އައްޑޫ ސިޓީ ހިތަދޫ އާއި ގުޅިފައިވާ ރަށްތަކަށް ސާފު ފެން ނުލިބޭތާ ގާތް ގަނޑަކަށް ދެމަސް ދުވަސް ވެފައިވާ ކަމަށް ބުނެ ކުއްލި މައްސަލައެއް މަޖިލީހަށް ހުށަހަޅައިފިއެވެ.
މި މައްސަލަ ހުށަ ހެޅުއްވީ ހިތަދޫ ދެކުނު ދާއިރާގެ އެމްޑީޕީގެ މެމްބަރު އިބްރާހިމް ނާޒިލެވެ.
މައްސަލަ ހުށަހަޅުއްވަމުން ނާޒިލް ވިދާޅުވި ގޮތުގައި، މި އަހަރުގެ އޭޕްރީލް މަހުގެ 24 ވަނަ ދުވަހުން ފެށިގެން އައްޑޫ ސިޓީ ހިތަދޫ، މަރަދޫ، ފޭދޫ، މަރަދޫފޭދޫ ރައްޔިތުންނަށް ފެނަކައިން ފޯރުކޮށްދެމުންދިޔަ ސާފު ފެން ލިބުމުގައި އިންތިހާއަށް ދަތިތަކެއް ކުރިމަތިވެފައިވާ ކަމަށެވެ. އަދި އެކަމުގެ ސަބަބުން ރައްޔިތުންގެ އާންމު ދިރިއުޅުމަށް ބުރޫއަރައި ރައްޔިތުންނަށް އެތައް ތަކުލީފްތަކަކާއި ކުރިމަތިވަމުންދާ ކަމަށްވެސް ނާޒިލް ވިދާޅުވިއެވެ.
ނާޒިލް ވިދާޅުވީ ފެނާއި ކަރަންޓް ފަދަ އަސާސީ ޚިދުމަތް ތަކަށް ދިމާވާ މައްސަލަ ތަކަކީ ދުވަހުން ދުވަހަށް ހައްލު ކުރެވެންޖެހޭ ކަމެއް ކަމަށެވެ. ނަމަވެސް އައްޑޫ ސިޓީގެ ފެނުގެ މައްސަލަ ހައްލުކުރުމަށް ފެނަކަ ނުކުޅެދިފައިވާ ކަމަށާ އެކަމުގައި ޒިންމާވާން ޖެހޭ ފަރާތަކީ ކޮބައިކަން އައްޑޫ ސިޓީ ރައްޔިތުންނަށް ނޭނގޭ ކަމަށެވެ.
މީގެ އިތުރުން ފެނ ލިބޭއިރުވެސް ލިބެނީ އެތައް އިރަކުން ކަމަށާ، އެ ފެން ލިބޭ ވަގުތު ނަގާ ކުޑަ ފެންފޮަދަށް ވެސް ބިލު އަންނަކަން ފާހަގަކުރައްވައި ނާޒިލް ވަނީ ރަނގަޅަށް ޚިދުމަތް ނުދީ، ރައްޔިތުން އަތުން ފައިސާ ނަގަމުންދާ ކަމަށް ވިދާޅުވެފައެވެ.
އެހެންކަމުން، އޭނާ ވަނީ އައްޑޫ ސިޓީގެ ހިތަދޫ، މަރަދޫ، މަރަދޫ ފޭދޫ، ފޭދޫ ރައްޔިތުން މިހާރު ތަހައްމަލް ކުރަމުންދާ ދަތިތަކަށް ދާއިމީ ހައްލެއް ހޯދައިދީ ރައްޔިތުންނަށް ލިބެންޖެހޭ އެންމެ އަސާސީ ހިދުމަތް ކަމަށްވާ ސާފު ފެން ފޯރުކޮށްދިނުމުގައި ދިމާވެފައިވާ މައްސަލަ ވަގުތުން ވަގުތަށް ހައްލު ހޯދައިދިނުމަށް ސަރުކާރަށް ގޮވާލާފައެވެ.
Advertisement
This content is created and paid for by advertisers and does not involve Voice Journalists
