ނިމިދިޔަ ސަރުކާރުގައި ފެނަކައިން ކަރަންޓް އަޕްގްރޭޑް ކުރުމުގެ މަސައްކަތްތައް ކޮށްފައި ހުރީ އެއްވެސް ރޭވުންތެރިކަމެއް ނެތި ކަމަށް ތިމާވެއްޓާއި ހަކަތައާއި ބެހޭ ވުޒާރާގެ ވަޒީރު ޠާރިޤް އިބްރާޙީމް ވިދާޅުވެއްޖެއެވެ.
ވަޒީރު މިފަދައިން ވިދާޅުވީ، މިއަދުގެ މަޖިލީހުގެ ޖަލްސާގައި، ކުރީ ސަރުކާރުގައި، ފެނަކައިން ފަށައި ނަމަވެސް ކުރިއަށް ނުގޮސް ހުރި މަޝްރޫއުތަކާއި ގުޅެގޮތުން މެންބަރަކު ކުރި ސުވާލަށް ޖަވާބު ދެއްވަމުންނެވެ.
އެގޮތުން ވަޒީރު ވިދާޅުވީ ފެނަކަ ކޯޕަރޭޝަނާ ހަވާލުކުރި ގިނަ މަޝްރޫތަކެއް މިވަގުތު ހުއްޓިފައި ހުރި ކަމަށާއި، ކުރީ ސަރުކާރުން މަސައްކަތްކޮށްފައި ހުރީ އެއްވެސް ގޮތަކަށް އިސްކަން ދޭން ޖެހޭ ކަންކަމަށް އިސްކަންދީގެން ނޫން ކަމަށެވެ.
މިވަގުތުވެަސް އާބާދީ ބޮޑެތި ރަށްރަށުގައި ހުރީ، އެ ރަށް ރަށަށް ބޭނުންވާ، ޚާއްސަކޮށް ކަރަންޓަށް ނޫނީ ޕަވަސިސްޓަމަށް ބޭނުންވާ މަސައްކަތް ހުއްޓިފައި. އެގޮތުން، އައްޑޫ، ފުވައްމުލަކު، ތިނަދޫ އަދި ކުޅުދުއްފުށީގައި އޮތީމަސައްކަތް ހުއްޓިފައި. މިހުރިހާ ތަނެއްގައިވެސް މެދެއްހާ ތަނަށް ކުރިއަށް ގޮއްސަ ހުއްޓިފައި ހުރީ، އެއްވެސް ކަހަލަ ޕްލޭނެއް ނެތި ކުރީ ފެނަކަ އެޑްމިނިސްޓްރޭޝަނުން، ކުރީ ސަރުކާރުން ޕަވަސިސްޓަމް އަޕްގްރޭޑް ކުރުމުގެ މަސައްކަތް ކޮށްފައި ހުރީ. އެހެންވީމާ، އެ މައްސަލަ މިއަދު އަޅުގަނޑުމެންނަށް މި ދިމާވަނީ. ކަރަންޓް ސިސްޓަމް ތަކުގެ މަސައްކަތް ރަނގަޅަށް ކޮށްފައި އޮތް ނަމަ މިއަދު އޮންނާނީ ގާއިމް ކުރެވިފައި.
ވަޒީރު ޠާރިޤް އިބްރާޙީމް
މިއާއެކު ވަޒީރު ތޯރިގް ވިދާޅުވީ، މިހާރުގެ ފެނަކައިން އެ މައްސަލަތައް ހައްލު ކުރުމަށް މަސައްކަތް ކުރަމުން އަންނަަ ކަމަށެވެ. މިގޮތުން، އެ ރަށްތަކުގެ ކޮންޓްރެކްޓު ބަދަލުކޮށްގެން ނުވަތަ ކުރީގެ ކޮންޓްރެކްޓަރާ ގުޅިގެން ވިޔަސް އެ މަޝްރޫއުތައް އަވަސް ކުރުމަށް ފެނަކައިން މަސައްކަތް ކުރަމުން އަންނަ ކަމަށް ތޯރިގް ވިދާޅުވިއެވެ.
ޠާރިގު މިހެން ވިދާޅުވެފައިވާއިރު އައްޑޫ އަދި ކުޅުދުއްފުށީގެވެސް ކަރަންޓް މައްސަލަ ދޭތެރެއިން ޖެހި ރައްޔިތުންނަށް އެކަމުގެ ސަބަބުން ގިނަ އުނދަގޫ ތަކާއި ކުރިމަތިވެ ކަންބޮޑުވުންތައް ދޭތެރެއިން އަންނަނީ ފާޅުކުރަމުންނެވެ.
Advertisement
This content is created and paid for by advertisers and does not involve Voice Journalists
