އަބަދާއި އަބަދާއި އަބަދު އެއްބަޔަކަށް އައްޑޫސިޓީގެ ކަންކަމުގައި ރައްޔިތުންގެ މަޖިލީހުގައި ބަސް ކިޔަން ދިނުމުން ރައްޔިތުން ބޭނުންވާ ނަތީޖާ ނެރެދެވިފައިނުވާ ކަމަށް ޕީޕީއެމް/ޕީއެންސީ ކޮންގްރެސް ގެ ލީޑަރ ޕީއެންސީގެ ރައީސް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރޭގައި، މަރަދޫ ދާއިރާއަށް ވާދަކުރައްވާ ޕީޕީއެމް/ޕީއެންސީ ކެންޑިޑޭޓްގެ ކެމްޕެއިން ހަރަކާތުގައި ވާހަކަފުޅު ދައްކަވަމުން ރަައީސް ޑރ.މުޢިއްޒު ވިދާޅުވީ، އައްޑޫ ސިޓީއަކީ މި ސަރުކާރުން ގެންގުޅޭ ޤައުމީ ތަރައްގީގެ ޕްލޭނުގައި ވަރަށް މުހިންމު ހިއްސާއެއް އޮތް ތަނެއް ކަމަށެވެ. އެމަނިކުފާނު ވަނީ މި ޕްލޭން ގެ ދަށުން އައްޑޫގެ ރައްޔިތުން ބޭނުންވާ ތަރައްގީ ގެނައުމުގެ މަސައްކަތް ކުރާއިރު، އެކަން ހާސިލު ކުރުމަށްޓަކައި ސިޓީގެ ރައްޔިތުންގެ އެއްބާރުލުމުގެ މުހިންމުކަން ފާހަގަކުރައްވާފައެވެ.

ރައީސް ޑރ.މުޢިއްޒު ވިދާޅުވީ،  އައްޑޫ ސިޓީގެ ކަންކަމުގައި މަޖިލީސް ތެރޭގައި ބަސް ކިޔަން އަބަދު އެއްބަޔަކަށް ދީފައި އޮތުމުން މާނަ ހުރި ދެމެހެއްޓެނިވި ތަރައްގީއެެއް ހާސިލްވެފައިނުވާ ކަމަށެވެ. އަދި އެކިވަރުގެ މަޝްރޫޢުތައް ހިންގާފައި ހުރި ނަމަވެސް އައްޑޫ ސިޓީގެ ރައްޔިތުން ބޭނުންވާ ކަންކަން ހާސިލް ނުވާ ކަމަށާއި، ރައީސް ޑރ.މުޢިއްޒު އަށް އިތުބާރުކޮށް، އެ ފުރުސަތު ދެއްވައިފިނަމަ، އައްޑޫސިޓީން ނަތީޖާ ނެރެދެއްވާނެ ކަމަށް ވެސް އެމަނިކުފާނު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ، ތަރައްގީގެ ޕްލޭންވެސް ފާސްވާން އޮތީ މަޖިލީހުގެ ތެރެއިން ކަމަށްވާއިރު، އެމަނިކުފާނު ބޭނުންފުޅުވަނީ 20 އަހަރުގެ ދުރު ރާސްތާ ތަރައްގީގެ މާސްޓަރ ޕޭލެނެއް އެކަމަށް ހާއްސަ ގާނޫނެއް ހަދައިގެން ގާނޫނަކުން ހިމާޔަތްތެރިކަމާއި ރައްކާތެރިކަން ލިބޭ ތަރައްގީގެ މާސްޓަރ ޕްލޭނެއް ގެނެސްދެއްވުމަށް ކަމަށެވެ.

ސަރުކާރަށް އެއްބާރުލުން ދޭނެ މެންބަރުން މަޖިލީހުގައި ތިބުން މުހިންމުކަން ފާހަގަކުރައްވައި، އިތުރަށް ރައީސް ޑރ.މުޢިއްޒު ވިދާޅުވީ، އެހެން ވިސްނުމެއްގެ ބަޔަކު މަޖިލީހަށް ހޮވައިފިނަމަ ރާއްޖެ ތަރައްގީ ކުރުމަށް އެމަނިކުފާނު ފަށްޓަވާފައިވާ މަސައްކަތްތައް މަޑުޖެހިދާނެކަމަށެވެ.