ސަރުކާރު ކޯލިޝަން، ޕީޕީއެމް/ޕީއެންސީގެ ޓިކެޓްގައި ކުރިއަށް އޮތް ރައްޔިތުންގެ މަޖިލީހަށް ވާދަކުރައްވާ ބޭފުޅުން ހޮވައިދިނުމަކީ އަމިއްލަވަންތަ ގައުމެއް ބިނާ ކުރުމަށް އެއްބާރުލުން ދިނުން ކަމަށް ޕީޕީއެމް/ޕީއެންސީ ކޯލިޝަން ލީޑަރު އަދި ޕީއެންސީގެ ރައީސް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ، ޕީޕީއެމް/ޕީއެންސީ ޓިކެޓްގައި އައްޑޫ ހުޅުދޫ ދާއިރާގެ މަޖިލިސް ގޮނޑިއަށް ވާދަކުރައްވާ ކެންޑިޑޭޓު މުޙައްމަދު ޝާހިދުގެ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. މިގޮތުން ރައީސް މުއިއްޒު ވިދާޅުވީ، ކުރިމަތިވެފައިވަނީ ވަރަށް މުހިންމު ގައުމީ ވާޖިބެއް ކަމަށާއި، އެބޭފުޅުން ކުރައްވަމުން ގެންދަވަނީ ވަރަށް މުހިންމު މަސައްކަތެއް ކަމަށެވެ.

ރައީސް ޑރމުއިއްޒު ވިދާޅުވީ، މަޖިލީސް އިންތިހާބާއި މެދު ފަރުވާ ކުޑަކޮށްލައިފި ނަމަ ގައުމުގެ މުސްތަގުބަލު ބިނާ ކުރުމަށްޓަކައި ކުރަމުންދާ މަސައްކަތުގައު ވަރަށް ބޮޑު ގެއްލުމެެއް ކުރިމަތިވެދާނެ ކަމަށެވެ. ގައުމު ފާލުން ނެއްޓިގެން ދަނިކޮށް، ހަމަމަގަށް ގެނެސް ދިވެހީންގެ ރާއްޖެއަށް މިސްރާބު ޖަހައި، ދިވެހީންގެ ރާއްޖެ ހޯދީ ރައްޔިތުންގެ ބުރަ މަސައްކަތުން ކަމަށެވެ.

އެހެންކަމުން،މި މަސައްކަތް ފުރިހަމަ ކުރުމަށްޓަކައި ރައްޔިތުންގެ މަޖިލީހަށް ދިވެހީންގެ ރާއްޖޭގެ ވިސްނުން ގެންދަން ޖެހޭކަން ފާހަގަކުރައްވަމުން ރައީސް މުއިއްޒު ވިދާޅުވީ، މި ވިސްނުން ނުގެންދެވިއްޖެ ނަމަ، މިހާރު ކުރަމުންގެންދާ މަސައްކަތްތަކުގެ ފޮނި މީރުކަން ނުލިބޭނެ ކަމަށް އެމަނިކުފާނު ވިދާޅުވިއެވެ.

މަޖިލިސް އިންތިހާބާއި ދޭތެރޭ ބަކީ އޮތީ ތިން ވަރަކަށް ހަފްތާ ކަން ފާހަގަކުރައްވާ ރައީސް މުއިއްޒު ވަނީ ސަރުކާރުގެ ފަރާތުން މި އިންތިހާބުގައި ކުރިމަތިލާ ކެނޑިޑޭޓުން މަޖިލީހަށް ހޮވައިދިނުމަށް ހުރިހާ ރަށެއްގެ އަދި ހުރިހާ ދާއިރާއެއްގެ ރައްޔިތުންގެ ކިބައިން އެދިވަޑައިގެންފައެވެ.