ކުރީގެ ރައީސް، އިބްރާޙީމް މުހައްމަދު ޞާލިހުގެ ސަރުކާރުން ބިންވެރިޔާ ސްކީމުގެ ދަށުން ގުޅި ފަޅުން ދޫކުރަން ނިންމާފައިވާ ގޯތިތަކުގެ އިން ވަކިކޮށް، ގޯތި ހަވާލުކުރެވެން އޮތީ ތިލަމާލެ ބްރިޖުގެ މަސައްކަތް ނިމުމުން ކަމަށް ގެދޮރުވެރިކަމާއި ބެހޭ ވަޒީރު ޑރ.ޢަލީ ހައިދަރު އަޙްމަދު ވިދާޅުވެއްޖެއެވެ. 

މަޖިލީހުގެ މިއަދުގެ ޖަލްސާގައި، ވަޒީރު ހައިދަރު މަޖިލީހަށް ހާޒިރު ކުރައްވާފައިވާއިރު، ގުޅިފަޅުން ގޯތި ލިބުނު ފަރާތްތަކަށް ގޯތި ހަވާލު ކުރާނެ އިރަކާއި ގުޅޭގޮތުން ގަލޮޅު އުތުރުދާއިރާގެ މެންބަރު މުހައްމަދު އިބްރާޙީމް (ކުޑޫ) ވަނީ ވަޒީރާ ސުވާލު ކުރައްވާފައެވެ. 

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، ގުޅިފަޅުން ދޫކޮށްފައިވާ ގޯތި ތަކުގެ އިން ވަކިކޮށް ގޯތި ހަވާލުކުރެވޭނެ ތާރީޚް ދަންނަވަން ދަތި ކަމަށެވެ.

Advertisement

އޭގެ ސަބަބެއް ކަމުގައި ވަޒީރު ވިދާޅުވީ، ގުޅިފާޅުގެ ބިން ހިއްކައި ނުނިމުން ކަމަށެވެ. އަދި ގުޅީފަޅަކީ ތިލަމާލޭ ބްރިޖުގެ މަސައްކަތަށް ވްރަށް ބޮޑަށް ބޭނުންކުރަމުންދާ ސަރަހައްދެއް ކަމަށް ވުމުން، އެ މަސައްކަތް ކުރިއަށްދާއިރު ގޯތި ދޫކުރެވެން ނެތް ކަމަށްވެސް ވަޒީރު ވިދާޅުވިއެވެ. 

މީގެ އިތުރުން ވަޒީރު ވިދާޅުވީ، ގުޅިފަޅުން ބިން ދޫކޮށްފައިހުރީ މީހުން ދިރިއުޅެން އެކަށީގެންވާ ކަހަލަށް ގޮތަކަށް ނޫން ކަމަށެވެ. އެހެންކަމުން، މި ސަރުކާރުން އެތަނުގައި ތަކްލީފަކާއި ނުލައި، މީހުންނަށް އުޅެވޭނެ ގޮތަށް، އުމްރާނީ، އިގްތިޞާދީ އަދި އިޖްތިމާޢީ ވަސީލަތްތަކާއި އެކީގައި، އެތަނުގެ ލޭންޑްޔޫސް ޕްލޭނެއް ތައްޔާރުކޮށް، ގުޅިފަޅުން ގޯތި ލިބުނު ފަރާތްތަކާ މަޝްވަރާކޮށް ބަދަލުތައް ގެނެސްފައިވާ ކަމަށްވެސް ވިދާޅުވިއެވެ. އަދި އެ ލޭންޑްޔޫސް ޕްލޭން އޮތީ ފާސްކުރުމުގެ މަރުހަލާގައި ކަން ވަޒީރު ފާހަގަކުރެއްވިއެވެ. 

ހަމައެހެންމެ، ގުޅީފަޅުގެ ބިން ހިއްކުމުގެ މަސައްކަތް އެމްޓީސީސީއާ ހަވާލުކުރުމުގެ މަޝްވަރާތައް ކުރިއަށްދާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބް މައުލޫމާތު ދެއްވާފައިވާ ކަމަށާ،އެ މަސައްކަތް ނިމޭނެ ވަކި ދުވަހެއްވެސް ވިދާޅެއް ނުވާ ކަމަށް ވަޒީރު ހައިދަރު ވިދާޅުވި އެވެ.

އަދި ގުޅީފަޅުން 85 ހެކްޓަރުގެ ބިން ހިއްކަންޖެހޭކަންވެސް ހައިދަރު ފާހަގަކުރެއްވި އެވެ.