ރައްޔިތުންގެ މަޖިލީހުގެ މިއަދުގެ ޖަލްސާގައި ބަހުސް ކުރައްވާނެ އެއްވެސް މެމްބަރަކު ނުވެގެން ޖަލްސާ ކުރުކޮށްލައިފި އެވެ.

މިއަދުގެ ޖަލްސާގެ އެޖެންޑާގައި ފުރަތަމަ އޮތީ ގަލޮޅު އުތުރު ދާއިރާގެ އެމްޑީޕީގެ މެމްބަރު މުހައްމަދު އިބްރާހިމް (ކުޑޫ) ހައުސިން މިނިސްޓަރު ޑރ. އަލީ ހައިދަރާ ސުވާލު ކުރެއްވުމެވެ.

އެހެން ނަމަވެސް އާއިލީ ކަމަކާ ގުޅިގެން މިނިސްޓަރު ހައިދަރަށް މިއަދުގެ ޖަލްސާ އަށް ވަޑައިނުގެންނެވުމުން އެ މައްސަލަ އެހެން ދުވަހެއްގައި ކުރިއަށް ގެންދަން ނިންމަވައި، އެޖެންޑާގައި ދެ ވަނަ އަށް އޮތް، މާލިއްޔަތު ކޮމިޓީން ދިރާސާކުރި ދެ އޮޑިޓް ރިޕޯޓެއް ތަޅުމަށް ހުށަހެޅުމާއި ބަހުސް ކުރުމުގެ މަސައްކަތް ކުރިއަށް ގެންދެވިއެވެ.  

އެގޮތުން މާލިއްޔަތު ކޮމިޓީގެ މުގައްރިރު ގާސިމް އިބްރާހިމް ކޮމިއުނިކޭޝަން އޮތޯރިޓީގެ 2016-2020 ވަނަ އަހަރުގެ އޮޑިޓް ރިޕޯޓާއި، ފެމިލީ ޕްރޮޓެކްޝަން އޮތޯރިޓީގެ 2016-2020 ވަނަ އަހަރުގެ އޮޑިޓް ރިޕޯޓް މަޖިލީހަށް ހުށަހެޅުއްވިއެވެ. 

އެ ދެ ރިޕޯޓަށް ބަހުސް ކުރައްވަން ބޭނުންވާ މެމްބަރުން ފުރުސަތަކަށް އެދިވަޑައިގަތުމަށް ރިޔާސަތުން ހުޅުވައިލުމުން އެއްވެސް ބޭފުޅަކު އެ ފުރުސަތުގެ ބޭނުމެއް ނުކުރެއްވި އެވެ.

އެހެންކަމުން، ރިޔާސަތުން ދެން ނިންމެވީ މި ވަގުތަށް ޖަލްސާ މެދުކަނޑާލުމަށެވެ.

ދެ މައްސަލަ އަށް ވެސް ބަހުސް ކުރައްވާނެ މެންބަރަކު ނުވި ނަމަވެސް ޖަލްސާ އަށް 50 މެންބަރުން ހާޒިރުވެވަޑައިގެން ތިއްބެވިއެވެ.

އާންމު ގޮތެއްގައި މެންދުރު 1:30 ގައި ވޯޓަށް އެހުން އޮތް ނަމަވެސް މިއަދު އެ ދެ ރިޕޯޓަށް ވޯޓަށް އެހުން އޮންނާނީ ހެނދުނު 11:00 ގައި ކަމަށް ވެސް އަބްދުއްރަހީމް އިއުލާން ކުރެއްވި އެވެ.