އުމްރާއަށް މީހުން ގެންދިއުމާ ބެހޭ ގޮތުން ރާއްޖޭގައި އަމަލުކުރަމުން އަންނަ އުޞޫލުތަކާ ޚިލާފަށް އަމަލުކުރަމުންދާ ޖަމާޢަތެއްގެ މައްސަލަ ތަޙުޤީޤުކޮށް ފިޔަވަޅު އެޅުމަށް ފުލުހުންނަށް ހުށަހަޅާނެ އިސްލާމިކް މިނިސްޓަރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އަލްމަޝްޢަރު ހައްޖު އެންޑް އުމްރާ ގުރޫޕުގެ ހަވާލުގައި މައްކާއަށް ދިޔަ 50 އުމްރާވެރިން އެނބުރި ރާއްޖެ ނާދެވި ތާށިވި މައްސަލައެއް މިފަހުން ވަނީ ފެންމަތިވެފައެވެ. އެ ގުރޫޕަކީ މައްސަލަތައް ކުރިމަތިވާތީ އުމްރާ މީހުން ގެންދިޔުމުގެ ހުއްދަ ބާތިލަވެސް ކޮށްފައިވާ ގުރޫޕެކެވެ. އެގޮތުން މިދިޔަ އަހަރުގެ ތެރޭގައި ހުއްދަ ބާތިލް ކުރުމުން، ޓްރެވެލް އޭޖެންސީއެއްގެ ނަމުގައު މި ރަމަޟާން މަހުވެސް އެ ގުރޫޕުންވަނީ މީހުން އުމްރާއަށް ގެމްގޮސްފައެވެ. 

މިފަދަ މައްސަލަތައް އެހެން ބައެއް ގްރޫޕްތަކުންވެސް ކުރިމަތިވާއިރު، އެކަމާއި ގުޅިގެން ވަޒީރު ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ، އުމްރާއަށް މީހުން ގެންދިއުމާ ބެހޭ ގޮތުން ރާއްޖޭގައި އަމަލުކުރަމުން އަންނަ ރަސްމީ އުޞޫލުތަކާ ޚިލާފަށް މީހުން އަތުން ލާރި ނަގައި އެއަށް އިހުމާލުވަމުންދާ ޖަމާޢަތެއްގެ މައްސަލަ ތަޙުޤީޤުކޮށް ފިޔަވަޅު އެޅުމަށް މިއަދު ޕޮލިހަށް ހުށަހަޅާނެ ކަމަށެވެ. 

Advertisement

އަމިއްލަ ޖަމާޢަތްތަކުގައި އުމްރާއަށް ދާ ފަރާތްތަކުން، އެ ޖަމާއަތަކީ ރަސްމީ ހުއްދަ އޮތް ޖަމާއަތެއްތޯ ކަށަވަރު ކުރުމަށް އިސްލާމީ ކަންތައްތަކާބެހޭ ވުޒާރާއިން ތަކުރާރުކޮށް އިލްސްތިމާސް ކުރެއެވެ. އިސްލާމީ ކަންތައްތަކާބެހޭ ވުޒާރާގެ ވެބްސައިޓުގައި ދިވެހިރާއްޖެއިން އުމްރާއަށް މީހުން ގެންދިއުމުގެ ހުއްދަ ދެވިފައިވާ ކުންފުނިތަކުގެ ލިސްޓުވެސްވަނީ އާންމުކޮށްފައެވެ.