އެމެރިކާގެ ރައީސް ޖޯ ބައިޑެންގެ ރިޔާސީ އިންތިޚާބުގެ ކެންޑިޑޭސީއާ ގުޅޭގޮތުން މަޝްވަރާކުރުމަށް ޑިމޮކްރެޓިކް ޕާޓީގެ މެންބަރުން މިއަދު ވޮޝިންގްޓަންގައި ކުއްލި ބައްދަލުވުންތަކެއް ބާއްވާފައިވެއެވެ.

މި ކުއްލި ބައްދަލުވުންތައް ބާއްވާފައިވަނީ، ޢުމުރުފުޅުން 81 އަހަރުގެ ރައީސް، ބައިޑެންގެ ސިއްޙީ ހާލަތާއި މެދު ވެސް ސުވާލު އުފެދިފައިވާ ދަނޑިވަޅެއްގައި، ޑޮނަލްޑް ޓްރަމްޕާ އެކު ބޭއްވުނު ރިޔާސީ ބަޙުޘުގައި ބައިޑަންގެ ފަރާތުން ފެނުނު ދެރަ ޕަރފޯމަންސް އާ ގުޅިގެންނެވެ.

ކެޕިޓޯލް ހިލްގެ ބޭރުގައި ބޭއްވުނު މި ބައްދަލުވުމަކީ "އަޑުއެހުމުގެ ސެޝަނެއް" ކަމަށް ނިއުޔޯކް ސްޓޭޓްގެ ކޮންގްރެސް މެންބަރު ގްރެގް މީކްސް ނޫސްވެރިންނަށް މަޢުލޫމާތު ދީފައިވެއެވެ. މި ބައްދަލުވުމުގައި ޓެކްސާސް ސްޓޭޓްގެ ކޮންގްރެސް މެންބަރު ލޮއިޑް ޑޮގެޓް ވަނީ ރައީސް ބައިޑެން ފަހަތަށް ޖެހި، އެހެން ކެންޑިޑޭޓަކު ކުރިމަތިލުމަށް ގޮވާލާފައެވެ.

Advertisement

އެހެންނަމަވެސް، މެރިލޭންޑްގެ ސްޓެނީ ހޯޔަރ، ޖޯޖިއާގެ ހޭންކް ޖޯންސަން އަދި ކެލިފޯނިއާގެ ޖުއާން ވާގަސް ފަދަ ގިނަ ކޮންގްރެސް މެންބަރުން ވަނީ ރައީސް ބައިޑެންއަށް ތާއީދުކުރާކަން ހާމަކޮށްފައެވެ. މި ބައްދަލުވުން ބޭއްވުނީ 2024 ވަނަ އަހަރުގެ ރިޔާސީ އިންތިޚާބުގައި ބައިޑެން ވާދަނުކުރުމަށް ގިނަ ފަރާތްތަކުން ގޮވާލަމުންދާ ދަނޑިވަޅެއްގައެވެ.

މި ބައްދަލުވުމުގެ ނަތީޖާއެއްގެ ގޮތުން ޑިމޮކްރެޓިކް ޕާޓީން އަޅާނެ ފިޔަވަޅުތަކާ ގުޅޭގޮތުން އިތުރު މަޢުލޫމާތެއް މިވަގުތު ލިބިފައެއް ނުވެއެވެ. ނަމަވެސް، މި މައްސަލައިގައި ޕާޓީގެ އެތެރޭގައި ދެބަސްވުންތަކެއް އުފެދިފައިވާކަން މި ބައްދަލުވުމުން ދައްކުވައިދެއެވެ.

އެމެރިކާގެ ރައީސް ޖޯ ބައިޑެންގެ ޤާބިލުކަމާ މެދު އުފެދިފައިވާ ސުވާލުތައް އިތުރުވެފައިވަނީ ޖުލައި 4 ގެ ބްރޭކަށްފަހު ކޮންގްރެސްގެ މެންބަރުން ވޮޝިންގްޓަނަށް އެނބުރި އައުމާ ގުޅިގެންނެވެ. އަދި ބައިޑެންގެ ބަދަލުގައި ރިޔާސީ އިންތިޚާބަށް ކުރިމަތިލާނެ ފަރާތަކާ ގުޅޭގޮތުން ދެކެވޭ ވާހަކަތައް އިތުރުވެފައިވާއިރު، ވައިސް ޕްރެޒިޑެންޓް ކަމަލާ ހެރިސްއަށް އިސް ފަރާތްތަކުގެ ތާއީދު ލިބެމުންދާކަން ފާހަގަކުރެވެއެވެ.