ކުޑަކުދިންގެ ރުޅިވެރިކަމާ ކުރިމަތިލުމަކީ ގޮންޖެހުންތަކެއް ހުރި ކަމެއް ނަމަވެސް މިކަން މެނޭޖްކޮށް ކުޑަކުރުމަށް އެހީތެރިވެދިނުމަށް މައިންބަފައިންނާއި ބެލެހެއްޓުންތެރިންނަށް ބޭނުންކުރެވޭނެ ފައިދާހުރި ސްޓްރެޓެޖީތަކެއް އެބަހުއްޓެވެ. ދަރިން މާ ރުޅިގަދަވެއްޖެނަމަ މައްސަލަ ހައްލުކުރުމަށް ކުރެވިދާނެ  ބައެއް ކަންކަން ތިރީގައި މިވަނީއެވެ.

އޮބްޒަރވޭޝަން އެންޑް ކޮމިއުނިކޭޝަން: ދަރިފުޅު ރުޅިއަންނަ ކަންކަމަށް ވަރަށް ބޮޑަށް ސަމާލުކަން ދޭށެވެ. އެއީ މާޔޫސްކަމާއި، ބިރުވެރިކަމާއި، ނުވަތަ ކަމެއް ކުރަން ނޭނގުމުން އެކަމާ ހިތްހަމަނުޖެހުމުން އަންނަ ރުޅިއެއްތޯ ނުވަތަ އެނޫންވެސް ކަމަކާއި ހުރެ އަންނަ ރުޅިއެއްތޯ ދެނެގަންނާށެވެ. އެގޮތުން، ދަރިފުޅުގެ އިޙްސާސްތަކާއި ފިކުރުތައް ދެނެގަތުމަށްޓަކައި ދަރިފުޅާ ވާހަކަ ދައްކާށެވެ.

ޖަޒުބާތު ތަކާމެދު ކުއްޖާ ހޭލުންތެރިކުރުން: ދަރިފުޅުގެ ޖަޒުބާތުތައް ދެނެގަނެ އެ ޖަޒްބާތުތަކުގެ ކޮބައިކަން ނުވަތަ އޭގެ ނަން ކިޔުމަށް ދަސްކޮށްދޭށެވެ. އެގޮތުން، ރުޅިއައުން، ބިރު ގަތުން، ދެރަވުން، ހާސްވެ ކަންބޮޑުވުން، އުފާވުން، ހިތްޖަމަޖެހުން ފަދަ ޖަޒުބާތުތަކާއިމެދު ހޭލުންތެރި ކުރުވާށެވެ. މިއީ އެމީހުންނަށް އިހުސާސް ކުރެވެމުންދާ ކަންކަމާއި އެ އިހްސާސް ކުރެވެނީ ކީއްވެގެންކަން ދެނެގަތުމަށް އެހީތެރިވެދޭނެ ކަމެކެވެ.

މިސާލަކުން ލީޑްކުރުން: ކުޑަކުދިން ގިނަ ފަހަރަށް ބޮޑެތި މީހުންގެ ސުލޫކު ނަކަލުކުރެއެވެ. އެހެންކަމުން، މައިންބަފައިން ރުޅިއަންނަ ވަގުތު ތަކުގައި، މަޑުމައިތިރިކަމާއި ބިނާކުރަނިވި ގޮތެއްގައި ރުޅި ކޮންޓްރޯލްކުރާގޮތް ކުދިންނަށް ދައްކާށެވެ.

ސްޓްރެސް މެނޭޖްކުރާނެ ގޮތް ދައްކައިދިނުން: ސްޓްރެސް މެނޭޖްކުރުމަށް ކުރެވިދާނެ ކަންކަން ދަރިންނަށް މައިންބަފައިންގެ ފަރާތުން ފެނުމަކީވެސް އެކުދިންގެ ސްޓްރެސް މެނޭޖްކޮށް ރުޅިމަޑުކުރުމަށް އެ އެކަންކަން ޚިޔާރުކުރަން މަގުފަހުކޮށްދޭނެ ކަމެކެވެ. އެގޮތުން، ފުންކޮށް ނޭވާލުން، ކަސްރަތުކުރުން، ނުވަތަ އިހުސާސްތަކުގެ ވާހަކަ ދެއްކުން ފަދަ ކަންކަން ކުރެވިދާނެއެވެ. 

މައްސަލަ ހައްލުކުރުމުގެ ހުނަރު: ދަރިފުޅު ރުޅިއަރުވާލާ މައްސަލަތަކަށް ހައްލު ހޯދުމަށް ހިތްވަރު ދޭށެވެ. މިއީ އެމީހުންނަށް ކޮންޓްރޯލް ކުރުމަށް ވަރަށް ބޮޑަށް އެހީވެދޭނެ ކަމެކެވެ. 

ދަރިފުޅު ރުޅިއަންނަ ވަގުތު ތަކުގައި އެކަން ހައްލު ކުރުމަށް މަސައްކަތްކޮށް، ރުޅިކޮންޓްރޯލް ކުރާ ފަހަރު ތަކުގައި، އެކަންކަމަށް ތައުރީފުކޮށް އިނާމު ދިނުމަކީވެސް އެދެވޭ ނަތީޖާއެއް ނުކުންނާނެ ކަމެކެވެ. އެގޮތުން، އިނާމެއްގެ ގޮތުން، ކުއްޖާއަށް މީރު އެއްޗެއް ކާން ދިނުން، ނުވަތަ ލޯބިން ބައްދާލާ ބޮސްދިނުން ނުވަތަ ކުއްޖާ އެންމެ ދާހިތްވާ ތަނަކަށް ގެނގޮސްލަ ދިނުން ފަދަ ކަންކަންވެސް ކުރެވިދާނެއެވެ. ޕޮޒިޓިވް ރިއިންފޯސްމަންޓަކީ ރަނގަޅު ސުލޫކަށް ހިތްވަރު ލިބިގެންދާނެ ކަމެކެވެ. 

އޮޕަން ކޮމިއުނިކޭޝަން: އަދަބެއްގެ ބިރެއް ނެތި ދަރިފުޅުގެ އިޙްސާސްތައް ބެލެނިވެރިޔާއާ ހިއްސާކުރުމަށް، ރައްކާތެރިކަން އިޙްސާސް ކުރެވޭ މާޙައުލެއް އުފެއްދުމަކީ ވަރަށް މުހިންމު ކަމެކެވެ. 

ކްރިއޭޓިވް އައުޓްލެޓްސް: ދަރިފުޅުގެ ޖަޒުބާތުތައް ފާޅުކުރެވޭނެ ގޮތްތަކެއްގެ ގޮތުގައި ކުރެހުމާއި، ލިޔުން، ފަދަ ހަރަކާތްތަކަށް ހިތްވަރު ދެވިދާނެއެވެ. 

ކައުންސެލިންގ: ދަރިފުޅުގެ ރުޅިގަދަކަން ދިގުދެމިގެންދާނަމަ ކުޑަކުދިންގެ ނަފްސާނީ މާހިރެއް ނުވަތަ ކައުންސެލަރެއްގެ އެހީތެރިކަން ހޯދުމަށް ވިސްނާށެވެ. އެމީހުންނަށް ޚާއްޞަ ސްޓްރެޓެޖީތަކާއި ސަޕޯޓް ފޯރުކޮށްދެވޭނެއެވެ.

ދަރިފުޅަށް އެކަށީގެންވާ ނިދި ލިބި، މިންހެޔޮ ކާނާ ކެއުމާއި، ގަވާއިދުން ޖިސްމާނީ ގޮތުން ހަރަކާތްތެރިވާކަން ކަށަވަރުކުރަންވާނެއެވެ. މި ކަންކަމަކީ މޫޑާއި ސުލޫކަށް ވަރަށް ބޮޑަށް އަސަރު ފޯރުވައެވެ.

ރުޅި އައުމުން ޢަމަލުކުރަންވީ ގޮތް ކީރިތި ނަބިއްޔާ صلى الله عليه وسلم ވަނީ ބަޔާންކޮށްދެއްވާފައެވެ.

އެކަލޭގެފާނު ޙަދީޘް ކުރައްވާފައިވެއެވެ. «إِذَا غَضِبَ أَحَدُكُمْ وَهُوَ قَائِمٌ فَلْيَجْلِسْ، فَإِنْ ذَهَبَ عَنْهُ الْغَضَبُ وَإِلَّا فَلْيَضْطَجِعْ» رواه أبو داود

މާނައީ: "ތިޔަބައިމީހުންކުރެ މީހަކު ރުޅިއަންނަހިނދު އޭނާހުރީ ކޮޅަށް ކަމުގައިވާނަމަ އިށީންނާށެވެ. އެވަރުންވެސް އޭނާގެ ކިބައިން ރުޅި ފިލައި ނުގޮސްފިނަމަ އޮށޯންނާށެވެ."

ރުޅި އަންނަހިނދު، އެ ރުޅި އަންނަ މީހާ ހުރި ހާލަތު ބަދަލުކޮށްލުމުން އޭނާގެ ގައިގައި ހިނގަމުންދާ ލޭގެ އޮއިވަރު ބަދަލުވެގެންދެއެވެ. އެގޮތުން ކޮޅަށް ހުންނަ މީހާ އިށީނުމުން އޭނާގެ ހަށިގަނޑަށް އަންނަ ބަދަލާއެކު އޭނާގެ ރުޅިގަނޑުވެސް މަޑުވެގެން ދެއެވެ. އެވަރުންވެސް ރުޅި ފިލައި ނުގޮސްފިނަމަ އޭނާ އޮށޯތުމަށްވަނީ އަމުރު ކުރައްވާފައެވެ. 

ބައެއް ބަސްފުޅުތަކުގައިވާ ގޮތުން، ރުޅިއެރުމަކީ ޝައިޠާނާގެ ކިބައިން އަންނަ ކަމެކެވެ. ޝައިޠާނައަކީ ޖިންނީންގެ ތެރެއިންވާ އެއްޗެކެވެ. ޖިންނީން ޚަލްޤު ކުރެއްވުނީ އަލިފާނުންނެވެ. ފެނަކީ އަލިފާން ނިއްވައިލާ އެއްޗެކެވެ. ވީމާ، ރުޅި އައުމުން ވުޟޫކުރާހުށިކަމެވެ. މިފަދައިން އައިސްފައިވާ ޙަދީޘްއަކީ ޟަޢީފު، ޞައްޙަ ނޫން ޙަދިޘެއް ކަމަށް ޢިލްމުވެރިން ބުނެއެވެ. ނަމަވެސް މި ބަސްފުޅުގައިވާ ގޮތަށް ޢަމަލު ކުރުމަށްވެސް ބައެއް ދަންނަ ބޭކަލުން އިރުޝާދު ދެއްވައެވެ.

ދަރިފުޅުގެ ރުޅިވެރިކަމުގެ އަސްލު ސަބަބުތައް ދެނެގަނެ، މި ސްޓްރެޓެޖީތައް ތަންފީޒުކޮށްގެން، ދަރިފުޅުގެ ޖަޒުބާތުތައް މެނޭޖްކުރުމަށް އެހީތެރިވެދެވިދާނެ އެވެ. މި ޕްރޮސެސްގައި ކެތްތެރިކަމާއި ސާބިތުވެ ހުރުން ވަރަށް މުހިންމެވެ.