މި ސަރުކާރުން އިގްތިޞާދު މެނޭޖުކުރުމަށްޓަކައި ރައްޔިތުންނަށް ދަތިވާނެ އެއްވެސް ކަމެއް ނުކުރާނެ ކަމަށް ރައްޔިތުން މަޖިލީހުގެ ފުނަދޫ ދާއިރާގެ މެންބަރު މުހައްމަދު މަމްދޫހް ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ސަރުކާރުގެ ފަރާތުން މަމްދޫހު ހުށަހަޅުއްވާފައިވާ ދައުލަތުގެ ދަރަންޏާބެހޭ ބިލަށް ބަހުސް ކުރައްވަމުން މަމްދޫހު ވިދާޅުވީ އެމްޑީޕީ ސަރުކާރުން ފަސް އަހަރުގެ ވެރިކަމެއްގެ ތެރޭގައި އުފެއްދި ދަރަނި އެ ސަރުކާރަށް މެނޭޖުކުރާނެ ގޮތް ނޭނގި އޮތް އޮތުން ނިމުމަކަށް ގެނެސް މި ސަރުކާރުން އަންނަނީ އެ ދަރަނި ދައްކާނެ ގޮތް ހޯދަމުން ކަމަށެވެ.
އަދި މި ސަރުކާރުން ނެގި ދަރަންޏެއް މިހާތަނަށް މި ސަރުކާރަށް ނުދެއްކި ނޯންނާނެކަމަށާ، މި ސަރުކާރުން ދަރަނި ދައްކަމުންދަނީ ފައިސާ ޗާޕް ނުކޮށް ލޯނުވެސް ނުނަގާކަން އޭނާ ވަނީ ފާހަގަކުރައްވާފައެވެ.
"އަޅުގަނޑު ފާހަގަކޮށްލަން ބޭނުން، އާސަންދަ ކަނޑަލަކަށް މިސަރުކާރަކުން ނޫޅޭ،، ޓެކްސް ރޭޓް ބޮޑުކުރާކަށް މި ސަރުކާރަކުން ނޫޅޭ، ޓެކްސް ރޭޓާއި ޓެކްސް ބޭސް އެމްޑީޕީއަށް ނޭނގުމަކީ ދިވެހި ރައްޔިތުންނަށް އޮޅުވާލައިގެން ވާހަކަ ދައްކަންވީ ސަބަބެއް ނޫން. އެބޭބޭފުޅުންނަށްވެސް މިކަން އޮތްގޮތް ވަރަށް ސާފުކޮށް އެނގި ވަޑައިގެން ތިއްބަވައި އެބޭފުޅުން އެ އޮޅުވާލަނީ މުޅި ގައުމަށް. މުޅި ދިވެހި ރައްޔިތުންނަށް.”
ފުނަދޫ ދާއިރާގެ މެންބަރު މުހައްމަދު މަމްދޫހް
މިއާއެކު މަމްދޫހު ވަނީ އިގްތިޞާދު މެނޭޖުކުރުމަށް ކަންކަން ކުރާއިރު ރައްޔިތުންނަށް ދަތިކުރުމުގެ ގޮތުން އެއްވެސް ފިޔަވަޅެއް މި ސަރުކާރުން ނާޅާނެކަމަށް ވިދާޅުވެފައެވެ.
"މި ސަރުކާރުން އިގްތިޞާދު މެނޭޖުކުރުމަށް ކުރަމުންދާ ކަންކަމުގެ ތެރޭގައި ރައްޔިތުންނަށް ކަންތައްތަކަކުން ދަތިކުރާކަށް އެއްވެސް ކަމެއް، އެއްވެސް ފިޔަވަޅެއް ނާޅާނެ ކަމުގެ ޔަގީންކަން އަޅުގަނޑުމެންނަށް އެބަ އޮތް"
ފުނަދޫ ދާއިރާގެ މެންބަރު މުހައްމަދު މަމްދޫހް
މީގެ އިތުރުން މަމްދޫހު ވިދާޅުވީ، އެމްޑީޕީގެ ވެރިކަމުގައި ހުއްޓިފައި ހުރި ޕްރޮޖެކްޓްތައްވެސް މި ސަރުކާރުން ކިރިއަށް ގެންދާކަމަމާ، މި ސަރުކާރުން ކަންކަން ކުރާނީ ކަން ކުރަން އެނގިގެން އެކަންކަން ރާވާލައިގެން ކަމަށެވެ.
Advertisement
This content is created and paid for by advertisers and does not involve Voice Journalists
