ނިމިދިޔަ ސަރުކާރުގައި ވެރިކަންކުރި މައި ޕާޓީ، އަދި މިހާރުގެ އިދިކޮޅު މައި ޕާޓީ އެމްޑީޕީއަށް މުޅި ދައުލަތް ލިބިފައި އޮތް އިރުވެސް ބޯހިޔާވަހިކަމުގެ މައްސަލަ ހައްލުކުރަން މަސައްކަތް ކުރެއްވީ ދައުރު ނިމެން ވުމުން ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
ޕީއެންސީގެ ފަރާތުން މަޖިލީހުގެ މައްޗަންގޯޅި އުތުރު ދާއިރާއަށް ވާދަކުރާ ކެންޑިޑޭޓު އިބްރާހިމް މުހައްމަދުގެ ކެމްޕެެއިން ޖަލްސާގައި ވާޙަކަދައްކަވަމުން ރައީސް ޑރ. މުހައްމަދު މުޢިއްޒު ވިދާޅުވީ، މާލޭ މޭޔަރ ކަމުގެ މަގާމުގައި އެމަނިކުފާނު ހުންނެވިއިރު، މާލޭ ރައްޔިތުންނަށް ކުރިމަތިވެފައުވާ ބޯހިޔާވަހިކަމުގެ މައްސަލަ ހައްލު ކުރެއްވުމަށް މާލެ ސިޓީ ކައުންސިލަށް އެއްބާރުލުން ދެއްވުމަށް އެމްޑީޕީ ސަރުކާރުގައި ދެންނެވި ކަމަށެވެ. އެހެން ނަމަވެސް އެކަމަށް އެ ސަރުކާރުން އެއްވެސް އެއްބާރުލެއްވުމެއް ނުދެއްވި ކަމަށް އެމަނިކުފާނު ވިދާޅުވިއެވެ.
މަޖިލީހުގެ މެޖޯރިޓީ އޮވެ ފަސް އަހަރު ދުއްވާލައި، ސަރުކާރު އޮވެ، އަދި ދެންހުރި ހުރިހާ ބާރެއްވެސް، އެބޭފުޅުހުން މަޖިލީހުގެ ބޭނުން ކޮށްގެން، މިނިވަން މުވައްސަސާ ތައްވެސް ކޮންޓްރޯލް ކޮށްފައި އޮތީ. ހުރިހާ ބާރެއް އޮތީ. މުޅި ދައުލަތް އޮތީ ހަގީގަތުގައި. ޖުޑިޝަރީއަށްވެސް ނުފޫޒު ފޯރުވަމުންދިޔަ ގޮތް އެންމެނަށްވެސް ފެންނާނެ. ހުކުމް ކުރަމުން ދިޔައީ ބޭނުން ގޮތަކަށް. ރައީސް އޮފީހުގެ ބާރު ބޭނުން ކޮށްގެން ޖުޑިޝަރީއަށް ނުފޫޒް ފޯރުވައިގެން. މުޅި ދައުލަތް ކޮންޓްރޯލް ކޮށްގެން. އެހެން ނަމަވެސް ގެދޮރުގެ މައްސަލަ ހައްލު ނުކޮށް ދައުރެއް ނިމިގެން ދިޔައީ. އެކަމު މިހާރު އަނެއްކާވެސް ތިމަންނަމެންނަށް މެޖޯރިޓީ ދީގެންނޭ މާލެ ރައްޔޮތުންނަށް ގޯތި ލިބޭނީ ބުނީމާ ގަބޫލު ކުރާނެ ބޭފުލުން އަޅުގަނޑު ހިތުން ނުހުންނާނެ
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މިއާއެކު ރައީސް ވިދާޅުވީ އެމަނިކުފާނަށް އެންމެ މުހިންމީ ގެދޮރުވެރިކަމުގެ މައްސަލަ ޙައްލުކުރުން ކަމަށްވާތީ ވެރިކަމުގެ މި ފަސް އަހަރަށް ވަޢުދު ވެވަޑައިގަތީ ގޯތިގެދޮރުގެ މައްސަލަ ހައްލު ކުރުމަށް ކަމަށާ އަދި އެމައްސަލަ ހައްލުކުރަން ކުރީ ސަރުކާރުތަކާއި ޚިލާފަށް ވެރިކަމުގެ ފުރަތަމަ ދުވަހުން ފެށިގެން މަސައްކަތް ފަށްޓަވާފައިވާކަމަށެވެ.
"މިދިޔަ ސަރުކާރުން އެކަން ކުރިގޮތަށް ނުކޮށް، އަދި ކުރީގައިވެސް އެކަން ކުރިގޮތަށް ނުކޮށް ދައުރު ނިމެން ދެތިން ދުވަހަށް ވީމައެއް ނޫން އަޅުގަނޑު މިކަން ހައްލުކުރަން ބޭނުންވީކީއެއް. ދައުރު ނިމޭއިރު އެންމެންނަށް ހައްލުވެފައި އޮންނަން އަޅުގަނޑު ބޭނުންވާތީ ފުރަތަމަ މަހު ފެއްޓީ. ފުރަތަމަ މަހު އެއޮތީ އިތުރު ބިމެއް ހިއްކަން ފަށާފައި. "
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ރައީސް ވިދާޅުވީ ފުށިދިއްގަރުފަޅު ހިއްކަން ފަށާފައިފައިވަނީ މާލެ ސަރަހައްދުގެ ބޯހިޔާވަހިކަމުގެ މައްސަލަ ހައްލު ކުރުމަށް ކަމަށެވެ. އެގޮތުން ހުޅުމާލެއިން މިހާރު ހިއްކާ ބިމާއި، ގިރާވަރުފަޅުން ހިއްކާ ބިމާއި، ގުޅިފަޅުން ހިއްކާ ބިމުން ވަރަށް އަވަހަށް ގޯތި ދޫކުރަން ފަށްޓަވާނެކަމަށްވެސް ރައީސް ވިދާޅުވިއެވެ. އަދި މިމަސައްކަތް ކުރުމަށް މިހާރު ގިރާވަރުފަޅާއި ގުޅިފަޅުގެ ލޭންޑް ޔޫޒް ޕްލޭން ހަދައި ނިންމާފައިވާކަން އެމަނިކުފާނު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
