އައްޑޫގެ ފިޝަރީސް ކޮމްލެކްސްގައި މަސްވެރިން ކުރަމުންދާ މުޒާރައާއި ގުޅުވައި، މަސްވެރިންގެ ހައްގުތައް ކަށަވަރުކޮށް ދިނުމަށް ގޮވާލައި މިއަދުގެ މަޖިލީހުގެ ޖަލްސާއަށް ކުއްލި މައްސަލައެއް ހުށަހެޅުއްވުމަށްފަހު، މަރަދޫ ދާއިރާގެ މެމްބަރު އަހުމަދު ދީދީ ޖަލްސާއަށް ހާޒިރުވެ ނެތުމުން މައްސަލަ ކުރިޔަށް ގެންދެވެން ނެތްކަން އިއުލާން ކޮށްފިއެވެ.
މަސްވެރިންގެ ހައްގުތައް ރައްކާތެރިކޮށް ދީ، ބާނާ މަހަށް ހަމަ އަގު ދިނުމަށް ގޮވާލައި އިއްޔެ އެމްޑީޕީގެ ޕާލިމަންޓު ގުރޫޕުން ނޫސްވެރިންގެ ބައްދަލުވުމެއް ބާއްވާފައިވާއިރު، އެ ޕާޓީން ވަނީ ޕާޓީގެ ޕާލިމަންޓު ގުރޫޕު މެމްބަރުންގެ އަދަދު މަދު ނަމަވެސް މަޖިލިސް ތެރެއިން ކުރެވެން ހުރި މަސައްކަތައް ކުރާނެ ކަމަށް ބުނެފައެވެ.
އެގޮތުން އެކަމާއި ގުޅޭގޮތުން، މިއަދުގެ މަޖިލީހުގެ ޖަލްސާއަށް ކުއްލި މައްސަލައެއް ހުށަހަޅާނެ ކަމަށްވެސް އިއްޔެ އެމްޑީޕިން ވަނީ ބުނެފައެވެ.
އެ ކުއްލި މައްސަލަ މިއަދުގެ ޖަލްސާގެ އެންމެ ފުރަތަމަ މަސައްކަތަކަށް އެޖެންޑާވެސް ކޮށްފައި އޮތެވެ.
އެހެން ނަމަވެސް، މަޖިލީހުގެ މިއަދުގެ ޖަލްސާ ފައްޓަވައި، އެޖެންޑާ ވިދާޅުވެދެއްވުމަށް ފަހު އަހުމަދު ދީދީއަށް ކުއްލި މައްސަލަ ހުށަހެޅުމަށް ފުރުސަތު ދެއްވިކަން ރިޔާސަތުން އިއުލާން ކުރެއްވިއިރު މައްސަލަ ހުށަހެޅުއްވި އަހުމަދު ދީދީ ޖަލްސާއަށް ހާޒިރުވެ ނެތުމުން މައްސަލައިގެން ކުރިޔަށް ދެވެން ނެތްކަން ރިޔާސަތުން ވަނީ އިއުލާން ކޮށްފައެވެ.
އެހެންކަމުން، މަޖިލީހުގައި ކުރިއަށް ގެންގޮސްފައިވަނީ، ސަރުކާރުގެ ފަރާތުން ހުށަހަޅާފައިވާ އިސްލާހުގެ ބަހުސް މަރުހަލާ އެވެ.
އިއްޔެގެ ނޫސްވެރިންގެ ބައްދަލުވުމުގައި އެމްޑީޕީ މެންބަރުން ވަނީ، މަސްވެރިންގެ ހައްގުގައި ކުއްލި މައްސަލައެއް ހުށަހެޅުމަށް ފަހު ގަރާރެއް ވެސް ހުށަހަޅުއްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
