ޓްރާންސް މޯލްޑިވިއަން އެއާވޭސް(ޓީއެމްއޭ) ގެ ސީޕްލޭންއެއް އެކްސިޑެންޓް ވި މައްސަލަ ސިވިލް އޭވިއޭޝަން އޮތޯރިޓީން ތަހުގީގުކުރަން ފަށައިފި އެވެ.

ބ. އަތޮޅު ސީސައިޑް ފިނޮޅު ރިސޯޓުން އެ އަތޮޅު ވެސްޓްއިން މޯލްޑިވްސް މިރިޔަންދު އަށް ދަތުރުކުރި ޓީއެމްއޭގެ މަތިންދާބޯޓެއް އެ ރިސޯޓަށް ޖެއްސުމުގެ ތެރޭގައި ބޯޓުގެ ކަނާތު ކަނދަށް ގެއްލުންވެ، ހާދިސާއެއް ހިނގި ކަމަށާއި އެ ހާދިސާއެއް ހިނގާފައިވަނީ އިއްޔެ މެންދުރު ފަހު 3:30 ހާއިރު އެވެ.

މި ހާދިސާ ހިނގި ސީޕްލޭނަކީ 11 ފަސިންޖަރުންނަށް ދަތުރުކުރެވޭ ޑީއެޗްސީ ޑޭސް ހައެއް މަރުކާގެ ބޯޓެކެވެ.

Advertisement

މީސްމީޑިއާގައި ދައުރުވަމުންދާ ވީޑިއޯ އިން ފެންނަ ގޮތުގައި އެ ބޯޓުގެ އެއް ކަނދަށް ގެއްލުން ލިބި ބޯޓު މޫދަށް ޖެއްސުމުން ބޯޓުގެ އެއްފަޅި އޮތީ އަޑިއަށް ގޮސްފައެވެ.

ސިވިލް އޭވިއޭޝަން އޮތޯރިޓީ އިން ހާމަ ކުރެއްވި ގޮތުގައި، މި ހާދިސާގައި އެއްވެސް ފަސިންޖަރަކަށް ނުވަތަ ފަޅުވެރިއަކަށް އެއްވެސް ޖިސްމާނީ އަނިޔާއެއް ލިބިފައެއް ނުވެއެވެ. އަދި ބޯޓުގައި ހުރި މުދަލަކަށްވެސް އެއްވެސް ގެއްލުމެއް ނުލިބޭ ކަމަށް ސިވިލް އޭވިއޭޝަން އޮތޯރިޓީން މައުލޫމާތު ދެއެވެ.

މި ހާދިސާ މިހާރު ދަނީ ސިވިލް އޭވިއޭޝަން އޮތޯރިޓީން ތަހުގީގުކުރަމުންނެވެ.