ރަތްކަނޑާއި ގާޒާ އަދި ލެބަނަންގައި ހިނގަމުންދާ ހަނގުރާމަތަކުގެ ތެރެއިން، ނޭޓޯއިން މެދުއިރުމަތީ ސަރަޙައްދުގައި އެ ޖަމިއްޔާގެ ފުރަތަމަ އޮފީސް، އުރުދުންގެ ވެރިރަށް އަމާންގައި ޤާއިމުކުރާން އެއްބަސްވެއްޖެއެވެ. 

އުރުދުންގެ ފޮރިން މިނިސްޓްރީން މިކަމާއި ގުޅިގެން ނެރުނު ބަޔާނެއްގައި ބުނެފައިވަނީ މި އޮފީހުގެ ސަބަބުން ނޭޓޯއާއި އުރުދުން ގާތްވެ، ސިޔާސީ މަޝްވަރާތައް އިތުރުވެ، އަދި ދެފަރާތަށް މުހިންމު ދާއިރާތަކުން ޢަމަލީގޮތުން އެއްބާރުލުން އިތުރުވާނެ ކަމަށެވެ.

"މިކަމުގެ ސަބަބުން ނޭޓޯއާއި އުރުދުންގެ އިސްވެރިންނާ ދެމެދު ގަވާއިދުން ބައްދަލުވުންތައް ބޭއްވި، ޤައުމީ އަދި ސަރަހައްދީ ކަންކަމާ ގުޅޭގޮތުން ދެފަރާތުގެ މެދުގައި އޮންނަ ފަހުމު އިތުރުވާނެ،" މި ބަޔާނުގައި ބުނެފައިވެއެވެ.

Advertisement

ނޭޓޯއާއި ޖޯޑަނުން ބުނެފައިވަނީ މި އޮފީހުގެ ސަބަބުން ޕާޓްނަރޝިޕް ޕްރޮގްރާމްތަކާއި ހަރަކާތްތައް ރާވައި ހިންގުމަށް ފަސޭހަވާނެ ކަމަށެވެ. މީގެ ތެރޭގައި ސްޓްރެޓެޖިކް ދިރާސާ، ސިވިލް އިމަޖެންސީ ޕްލޭނިންގ އަދި ތައްޔާރުވުން، ކްރައިސިސް މެނޭޖްމަންޓް، ޕަބްލިކް ޑިޕްލޮމަސީ، ސައިބަރ ސެކިއުރިޓީ، އަދި މޫސުމަށް އަންނަ ބަދަލުތަކާ ގުޅޭ ދާއިރާތަކުން ކޮންފަރެންސްތަކާއި، ކޯސްތަކާއި، ތަމްރީނު ޕްރޮގްރާމްތައް ހިމެނެއެވެ.

މި ބަޔާނުގައި އިތުރަށް ބުނެފައިވަނީ މި އޮފީސް ޤާއިމުކުރުމަކީ ސަރަހައްދީ އަދި ދުނިޔޭގެ ފެންވަރުގައި އިސްތިޤްރާރު ޤާއިމުކުރުމުގައި ޖޯޑަން އަދާކުރާ މުހިންމު ދައުރާއި، ޓެރަރިޒަމާއި ހަރުކަށި ފިކުރު ފަދަ ބައިނަލްއަޤްވާމީ ނުރައްކާތަކާ ދެކޮޅަށް ކުރާ މަސައްކަތްތަކަށް ލިބޭ އިޢުތިރާފެއް ކަމަށެވެ.

މި އޮފީސް ހުޅުވުމަކީ ނޭޓޯއާއި ޖޯޑަންގެ ގުޅުން ކުރިއަރައި ދިއުމުގެ ނަތީޖާއެއް ކަމަށާއި، މި ގުޅުން އިތުރަށް ފުޅާވަމުންދާނެ ކަމަށްވެސް މި ބަޔާނުގައި ބުނެފައިވެއެވެ.

ޖޯޑަނަކީ ނޭޓޯގެ މެމްބަރެއް ނޫނެވެ. ނަމަވެސް އީރާނުން އިޒްރޭލަށް ދޫކުރި ޑްރޯންތަކާ ދެކޮޅަށް އެމެރިކާ އާއި އެހެނިހެން ޤައުމުތަކަށް އެހީތެރިވި މެދުއިރުމަތީގެ ހަމައެކަނި ޤައުމަކީ ޖޯޑަނެވެ.