ޕާޓީ ބަދަލު ކުރުމުން ގޮނޑީ ގެއްލޭ ގޮތަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަހުމަދު އަބްދުالله ހުށަހެޅުއްވި ބިލު، މަޖލީހަށް ބަލައިގަނެ، އެ ބިލު ދިރާސާ ކުރަން 7 މެންބަރުން ހިމެނޭ ކޮމިޓީއެއް އެކުލަވާލައިފިއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި އެންޓި-ޑީފެކްޝަން ބިލު މަޖިލީހަށް ބަލައިގަނެފައިވަނީ ވޯޓުގައި ބައިވެރިވި 41 މެންބަރުންގެ ވޯޓުންނެވެ.

އަދި އެ ބިލު ދިރާސާ ކުރުމަށް ވަގުތީ ކޮމިޓީއެއް ވެސް އެކުލަވައިލަން 29 މެންބަރުންގެ ވޯޓާއެކު ވަނީ ފާސްކޮށްފައެވެ. 

އެގޮތުން ވަގުތީ ކޮމިޓީއަށް މެންބަރުން ހުށަހެޅުމަށް ހުޅުވާލި ފުރުސަތުގައި ވެލިދޫ ދާއިރާގެ މެންބަރު މުހައްމަދު އަބްދުالله ޝަފީގު ވަނީ 7 މެންބަރުންގެ ކޮމިޓީއަށް ނަން ހުށަހަޅުއްވާފައެވެ.

އެގޮތުން ހުށަހެޅުއްވި މެންބަރުންނަކީ؛

1) ބާރަށު ދާއިރާގެ އެމްޑީޕީ މެންބަރު އަހުމަދު އަބްދުالله 

2) މަނަދޫ ދާއިރާގެ އެމްޑީޕީ މެންބަރު އަހުމަދު ހާރޫން

3) ފުނަދޫ ދާއިރާގެ އެމްޑީޕީ މެންބަރު މުހައްމަދު ޝާހިދު 

4) ކެލާ ދާއިރާގެ އެމްޑީޕީ މެންބަރު އިބްރާހިމް ޝަރީފް

5) ހޮޅުދޫ ދާއިރާގެ އެމްޑީޕީ މެންބަރު ޔޫނުސް އަލީ

6) ވިލުފުށި ދާއިރާގެ ޑިމޮކްރެޓްސްގެ މެންބަރު ހަސަން އަފީފު

7) ހުޅުދޫ ދާއިރާގެ ޑިމޮކްރެޓްސްގެ މެންބަރު އިލްޔާސް ލަބީބު 

ޝަފީގު ހުށަހެޅުއްވި ކޮމިޓީއަށް އިހަވަންދޫ ދާއިރާގެ މެންބަރު މުހައްމަދު ޝިފާއު ވަނީ ތާޢީދު ކުރައްވާފައެވެ.

އެހެން ނަމަވެސް އެ ކޮމިޓީގައި ހުރިހާ ސިޔާސީ ޕާޓީއެއްގެ މެންބަރުން ހިމެނިވަޑައި ނުގަންނަވާތީ ޑިމޮކްރެޓްސްގެ މެންބަރުންވަނީ ކޮމިޓިގައި ތިއްބެވުމަށް އުޒުރުވެރިވެ ވަޑައިގެންފައެވެ. އަދި ކޮމިޓީގައި ހުރިހާ ޕާޓީގެ މެންބަރުން ހިމެނުއްވުމަށް ހުށަހަޅުއްވާފައެވެ.

ނަމަވެސް ވެރިކަންކުރާ ޕީއެންސީން ވަނީ އެފަދަ ބޮޑު މައްސަލައެއް ނިންމަން ވާނީ ދާއިމީ ކޮމިޓީން ކަމަށް ބުނެ ކޮމިޓީގައި ބައިވެރިވުމަށް އުޒުރުވެރިވެފައެެވެ.

އެހެންކަމުން ޝަފީގު ވަނީ އެހެން ޕާޓީ ތަކުގެ މެންބަރުން ނުހިމެނޭހެން ހަމައެކަނި އެމްޑީޕީ މެންބަރުން ހިމެނޭގޮތަށް ކޮމިޓީ އެކުލަވައިލުމަށް ވިލުފުށި ދާއިރާގެ ޑިމޮކްރެޓްސްގެ މެންބަރު ހަސަން އަފީފާއި، ހުޅުދޫ ދާއިރާގެ ޑިމޮކްރެޓްސްގެ މެންބަރު އިލްޔާސް ލަބީބުގެ ބަދަލުގައި، ދާންދޫ ދާއިރާގެ މެންބަރު ޔައުގޫބް އަބްދުالله އާއި ހެންވޭރު އުތުރު ދާއިރާގެ މެންބަރު އިބްރާޙިމް މުޢިއްޒު ހިމެނުމަށް ހުށަހަޅުއްވާފައެވެ. 

އެކޮމިޓީއަށް ވެސް ޝިފާއު ވަނީ ތާއީދު ކުރައްވާފައެވެ. އަދި އެ ނަންތައް 21 މެންބަރުންގެ ވޯޓުން ވަނީ ފާސްކޮށްފައެވެ.

ރައްޔިތުންގެ މަޖީލީހަށް އެ މެމްބަރަކު އިންތިހާބުވާ ޕާޓީ ނޫން އެހެން ޕާޓީއަކަށް ބަދަލުވުމުން ގޮނޑި ގެއްލޭ ބިލު ރައްޔިތުންގެ މަޖިލީހަށް ހުށަހެޅުއްވީ ބާރަށު ދާއިރާގެ މެމްބަރު އަހުމަދު އަބްދުالله އެވެ. ބިލު ހުށަހަޅުއްވާފައި ވަނީ ސިޔާސީ ޕާޓީއެއްގެ ޓިކެޓުގައި ވާދަކޮށްގެން ރައްޔިތުންގެ މަޖިލީހަށާއި އިދާރީ ދާއިރާތައް ލާމަރުކަޒީ އުސޫލުން ހިންގުމަށް ގާއިމުކޮށްފައިވާ އަތޮޅު ކައުންސިލްތަކަށާއި، ރަށު ކައުންސިލްތައް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީތައް އިންތިހާބުވުމަށް ފަހު ދެން ޕާޓީ ބަދަލުކުރާ ހާލަތެއްގައި އަމަލު ކުރަން ޖެހޭ އުސޫލު ބަޔާން ކުރުމަށް ކަމަށް މެންބަރު އަހުމަދު ވަނީ ވިދާޅުވެފައެވެ.  

އެހެންކަމުން ދައުރުގެ މެދުތެރޭގައި މެމްބަރަކު ގޮނޑި ބަދަލުކޮށްފި ނަމަ، އެބޭފުޅެއްގެ ގޮނޑިއާއި މެދު އަމަލު ކުރާނެ ގޮތާއި ގޮނޑި ގެއްލުމުން ދެން ބައި އިލެކްޝަން ބޭއްވުމުގައި އަމަލު ކުރާނެ ގޮތް ބަޔާންކޮށް ގާނޫނެއް ގެނައުމަށް އަހުމަދު ވަނީ ހުށަހަޅުއްވާފައެވެ.

އެ ބިލުގައި ބުނާގޮތުން ޕާޓީ ބަދަލުކޮށްފިކަން އިލެކްޝަންސް ކޮމިޝަނުން ރައްޔިތުންގެ މަޖިލީހަށް އަންގާ ދުވަހުން ފެށިގެން އެ މެމްބަރަކު އިސްތިއުފާ ދޭންވާނެ އެވެ. އަދި އަތޮޅު ކައުންސިލްތަކާއި، ސިޓީ ކައުންސިލް، އަދި ކައުންސިލް މެމްބަރުންނާއި ޑަބްލިއުޑީސީގެ ގޮނޑި ހުސްވާނީ ވެސް އިލެކްޝަންސް ކޮމިޝަނުގައި އެކަން ދަފްތަރުވާ ހިސާބުންނެވެ.