ރާއްޖޭގައި ގޭންގު ކުށްތައް ހުއްޓުވުމަކީ، ސަރުކާރުން ފުލުހުންގެ ކިބައިން އެދޭ އެންމެ ބޮޑު އެއް އެދުން ކަމަށް ވާއިރު، އެ މަސައްކަތަށް ހުރަސް އެޅުމަށް ހުށަހަޅާ ރިޝްވަތުން ސަލާމަތް ވާން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ރޭ ފުލުހުންނަށް ގޮވާލައްވައިފި އެވެ.
ވަޒީރު އަލީ އިހުސާން މިފަދައިން ގޮވައިލެއްވީ، އައްޑޫސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެން ލޯ އެންފޯސްމަންޓުގައި ރޭ ބޭއްވި ފުލުހުންގެ 36 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި އިހުސާން ވިދާޅުވީ، ރައްޔިތުންނަށް އަމާން މާހައުލެއް ހޯދައި ދިނުމަކީ ސަރުކާރުގެ އެންމެ މުހިންމު އެއް އަމާޒު ކަމަށެވެ.
"ކުށް ކުރުން މަދުކޮށް ކުށަށް އަރައިގަންނަ މީހުންގެ މައްސަލަަތައް އަވަހަށް ތަހުގީގުކޮށް ރައްޔިތުންނަށް އިންސާފު ގާއިމްކޮށްދިނުމަކީ ދައުލަތުގެ އެންމެ މުހިންމު އެއް ވާޖިބު، މިކަން މިގޮތަށް ކުރެއްވުމަށްޓަކައި އެންމެ ބޮޑު ދައުރެއް އަދާ ކުރަނީ ދިވެހި ފުލުހުން،".
ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން
އަދި އެ އަމާޒު ހާސިލު ކުރުމަށް ފުލުހުން މަސައްކަތް ކުރަމުންދާއިރު، ތިން މައްސަލައަކަށް އިސްކަން ދީގެން މަސައްކަތް ކުރައްވާ ކަމަށް ވަޒީރު ވިދާޅުވިއެވެ.
އެގޮތުން ވަޒީރު ފާހަގަކުރެއްވި ތިން ކަމަކީ، ރާއްޖެއިން މަސްތުވާތަކެއްތި އެއްކޮށް ނައްތާލުމަށް ސަރުކާރުން ކުރާ މަސައްކަތާއި، ގޭންގު ކުއްތަށް ހުއްޓުވުމަށް ކުރާ މަސައްކަތާއި، ޤަވާއިދާއި ޚިލާފަށް އުޅޭ ބިދޭސީން ގަވާއިދަށް ފެއްތުމަށް ކުރަމުންދާ މަސައްކަތެވެ
."މި ކަންކަން ވިޔަ ނުދިނުމަށް ދައުލަތުގެ އެތެރެއިންނާއި ބޭރުން އަދި މި ކަންކަން ކުރުމުގައި ޝާމިލްވާ މީހުންގެ ފަރާތުން ރިޝްވަތު ހުށަހެޅުމާއި އިންޒާރު ދީ، ބިރު ދެއްކުމާއި ފުރައްސާރަކޮށް ތިޔަ ކުދިންގެ މަސައްކަތަށް ހުރަސް އެޅުމަށް މަސައްކަތް ކުރާނެ،"
ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން
އެހެން ނަމަވެސް އެ ރިޝްވަތަށް ނުހެއްލުމަށް ފުލުހުންނަށް ވަޒީރު ވަނީ ގޮވާލައްވާފައެވެ. އަދި ފުލުހުންނަށް ދެވޭ ތަމްރީނުގެ ބޭނުމަކީވެސް، ފުލުހުންގެ އަޒުމުގެ މަތީގައި ނުގުޑާ ތިބެ، ކުރާ ހުވަޔާއި އެއްގޮތަށް އަމަލު ކުރުން ކަމަށް ވާއިރު، ހުރަސްތަކުގެ ތެރެއިންވެސް ސަރުކާރުގެ މަގްސަދު ހާސިލް ކުރުމަށް މަސައްކަތް ކުރެއްވުމަށް އިހްސާން އެދިލެއްވިއެވެ.
އިހްސާން ވިދާޅުވީ ފުލުހުންގެ ފަރާތުން އެފަދައިން ކަން ކުރާތަން ފެންނާނެކަމާއި މެދު ޝައްކެއް ނުކުރައްވާ ކަމަށެވެ
Advertisement
This content is created and paid for by advertisers and does not involve Voice Journalists
