މިދިޔަ މަހުގެ 28 ވަނަ ދުވަހު އޮތް ރައީސް ޑރ.މުހައްމަދު މުއިއްޒުގެ ކެބިނެޓަށް ރުހުން ދިނުމާއި ގުޅޭ ޖަލްސާ އާއި ގުޅިގެން މަޖިލީހުގެ ބޭރުގައި ކުރަމުންދިޔަ މުޒާހަރާގެ ތެރެއިން މަޖިލީހުގެ ގޯތި ތެރެއަށް އުކީ ކުކުޅު ބިސް ކަމަށާއި، އެހެން އެއްޗެއް އުކާފައި ނުވާކަމަށް ސިފައިންނާއި ފުލުހުން މިއަދު ބުނެފި އެވެ.

މިކަން ހާމަކޮށްފައި މިވަނީ، އެ ދުވަހު މުޒާހަރާކުރި މީހުންގެ ތެރެއިން ބަޔަކު މަޖިލީހުގެ ގޭގެ ބޭރު ފާރުމަތިން އަރައި ގޯތި ތެރެއަށް އެއްޗިހި އުކި ކަމަށް ބުނާ މައްސަލަ ބެލުމަށް، މިއަދު ކުރިއަށްދިޔަ ރައްޔިތުންގެ މަޖިލީހުގެ ސަލަމަތާއި ބެހޭ ކޮމިޓީ (241 ކޮމިޓީ) ގެ ބައްދަލުވުމުގައި އެވެ. މި ބައްދަލުވުމަށް ޑިފެންސް މިނިސްޓަރު މުހައްމަދު ޣައްސާން މައުމޫނާއި ޕޮލިސް ކަމިޝަނަރު އަދި ސިފައިންނާއިި ފުލުހުންގެ އިސް ބޭފުޅުން ވަނީ ހާޒިރުކޮށްފައެވެ.

މި ބައްދަލުވުމުގައި ވާހަކަފުޅު ދައްކަވަމުން، ޑިފެންސް މިނިސްޓަރު ޣައްސާން ވިދާޅުވީ އެދުވަހު މަޖިލީހުގެ ގޯތި ތެރެއަށް އުކާފައި ހުރީ ކުކުޅު ބިސްކަން ސްޕެޝަލް ޕްރޮޓެކްޝަން ގްރޫޕުން ބެލި ބެލުމުން އެނގުނު ކަމަށެވެ.

މިނިސްޓަރ ޣައްސާން ވިދާޅުވީ، އެކަމާއި ގުޅިގެން އެ ސަރަހައްދަށް ސިފައިން އިތުރުކޮށް ސަލާމަތީ ކަންތައްތައް ވަރުގަދަކޮށް، އެ މައުލޫމާތު މަޖިލީހުގެ އަމީން އާއްމަށް ދެއްވި ކަމަށާއި، މަޖިލީހުގެ ގެއާއި ގޯތި ތެރެއަށް ހުއްދަ ނެތި އެއްވެސް ބަަޔަކު އެ ދުވަހު ވަދެފައި ނުވާ ކަމަށެވެ. އަދި މެމްބަރުންގެ ސަލާމަތާ ރައްކާތެރިކަމަށް ނުރައްކަލެއް މެދުވެރިވާ ފަދަ  ހާލަތެއް އެދުވަހު މެދުވެރިނުވާ ކަމަށް ވެސް އެބޭފުޅާ ވިދާޅުވިއެވެ.

މީގެ އިތުރުންވެސް، މި ބައްދަލުވުމުގައި ކޮމިޝަނާ އޮފް ޕޮލިސް އަލީ ޝުޖާއު ވަނީ އެ މުޒާހަރާގައި ގޭންގް މީހުން ވެސް ބައިވެރިވިކަމަށް ވިދާޅުވެފައެވެ. އަދި ކުކުޅު ބިހުގެ އިތުރުން އެހެން އެއްޗެއް އުކާފައިނުވާ ކަމަށާއި، ބިސް އުކީ ކޮންބައެއްކަން ދެނެގަނެވިފައިވާ ކަމަށާއި އެ މައްސަލަ މިހާރު ތަހުގީގުކުރަމުން އަންނަ ކަމަށް ވެސް ކޮމިޝަނާ އޮފް ޕޮލިސް ވަނީ ވިދާޅުވެފައެވެ.