ބީއެމްއެމް މެދުވެރިކޮށް ރާއްޖެއިން ބޭރުގެ މުއާމަލާތް ކުރެވޭ ލިމިޓްތަކަށް ގެނެވުނު ބަދަލުތައް އަލުން އަނބުރާ ގެންގޮސްފިއެވެ. 

ބީއެމްއެލް އިން ދާދި ދެންމެ ފޮނުވި ނޯޓިސް އެއްގަައި ބުނީ މި ނިންމުން ބޭންކުން ނިންމާފައިވަނީ މަރުކަޒީ ބޭންކްގެވެސް އިރުޝާދުގެ މަތިން ކަމަށެވެ.

ބީއެމްއެލުން މިއަދު ވަނީ ރުފިޔާ އެކައުންޓްތަކަށް ދޫކޮށްފައިވާ ވިސާ ޑެބިޓް ކާޑުތަކުން ޑޮލަރުގެ މުއާމަލާތްތައް ނުކުރެވޭގޮތަށް ހަދާފައެވެ.

ބޭންކް އޮފް މޯލްޑިވްސް އިން މީގެ ކުޑައިރުކޮޅެއްކުރިން ބޭއްވި އެ ބޭންކުގެ ބޯޑު ބައްދަލުވުމަކަށްފަހު ބީއެމްއެލުން ވަނީ ރުފިޔާ އެކައުންޓަށް ދޫކޮށްފައިވާ ވިސާ ޑެބިޓްކާޑަށް ބޭރުފައިސާގެ މުއާމަލާތްތައް ނުކުރެވޭގޮތަށް ނިންމި ނިންމުން އަނބުރާ ގެންގޮސްފައެވެ. ބީއެމްއެލުން ބުނީ މި ބަދަލުގެނައީ، ބޭންކްތަކުގެ ރެގިއުލޭޓްކުރާ ފަރާތްކަމަށްވާ، މޯލްޑިވްސް މަނިޓަރީ އޮތޯރިޓީ، އެމްއެމްއޭގެ އިރުޝާދުގެވެސް ދަށުން ކަމަށެވެ.

ޤައުމީ ބޭންކުން މިއަދު ވަނީ އެ ބޭންކުގެ ކަސްޓަމަރުންނަށް ދޫކޮށްފައިވާ ވިސާ ޑެބިޓް ކާޑު ބޭނުންކޮށްގެން ޑޮލަރުން ކުރެވޭ މުއާމަލާތްތައް ވަގުތީ ގޮތުން މެދުކަނޑާލާފައެވެ. ބީއެމްއެލުން ގެނައި ބަދަލާގުޅިގެން އޭރު ނިންމި ނިންމުމަށް ބަލާއިރު، ވިސާ ޑެބިޓް ކާޑު ބޭނުންކޮށްގެން ރާއްޖެއިން ބޭރުގެ އެއްވެސް ތަނަކަށް ފައިސާއެއް ނުދެއްކޭނެއެވެ. ހަމަ އެހެންމެ ރާއްޖެއިން ބޭރުގެ އެއްވެސް ޕީއޯއެސް އަދި އޭޓީއެމަކުންވެސް ފައިސާ ނެގުމުގެ ހިދުމަތެއް ނުލިބޭނެއެވެ.

ވިސާ ޑެބިޓް ކާޑުގެ އިތުރުން ބީއެމްއެލުން ވަނީ ކްރެޑިޓް ކާޑުން ކުރެވޭ ބޭރުގެ މުއާމަލާތްތަކަށްވެސް ބަދަލުގެނެސްފައެވެ. ކުރިން ނިންމިގޮތުން ކްރެޑިޓް ކާޑްތައް ބޭނުންކޮށްގެން މަހެއްގެ މައްޗަށް މުއާމަލާތްކުރެވޭނީ 100 ޑޮލަރަށް ވާވަރަށެވެ. ކްރެޑިޓް ކާޑު ބޭނުންކޮށްގެން ބޭރުފައިސާއިން ކުރެވޭ މުއާމަލާތްތަކަށް ހިފެހެއްޓުމެއް ގެންގުޅުނު ނަމަވެސް، ރާއްޖޭގައި ކުރެވޭ ދިވެހިފައިސާގެ މުއާމަލާތްތަކަށް ކުރިއެކޭ އެއްގޮތަށް ކުރެވެއެވެ. 

ބީއެމްއެލްގެ ނިންމުން ބަދަލުކޮށްފައިވަނީ ރައްޔިތުން ކަންބޮޑުވުން ފާޅުކުރަން ފެށުމުން ބީއެމްއެލްގެ ބޮޑު ހިއްސާދާރުގެ ހައިސިއްޔަތުން ސަރުކާރުން އިސްނަގައިގެން ކުރި މަސައްކަތުންނެވެ.