ފ.ބިލެތްދޫގައި އަންހެނުންނަށް ޚާއްސަކޮށްގެން އިންޑޯޖިމެއް ގާއިކޮށްދިނުމަށް އެރަށުގެ އ.ތ.މ ކޮމިޓީން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހުން އެދިވަޑައިގެންފިއެވެ.

ބިލެތްދޫ އ.ތ.މ ކޮމިޓީ އިން މިފަދައިން ރައީސް ޑރ.މުޢިއްޒުގެ އަރިހުގައި އެދިވަޑައިގެންފައިވަނީ އެމަނިކުފާނު ބިލެތްދޫ ކައުންސިލާ އ.ތ.މ ކޮމިޓީއާއި އެކު އެ ރަށުގެ ފެނަކަ އޮފީހުގައި ބޭއްވި ބައްދަލުވުމުގައެވެ.

މިގޮތުން ބިލެތްދޫގެ ތަރައްޤީއަށް ފަށާފައިވާ މުހިންމު މަޝްރޫޢުތައް އަވަހަށް ނިންމައިދެއްވުމަށް އެ ރަށުގެ ކައުންސިލުން އެދިފައިވާއިރު، އ.ތ.މ ކޮމިޓީން ވަނީ ބިލެތްދޫގެ އަންހެނުންނަށް ޚާއްސަކޮށްގެން އިންޑޯޖިމަކާއި ވޮލީކޯޓެއްގެ މުހިންމުކަން ފާހަގަކުރައްވާފައެވެ.

Advertisement

މި ބައްދަލުވުމުގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، ބިލެތްދޫގައި އިންޑޯޖިމް، ޔޫތު ސެންޓަރ އަދި ވޮލީކޯޓު ބިނާ ކުރުމަކީ އެމަނިކުފާނުގެ ވައުދުފުޅެއް ކަމަށާއި، ބިލެތްދޫގެ ތަރައްޤީއަށް ކުރަންހުރި ކަންކަން ބާރަށް ކުރިޔަށްގެންދަވާނެކަމަށެވެ.

ހަމައެއާއިއެކު، ރައީސް ޑރ.މުޢިއްޒު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި އެރަށުގެ ތަރައްޤީގެ މަޝްރޫޢުތަކުގެ އެންމެ ފަހުގެ މަޢޫލޫމާތުތައް ރަށުގެ ކައުންސިލާ ހިއްސާ ކުރައްވާފައެވެ.