ރާއްޖޭގައި ގޭންގު ކުށްތައް ހުއްޓުވުމަކީ، ސަރުކާރުން ފުލުހުންގެ ކިބައިން އެދޭ އެންމެ ބޮޑު އެއް އެދުން ކަމަށް ވާއިރު، އެ މަސައްކަތަށް ހުރަސް އެޅުމަށް ހުށަހަޅާ ރިޝްވަތުން ސަލާމަތް ވާން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ރޭ ފުލުހުންނަށް ގޮވާލައްވައިފި އެވެ.

ވަޒީރު އަލީ އިހުސާން މިފަދައިން ގޮވައިލެއްވީ، އައްޑޫސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެން ލޯ އެންފޯސްމަންޓުގައި ރޭ ބޭއްވި ފުލުހުންގެ 36 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި އިހުސާން ވިދާޅުވީ، ރައްޔިތުންނަށް އަމާން މާހައުލެއް ހޯދައި ދިނުމަކީ ސަރުކާރުގެ އެންމެ މުހިންމު އެއް އަމާޒު ކަމަށެވެ.

Advertisement

އަދި އެ އަމާޒު ހާސިލު ކުރުމަށް ފުލުހުން މަސައްކަތް ކުރަމުންދާއިރު، ތިން މައްސަލައަކަށް އިސްކަން ދީގެން މަސައްކަތް ކުރައްވާ ކަމަށް ވަޒީރު ވިދާޅުވިއެވެ.

އެގޮތުން ވަޒީރު ފާހަގަކުރެއްވި ތިން ކަމަކީ، ރާއްޖެއިން މަސްތުވާތަކެއްތި އެއްކޮށް ނައްތާލުމަށް ސަރުކާރުން ކުރާ މަސައްކަތާއި، ގޭންގު ކުއްތަށް ހުއްޓުވުމަށް ކުރާ މަސައްކަތާއި، ޤަވާއިދާއި ޚިލާފަށް އުޅޭ ބިދޭސީން ގަވާއިދަށް ފެއްތުމަށް ކުރަމުންދާ މަސައްކަތެވެ

އެހެން ނަމަވެސް އެ ރިޝްވަތަށް ނުހެއްލުމަށް ފުލުހުންނަށް ވަޒީރު ވަނީ ގޮވާލައްވާފައެވެ. އަދި ފުލުހުންނަށް ދެވޭ ތަމްރީނުގެ ބޭނުމަކީވެސް، ފުލުހުންގެ އަޒުމުގެ މަތީގައި ނުގުޑާ ތިބެ، ކުރާ ހުވަޔާއި އެއްގޮތަށް އަމަލު ކުރުން ކަމަށް ވާއިރު، ހުރަސްތަކުގެ ތެރެއިންވެސް ސަރުކާރުގެ މަގްސަދު ހާސިލް ކުރުމަށް މަސައްކަތް ކުރެއްވުމަށް އިހްސާން އެދިލެއްވިއެވެ.

އިހްސާން ވިދާޅުވީ ފުލުހުންގެ ފަރާތުން އެފަދައިން ކަން ކުރާތަން ފެންނާނެކަމާއި މެދު ޝައްކެއް ނުކުރައްވާ ކަމަށެވެ