ގެދޮރުވެރިކަމާއި ބެހޭ ވަޒީރު ޑރ. ޢަލީ ހައިދަރު އަޙްމަދު މަޖިލީހުގެ ޖަލްސާއަށް ވަޑައިނުގެންނެވުމުން ފުލެޓް ތަކާއި ގުޅޭގޮތުން ވަޒީރާ ސުވާލު ކުރުން އެހެން ދުވަހެއްގެ ޖަލްސާއަށް ފަސްކޮށްފިއެވެ.

ރައްޔިތުންގެ މިއަދުގެ ޖަލްސާގެ އެޖެންޑާގައި އޮތް ގޮތުން މަޖިލީހުގެ ފުރަތަމަ މަސައްކަތަކަށް އޮތީ، ވަޒީރު ހައިދަރާ، ގަލޮޅު އުތުރުދާއިރާގެ މެންބަރު މުހައްމަދު އިބްރާޙީމް ވަޒީރު ހައިދަރާއި ސުވާލު ކުރުމެވެ. 

އެގޮތުން ކުރީ ސަރުކާރުގެ ބިންވެރިޔާ ސްކީމުގެ ދަށުން ގުޅީ ފަޅުން ގޯތި ލިބުނު ފަރާތްތަކަށް އިންވަކިކޮށް ގޯތި ދޫކުރާނެ އިރަކާއި، އެ ސްކީމުގެ ދަށުން ދެންވެސް ދޫކޮށްފައިހުރި ގޯތިތައް ދޫކުރެވޭނެ އިރަކާއި، ހުޅުމާލޭ ދެވަނަ ފިޔަވަހީގައި އިމާރާތް ކުރަމުންދާ 4000 ފުލެޓް، އޭގެ ހައްގުވެރިންނަށް ދޭނީ ކޮންއިރަކުތޯ މެމްބަރު ވަނީ ހައިދަރާ ސުވާލު ކުރައްވާފައެވެ. 

Advertisement

އެ ސުވާލަށް ޖަވާބު ދެއްވުމަށް ވަޒީރު ހައިދަރު މިއަދުގެ ޖަލްސާއަށް ވަޑައިގަންނަވާގޮތަށް ހަމަޖެހުފައި އޮތް ނަމަވެސް، ޖަލްސާ ފަށްޓަވަމުން މަޖިލީހުގެ ރައީސް، އަބްދުއްރަޙީމް އަބްދުالله ވަނީ ވަޒީރަށް މިއަދު މަޖިލީހަށް ހާޒިރުވެވެން ނެތް ކަން އަންގަވާފައިވާކަން އިއުލާން ކުރައްވާފައެވެ. 

ައެހެންކަމުން، އަބްދުއްރަޙީމް ވަނީ މިނިސްޓަރަށް ވަޑައިގެންނެވޭނެ ދުވަހެއް ބަލައި އެހެން ދުވަހަކަށް އެ ސުވާލު އެޖެންޑާ ކުރައްވާނެ ކަމަށް ވިދާޅުވެފައެވެ.

ގެދޮރުވެރިޔާ ސްކީމްގެ ދަށުން ދޫކުރާ 4000 ފުލެޓް ދޫކުރާ އިރެއް މެމްބަރު އައްސަވާ އިރު، އެ ފްލެޓް ލިބޭ މީހުންގެ ލިސްޓު ބާތިލު ނުކުރުމަށް އެދި ހުށަހަޅައިފައިވާ ޕެޓިޝަނާ ގުޅޭ ގޮތުން މިދިޔަ މަހުގެ 16 ވަނަ ދުވަހު މަޖިލީހުގެ ޕެޓިޝަން ކޮމިޓީއަށް ވަޒީރު ހައިދަރު ހާޒިރު ކުރެއްވުމުން، އެ ފުލެޓްތައް އޮކްޓޯބަރ މަހުގެ ތެރޭގައި ދޫކުރެވޭނެ ކަމަށް ވަޒީރު ވިދާޅުވެފައިވާކަން ފާހަގަކޮށްލަންޖެހެއެވެ.