ރާއްޖެއަށް މަސްތުވާތަކެތި އެތެރެކުރަން އުޅުނު ޕާކިސްތާނު މީހަކު ހައްޔަރުކޮށްފިއެވެ.
ފުލުހުން މި މީހާ ހައްޔަރު ކޮށްފައިވަނީ އެމީހާ ރާއްޖެއަށް އައި އިރު ގެނައި ދަބަހުގެ ތެރެއިން ފަސް ކިލޯއަށް ވުރެ ގިނަ މަސްތުވާތަކެތި ފެނިގެންނެވެ.
ހައްޔަރު ކޮށްފައި ވަނީ އަބްދުލް ލަތީފް ބަޗޮލް ނަމަކަށް ކިޔާ، ޢުމުރުން 56 އަހަރުގެ މީހެކެވެ. އެމީހާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ކޯޓުން ވަނީ އޭނާގެ ބަންދަށް 30 ދުވަސް ޖަހާފައެވެ.
އެ އަމުރުގައިވާގޮތުން އަބްދުލް ލަތީފް ބަޗޮލް އާ ދެކޮޅަށް ގިނަ ހެކިތަކެއް ހުށަހަޅާފައިވެއެވެ. އަދި އަބްދުލް ލަތީފަކީ ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރި ކުރުމުގައި ބައިވެރިވުން އޮތް މީހެއް ކަމަށާއި އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށްވެސް ބުނެފައިވެއެވެ.
ހަމައެއާއެކު އަބްދުލް ލަތީފަކީ ޕާކިސްތާނު މީހަކަށްވުމުން، ރާއްޖެއިން ފިލައިގެން ދިއުމުގެ ފުރުސަތުވެސް އެބައޮތް ކަމަށް އަމުރުގައި ބުނެފައި ވެއެވެ.
Advertisement
This content is created and paid for by advertisers and does not involve Voice Journalists
