައްތަކުގެ ވާހަކަ އަޅުގަނޑު މި ޕޯޑިއަމް ގައި ނުދެއްކި ކަމުގައި ވިޔަސް ތިޔަ ލޮބުވެތި ރައްޔިތުންނަށް އެނގިވަޑައިގަންނަވާނެ. "
ފަޒުލް ވިދާޅުވިއެވެ.
މީގެ އިތުރުންވެސް ފަޒުލް ވިދާޅުވީ ކޮންމެ ހިދުމަތެއްވެސް ލިބިގަންނަން ތިބީ ރައްޔިތުންކަމަށާއި، ސަރުކާރަށް ތާއީދު ކުރާ ކެނޑިޑޭޓުން ހުޅުމާލެ ދާއިރާ އަށް ހޮވައިފި ނަމަ ރައްޔިތުންނަށް ބޭނުންވާ ކަންކަން ފަސޭހައިން އެނގިގެންދާނެ ކަމަށެވެ.
ފަޒުލް ވިދާޅުވީ މަގާމާއި ހަވާލުވެވަޑައިގެން ފުރަތަަމަ ދުވަހު ވެސް ހުޅުމާލެ ދެވަނަ ފިޔަވައްސަށް ދިޔުމުން އެތަނުގެ ރައްޔިތުން އެދޭ ކަންކަން އެނގުނު ކަމަށާއި، ރައްޔިތުން އެދުނު ކަންކަން މި ފަސް އަހަރު ތެރޭ ރާވާލައިގެން ފުރިހަމަ ކޮށްދޭނެ ކަމަށެވެ.
ހުޅުމާލެ އަށް ދިމާވެފައިވާ ކަންކަން ރަނގަޅު ކުރުމަށްޓަކައި ހުޅުމާލެ ދާއިރާ އަށް ކުރިމަތިލާފައިވާ ކެނޑިޑޭޓުން ފަޒުލް އާއި އެކީ މަސައްކަތްކުރަމުންދާކަން އެބޭފުޅާ ވަނީ އުފަލާއި އެކު ފާހަގަ ކުރައްވާފައެވެ.
Advertisement
This content is created and paid for by advertisers and does not involve Voice Journalists
