2024 ވަނަ އަހަރު ރާއްޖެއާއި ރާއްޖެއިން ބޭރުން މަތީ ތަޢުލީމާއި ތަމްރީނު ހޯދުމަށް ލޯނަށް އެދި އެޕްލިކޭޝަން ހުށަހަޅުއްވާފައިވާ ފަރާތްތަކުގެ ނަތީޖާ އިޢުލާންކޮށްފިއެވެ. 

މަތީ ތަޢުލީމާއި ތަމްރީނާއި ބެހޭ ވުޒާރާއިން ބުނީ ރާއްޖެއާއި ރާއްޖެއިން ބޭރުން މަތީ ތަޢުލީމާއި ތަމްރީނު ހޯދުމަށް ލޯނަށް އެދުމަށް މިއަހަރު 500 ފުރުސަތު ހުޅުވާލެވުނު ކަމަށެވެ.

އެ ފުރުސަތަށް އެދި 1709 ފޯމު ހުށަހަޅާފައިވާއިރު ޝަރުތު ހަމަވާ ފޯމުގެ އަދަދަކީ 1153 ކަމަށްވެސް މިނިސްޓްރީން މައުލޫމާތު ދެއެވެ. އަދި ލޯން ފުރުސަތު 500 ދަރުވަރުންނަށް ދޭން ހުޅުވާލި ނަމަވެސް، ޝަރުތުފުރިހަމަވާ ހުރިހާ ފަރާތްތަކަށް ފުރުޞަތުދިނުމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ކަމަށް ބުނެފައުވެއެވެ.

އެގޮތުން މި އަހަރުގެ ލޯނު ސްކީމަށް މިހާތަނަށް 1015 ދަރިވަރުން ސެލެކްޓް ވެފައިވާ ކަންވެސް މިނިސްޓަރީން ފާހަގަކުރެއެވެ. އަދި އެ ދަރިވަރުންނަށް 13 ޖޫން 2024 ވަނަ ދުވަހު ލޯނަށް ހޮވިފައިވާ ކަމުގެ " ސްޕޮންސަރ ލެޓަރ"ލިބިގެންދާނެ ކަމަށްވެސް ބުންޏެވެ.

މިނިސްޓްރީން އިތުރަށް ބުނީ، ޕައިލެޓް ލައިސެންސް ސްލޮޓްގެ މިއަދު އިއުލާނު ކުރެވިފައިވަނީ ވަގުތީ ނަތީޖާ ކަމަށާ އެހެނިހެން ސްލޮޓްތަކަށް ކުރިމަތިލީ ފަރާތްތަކުގެ ނަތީޖާ https://mohe.gov.mv/ އިން ލިބެން ހުންނާނެ ކަމަށެވެ.

އަދި ނަތީޖާގައި ޑިސްކޮލިފައިވި ދަރިވަރުން ޑިސްކޮލިފައިވި ސަބަބުވެސް ބަޔާން ކޮށްފައި ވާނެ ކަމަށާ ނަތީޖާ އާއި މެދު ޝަކުވާ ހުށަހެޅުމުގެ މުއްދަތު 11 ޖޫން 2024 އިން 25 ޖޫން 2024 އަށް ހުލުވާލެވުފައުވާއިރު ޝަކުވާ ހުށަހަޅާނީ [email protected] މެއިލް އަށް ކަމަށްވެސް ބުނެފައިވެއެވެ. 

ފާއިތުވެދިޔަ އަހަރު،500 އަށްވުރެ ގިނަ ދަރިވަރުންނަށްރާއްޖެއިންބޭރުން ޕައިލެޓް ލައިސެންސަށް ކިޔެވުމަށް ލޯނު ދީފައިވެއެވެ. މިނިސްޓްރީން ބުނީ، މިހާ ގިނަފުރުޞަތު، އެއް ދާއިރާއަކުން ކިޔެވުމަށް ދީފައިވުމުގެ ސަބަބުން ދަރިވަރުންނާއި، ބެލެނިވެރިންނާއި، ކަމާ ބެހޭ އެކިއެކި އިދާރާތަކުން ގިނަގުނަ ޝަކުވާތަކާއި ކަންބޮޑުވުންތައް އެ މިނިސްޓްރީއާ ހިއްސާކޮށްފައިވާ ކަމަށެވެ.

އެގޮތުން، ދަރިވަރުންނަށް ޕްލޭސްމަންޓާއި ވިސާ ލިބުމުގައި ވަރަށްބޮޑެތި ގޮންޖެހުންތައްދަނީ ކުރިމަތިވަމުންދާއިރު، މިހާ ގިނަ ދަރިވަރުނަތަކެއް އެއްފަހަރާއެއް ދާއިރާއަކުން ކިޔަވައި ނިމިގެން އައުމުން ވަޒީފައި ހޯދުމުގައި ދަތިތަކާ ކުރިމަތިލާންޖެހުމަކީ އެކަށީގެންވާ ކަމެއްކަމަށް ޓްރާންސްޕޯޓް މިނިސްޓްރީންނާއި ކަމާ ގުޅޭ އެހެނިހެން އިދާރާތަކުން ލަފާކޮށް ކަންބޮޑުވުން ފާޅުކޮށްފައިވާ ކަމަށް ބުނެފައިވެއެވެ.

އެހެންކަމުން، މި އަހަރު ޕައިލެޓް ލައިސެންސަށް ކިޔެވުމަށް ލޯނުދޭން ހުޅުވާލީ އެންމެ 10 ފުރުޞަތު ކަމަށާ އެއީރާއްޖޭގެ ފްލައިންގ ސްކޫލްގައި ކިޔެވުމަށް ކަމަށް މިނިސްޓްރީން ބުންޏެވެ. މި ސްލޮޓަށް ޝަރުތުހަމަވާ 148 އެޕްލިކޭޝަން ލިބިފައިވީ ނަމަވެސް ފާހަގަކުރެވުފައުވާ ކަންކަމާއި ރާއްޖޭގައި ހުރިޕައިލެޓް ތަމްރީނުދޭ މަރުކަޒުގެ ކެޕޭސިޓީއަށް ރިޢާޔަތްކޮށް މިނިސްޓްރީން ނިންމާފައިވަނީ ޕައިލެޓް ލައިސެންސައަށް ކިޔެވުމަށް އިޢުލާނުގައި ސްލޮޓް ކަނޑައެޅިފައިވާ އަދަދަށް، މެރިޓް އުސޫލުން އެންމެމަތިން މާކްސް ހޯދާ 10 ދަރިވަރުންނަށް އެފުރުޞަތުދިނުމަށް ކަމަށް ވެސް މިނިސްޓްރީން ބުންޏެވެ. 

އަދި، މި ފުރުޞަތައް އެދި ހުށަހަޅާފައިވާ ދަރިވަރުންގެ ތެރެއިން، ޝަރުޠު ހަމަވާއެހެން ހުރިހާ ދަރިވަރުން، މިއަހަރު އިޢުލާންކޮށްފައިވާ އެހެން ދާއިރާތަކާއި ސްލޮޓްތަކުގެތެރެއިން އެދަރިވަރަކު ޝަރުތުހަމަވާ ސްލޮޓަކަށް ބަދަލުވުމުގެ އިޚްތިޔާރު ދިނުމަށް ނިންމާފައިވާ ކަމަށް ބުނެފައުވެއެވެ.