ވެލާނާ އިންޓަނޭޝަނަލް އެއާޕޯޓްގައި ސީޕްލޭން ޖައްސާ ފެނުގެ ރަންވޭ ދިއްލުމުގެ މަސައްކަތް ފަށަން މަސައްކަތް ކުރަމުންދާ ކަަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުހައްމަދު ވިދާޅުވެއްޖެއެވެ.
ޝަރީފް މިހެން ވިދާޅުވީ، ކުރުނބާ މޯލްޑިވްސްގައި މިއަދު ހެނދުނު ބޭއްވި އެއާ ސާވިސް ވޯލްޑް ކޮންގްރެސް 2024 ގެ ޕެނަލް ޑިސްކަޝަންގައި ވާހަކަފުޅު ދައްކަވަމުންނެވެ.
އެގޮތުން ދުނިޔޭގެ އެންމެ ބޮޑު ސީޕްލޭން އޮޕަރޭޝަން ހިންގަނީ ވެލާނާ އެއާޕޯޓްގައި ކަން ފާހަގަކުރައްވައި ޝަރީފް ވިދާޅުވީ، އެންމެ ބާރުބޮޑު ދުވަސްވަރުގައިވެސް ސީޕްލޭންގެ އެއާ ޓްރެފިކް މޫވްމެންޓް އުޅެނީ މިނެޓެއްހާ ކައިރީގައި ކަމަށެވެ.
“އެއީ ގަޑިއިރެއް ތެރޭގައި 60 މޫވްމެންޓް، ގާތް ގަނޑަކަށް 70 އާއި ގާތްކުރާ ވަރަށްވެސް ސީޕްލޭން މޫވްމަންޓް މައްޗަށް ދޭ. މި އަހަރު އަޅުގަނޑުމެން މި މަސައްކަތް ކުރަނީ ސީޕްލޭންގެ އެއާ ޓްރެފިކް މޫވްމެންޓް އެއަށްވުރެވެސް އިތުރު ކުރުމަށް. މިއާއެކު ގަޑިއެއްހާ އިރު ތެރޭގައި 84 ސީޕްލޭންގެ އެއާ ޓްރެފިކް މޫވްމެންޓަށް އިތުރު ވާނެ،".
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުހައްމަދު
ޝަރީފް އިތުރަށް ވިދާޅުވީ، އެމްއޭސީއެލް އިން ދަނީ، ސީޕްލޭން އިންޑަސްޓްރީއާއެކު ވަރަށް ގާތުން މަސައްކަތް ކުރައްވަމުން ކަމަށާ، މި އަހަރުގެ ފިނިމޫސުމުގެ ޕީކް ސީޒަނާއި ދިމާކޮށް ސީޕްލޭނަށް ހާއްސަ ފެނުގެ ރަންވޭގައި ލައިޓް ހަރުކުރުމުގެ މަސައްކަތް ކުރައްވަމުންދާ ކަމަށެވެ. މިއާއެކު ސީޕްލޭންގެ އެއާ ޓްރެފިކް މޫވްމެންޓް އިތުރުވާނެ ކަމެއް ކަމަށް ވިދާޅުވިއެވެ.
މިހާރު ސީޕްލޭންތަކުގެ ދަތުރުތައް އޮންނަނީ އިރުއޮއްސި 6:00 އާ ހަމައަށް ކަން ފާހަގަކުރައްވަމުން ޝަރީފް ވިދާޅުވީ، ސީޕްލޭން ޖައްސާ ވޯޓަރ ރަންވޭ ދިއްލުމަށް ކަމާއި ގުޅުން ހުރި ފަރާތްތަކާއިއެކު މަސައްކަތް ކުރަމުންދާ ކަމަށެވެ.
"އަޅުގަނޑުމެން މަސައްކަތް ކުރަމުން މިދަނީ، މިއަހަރުގެ ފިނި މޫސުމުގެ ޕީކް ސީޒަނަށް، އަލި ކުރެވުފައިވާ ފެނުގެ ރަންވޭއެއްް އިތުރު ކުރުމަށް. އޭރުން އެއާޓްރެފިކް މޫވްމަންޓް އިތުރު ވާނެ. މިހާރު އެއާޓެކްސީއަށް ދަތުރު ކުރެވެނީ އިރޮއޮއްސި 6:00 އާ ހަމައަށް. އަޅުގަނޑުމެން އެއާޕޯޓް ލައިޓިންގ މެނުފެކްޗަރުންނާއެކު މަސައްކަތް ކުރަމުން މިދަނީ ސީޕްލޭންގެ ރަންވޭ ދިއްލުމުގެ މަސައްކަތް ކުރެވޭތޯ. މީގެ ސަބަބުން 6:00ގެ ފަހުންވެސް ސީޕްލޭން ދަތުރުތައް ކުރެވޭނެ. މީގެ ސަބަބުން ފަތުރުވެރިކަމަށް ފައިދާ ކުރާނެ،".
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުހައްމަދު
މީގެ އިތުުރުން ޝަރީފް ވަނީ، ވެލާނާ އެއާޕޯޓްގެ ތަރައްގީގެ މަޝްރޫއުތަކުގެ ތެރެއިން، އައު ޕެސެންޖާ ޓާމިނަލް އެޅުމުގެ މަސައްކަތް ކުރިއަށްދާކަން ފާހަގަކުރައްވައި އެ ޓާމިނަލްގެ އެއް ބައި މި އަހަރު ނިމުމުގެ ކުރިން ހުޅުވާނެ ކަމަށާ އަދި އެ ޓާމިނަލް އެއްކޮށް 2025 އަހަރުގެ މެދު ތެރޭގައި ނިމެނޭ ކަމަށް ވިދާޅުވެފައެވެ.
މިއާއެކު ވަރަށް ރަނގަޅު ފުރިހަމަ ތަޖުރިބާއެއް ފަސެންޖަރުންނަށް ލިބިގެން ދާނެ ކަން ޝަރީފް ފާހަގަކުރައްވާފައި ވެއެވެ.
Advertisement
This content is created and paid for by advertisers and does not involve Voice Journalists
