ޢީދުގައިވެސް ފަލަޞްޠީނުގެ ދިފާޢުގައި ނުކުމެ، ހިރިލަންދޫއިން ނަމޫނާ ދައްކައިފިއެވެ.

ހިރިލަންދޫ ރައްޔިތުން، އަޟްހާ އީދުގެ މުނާސަބަތުގައި ކުޅިވަރު ހަރަކާތްތައް ކުރިއަށް ގެންދިޔުން މަޑުޖައްސާލައި، މިއަދު ވަނީ، ފަލަޞްޠީނުގައި ހިންގަމުންދާ ޤަޠުލުޢާންމާ ދެކޮޅަށް، އަޑުއުފުލާ، ހިނގާލުމެއް ބާއްވާފައެވެ.

އެ ރަށު ކައުންސިލުން މައުލޫމާތު ދިން ގޮތުގައި، "ފަލަސްތީނާ އެކު ހިރިލަންދޫ ރައްޔިތުން" މި ނަމުގައި އެ ރަށުގައި މިއަދު ހަވީރު ހިނގާލުމެއް ބޭއްވީ، އަޟްހާ އީދުގެ އުފާ ފާޅުކުރަމުންދާއިރު، ހިރިލަންދޫ ރައްޔިތުން ފަލަސްތީނުގެ ލޮބުވެތި އަޚުންނާއި އުޚްތުންނަށް ޖެހިފައިވާ ޙާލު ހަނދާން ހުރިކަން ދައްކުވައިދިނުމުގެ ގޮތުނނެވެ. އަދި މި އިވެންޓު ބޭއްވީ، އެއީ ކޮންމެހެން ކުރަންޖެހޭ ކަމެއްކަމުގައި ދެކިގެން ކަމަށްވެސް ކައުންސިލުން ބުންޏެވެ.

Advertisement

މި އިވެންޓުގައި ހިރިލަންދޫގެ ގިނަ ޢަދަދެއްގެ ރައްޔިތުން ބައިވެރިވިއިރު، އެ އިވެންޓުގެ ތެރެއިން ފަލަސްތީނަށް އެހީވުމަށް ފައިސާ ހަނދިޔާކުރުމުގެ ފުރުސަތު ވެސް ވަނީ ހުޅުވާލާފައެވެ. އެ ގޮތުން މި ހަފްތާގެ ނިޔަލަށް ފައިސާއިންނާއި ޓްރާންސްފާކޮށްގެން ވެސް ފައިސާ ހަނދިޔާ ކުރުމުގެ ފުރުސަތު ހުޅުވާލާފައިވާކަމަށް މައުލޫމާތު ލިބެއެވެ.