މި އަހަރުގެ މާޗު މަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބާ ގުޅިގެން ފުލުހުންގެ ކޮމާންޑަރުންނަށް ތަމްރީނު ދޭ ޕްރޮގްރާމެއް ފަށައިފިއެވެ.
ދެ ދުވަހުގެ މުއްދަތަކަށް ކުރިއަށް ގެންދާ މި ތަމްރީނުތައް ކުރިއަށް ގެންދަނީ ދިވެހި ފުލުހުންގެ ޚިދުމަތާއި އިލެކްޝަންސް ކޮމިޝަން ގުޅިގެންނެވެ.
މިކަމާއި ގުޅިގެން ފުލުހުންގެ ފަރާތުން ބުނީ މި ތަމްރީނުތަކުގެ ތެރެއިން މަޖިލިސް އިންތިހާބާއި ގުޅޭ ގާނޫނާއި، އިންތިހާބުތަކާއި ބެހޭ އާންމު ގާނޫނުގެ އިތުރުން އިލެކްޝަންސްގެ ގާނޫނަށް އަހުލުވެރިކުރުވުމަށް މައުލޫމާތު ހިއްސާކުރައްވާނެ ކަމަށެވެ. މި ތަމްރީނު ޕްރޮގްރާމްގެ ތެރެއިން، ކުރީގެ އިންތިޚާބުތަކުގެ މަޢުލޫމާތާއި ވޯޓުލުމާއި ވޯޓު ގުނުމުގެ ހުރިހާ މަރުހަލާއެއްގައި އަމާންކަމާއެކު ހަރަކާތްތެރިވެފައިވާ ގޮތުގެ ތަޖުރިބާތަކާއި މަޢުލޫމާތު ހިއްސާކުރުމަށް ވެސް ވަނީ ހަމަޖެހިފައެވެ.
މީގެ އިތުރުންވެސް، ކުރީ އިންތިޚާބުތަކުގައި ދިމާވެފައިވާ މައްސަލަތަކާއި ވޯޓުލުމުގެ ޙައްޤު އޮންނަ ކޮންމެ ރައްޔިތަކަށް އެ ޙައްޤުގެ ބޭނުން އެންމެ ފުރިހަމައަށް ކަށަވަރުކޮށްދިނުމާ ގުޅޭގޮތުންވެސް މައުލޫމާތު ހިއްސާ ކުރެވިގެންދާނެ ކަމަށް ފުލުހުން ބުނެއެވެ.
މި ޕްރޮގްރާމްގައި މަޢުލޫމާތު ދެއްވަނީ މި ޚިދުމަތުގެ މުދައްރިބުންނާއި އިލެކްޝަންސް ކޮމިޝަނުގެ ކަމާގުޅޭ މުދައްރިބުންކަމަށައި، އެގޮތުން މާދަމާ އޮންނަ ތަމްރީނުތަކުގައި ކޮމިޝަނަރ އޮފް ޕޮލިސް ޢަލީ ޝުޖާޢު މަޢުލޫމާތު ދެއްވުމަށް ހަމަޖެހިފައިވާ ކަމަށް ވެސް ފުލުހުން ބުނެއެވެ.
މި ތަމްރީން ޕްރޮގްރާމްތަކާއި ގުޅިގެން އިލެކްޝަން ކޮމިޝަން (އީސީ) ގެ ނައިބު ރައީސް އިސްމާއިލް ހަބީބް ވެސް ވަނީ އިންތިޚާބުތަކާ ގުޅިގެން، ދިވެހި ފުލުހުންގެ ފަރާތުން އެ ކޮމިޝަނަށް ލިބެމުންދާ އެހީތެރިކަން ޝުކުރުވެރިކަމާއެކު ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
