ޣައްޒާގެ ދެއިރް ބަލަޙުގައި ހުންނަ އެންމެ ދުވަސްވީ މިސްކިތްތަކުގެ ތެރޭގައި ހިމެނޭ އަބޫ ސަލީމް މިސްކިތަށް އިސްތިއުމާރީ އިސްރާއީލުން ހޯމަ ދުވަހު ދިން ވައިގެ ހަމަލާއެއްގައި އެ މިސްކިތް މުޅިން ހަލާކުކޮށްލައިފިއެވެ. 

ނޫސް އިދާރާތަކާއި ސޯޝަލް މީޑިއާގައި ޢާންމުވެފައިވާ ވީޑިއޯތަކުން ފެންނަ ގޮތުގައި ހަމަލާ ދިނުމާ އެކު މިސްކިތް ހުރި ސަރަޙައްދުން ކަޅު ދުންގަނޑެއް އެރިއެވެ. ޣައްޒާގައި ހުރި ތާރީޚީ ގޮތުން އެންމެ ފާހަގަކޮށްލެވޭ ތަންތަނުގެ ތެރޭގައި އެ މިސްކިތް ހިމެނޭ ކަމަށް ބެލެވެއެވެ.

މި ހަމަލާގައި ޣައްޒާގެ ބައެއް ރައްޔިތުންނަށް އަނިޔާވެފައިވާ ކަމަށް ރިޕޯޓްތައް ބުނެއެވެ. 

ޣައްޒާގެ އެހެން ސަރަޙައްދުތަކަށް ވެސް ހޯމަ ދުވަހު ވަރުގަދަ ހަމަލާތަކެއް އަމާޒުވެފައިވެއެވެ. ރޮއިޓާޒްގައި ރިޕޯޓުކޮށްފައިވާ ގޮތުގައި ބުރޮޖް ރެފިއުޖީ ކޭމްޕެއްގައި ގެއަކަށް ދިން ހަމަލާއެއްގައި ހަތަރު އަހަރުގެ ކުޑަ ކުއްޖަކު ނިޔާވެފައިވެއެވެ. އަދި ޚާން ޔުނިސްގެ މަގެއްގައި ދިން ހަމަލާއެއްގައި އިތުރު ފަލަސްޠީނު ރައްޔިތަކު ނިޔާވެފައިވެއެވެ.

ހަމަ އެ ދުވަހު ކުރީކޮޅު ދެއިރް ބަލަޙުގެ ފޭލިގެއަކަށް ދިން ހަމަލާއެއްގައި އެކަކު ނިޔާވެ އިތުރު މީހަކު ޒަޚަމްވި ކަމަށް ޞިއްޙީ ޚިދުމަތްތެރީން ބުނެފައިވެއެވެ. 

ޣައްޒާއިން އިސްރާއީލު މީހުން އުޅޭ ސަރަހައްދަށް ގުޑި އަރުވާތީވެސް  އިސްރާއީލުގެ ވެރީން ވަނީ އަސްކަރީ ފިޔަވަޅުތައް ވަރުގަދަ ކުރާނެ ކަމުގެ އިންޒާރު ދީފައެވެ. އެގޮތުން ހަފްތާ ބަންދުގައި ޣައްޒާ ބޯޑަރު ކައިރީ އޮންނަ އިސްރާއީލުގެ އާބާދީއެއްގެ ތެރެއިން ގުޑިތަކެއް ފެނުނު ކަމަށް އިސްރާއީލުގެ މީޑިއާ ރިޕޯޓުކޮށްފައިވެއެވެ. "މި ކަމަށް ނިމުމެއް ގެނައުމަށް ވަރުގަދަ ފިޔަވަޅުތައް އެޅޭނެ" ކަމަށް އިސްރާއީލުގެ ދިފާޢީ ވަޒީރު އިސްރާއީލް ކެޓޒް ބުންޏެވެ.

އިސްރާއީލުގެ އަސްކަރިއްޔާ އޮތީ ހަމަލާ ދޭނެ އަމާޒުތަކުގެ ލިސްޓެއް ތައްޔާރުކޮށްފައި ކަމަށް އިސްރާއީލު މީޑިއާ ރިޕޯޓުކޮށްފައިވެއެވެ.

ޣައްޒާގެ ތާރީޚީ ތަރިކަތައް ހަލާކުކޮށްލެވެމުންދާ އިރު އެ ސަރަޙައްދުގެ ޢާންމު ރައްޔިތުންގެ ޙާލަތު ދުވަހެއް ދުވަހަކަށް ގޯސްވަމުންދާ ކަން ޣައްޒާއިން ލިބޭ ރިޕޯޓުތަކުން ހާމަވެއެވެ.