ރާއްޖޭގެ މަދަނީ ވައިގެ ދަތުރުފަތުރުގެ ރައްކާތެރިކަން ކަށަވަރު ކުރުމުގެ ގޮތުން އުސޫލުތަކާއި ޚިލާފަށް ކަމެއް ކުރާކަން ފާހަގަވެއްޖެނަމަ ވަގުތުން ރިޕޯޓްކުރުމަށް ޚާއްސަ އޮންލައިން ޕްލެޓްފޯމެއް ސަރުކާރުން ތައާރަފްކޮށްފި އެވެ.

ޑިފެންސް މިނިސްޓްރީން އިއްޔެ އާންމުކުރި ސާކިއުލާއެއްގައި ބުނެފައިވަނީ ރާއްޖޭގެ މަދަނީ ވައިގެ ދަތުރުފަތުރުގެ ރައްކާތެރިކަމަށް ނުރަނގަޅު އަސަރެއްކޮށްފާނެ ކަަމަށް ބެލެވޭ ކަމެއް ނުވަތަ ހެދިފައިވާ ގަވާއިދުތަކާއި އުސޫލުތަކާ ހިލާފު ކަމެއް އެއާޕޯޓްތަކުގައި ނުވަތަ ފްލައިޓްތަކުގައި ހިނގާނަމަ އެކަން ރިޕޯޓްކުރެވޭނެ ނިޒާމެއް މިހާރު ގާއިމްކޮށްފައިވާ ކަމަށެވެ.

ޑިފެންސް މިނިސްޓްރީގެ ދަށުން ހިންގާ ޑިރެކްޓްރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަން އިން ތަޢާރަފްކުރި އޮންލައިން ޕްލެޓްފޯމްގެ ނަމަކީ "އޭވިއޭޝަން ސެކިއުރިޓީ ކޮންފިޑެންޝިއަލް ރިޕޯޓިން ސިސްޓަމް" އެވެ.

އުސޫލާ ޚިލާފަށް ހިނގާ ކަމެއް، އެއްވެސް މީހަކަށް ފާހަގަވެއްޖެ ނަމަ، މި ޕްލެޓްފޯމުގެ އެހީގައި އެ މައްސަލައެއް ޑާސާގެ ސަމާލުކަމަށް ގެނެވޭނެ ކަމަށް ސާކިއުލާގައި ބުނެފައިވެއެވެ. މި ޕްލެޓްފޯމް ފަރުމާކޮށްފައި ވަނީ ރިޕޯޓް ކުރާ ފަރާތް ބޭނުންވެއްޖެ ހާލަތެއްގައި އެ މީހެއްގެ ވަނަވަރު ހާމަނުކޮށް ވެސް މައްސަލަ ރިޕޯޓްކުރެވޭނެ ގޮތަށެވެ.

މި ޕްލެޓްފޯމް ލައިވްކޮށް، އާންމުންނަށް ބޭނުންކުރެވޭނެ ގޮތް ހަދާފައިވަނީ މިދިޔަ އާދިއްތަ ދުވަހުން ފެށިގެންނެވެ.