ފެނަކަ ކޯޕަރޭޝަން ލިމިޑެޓް، (ފެނަކަ) އަކީ ފައިދާވާ ކުންފުންޏަކަށް ހަދާނެ ކަމުގެ ޔަގީންކަން އެސްޓީއޯއިން ދީފިއެވެ.

އެސްޓީއޯގެ ސަބްސިޑަރީ ކުންފުންޏަކަށް ފެނަކަ ބަދަލުކުރުމާ ގުޅޭ ގޮތުން އެސްޓީއޯއިން މިއަދު ކުރި އިއުލާނެއްގައި ބުނެފައި ވަނީ ފެނަކަ އެ ކުންފުނީގެ ދަށަށް ބަދަލު ކުރަނީ އެސްޓީއޯއިން ސަރުކާރަށް ހުށަހެޅި ޕްރޮޕޯސަލްއަކަށް ބިނާކޮށް، މިދިޔަ އާދީއްތަ ދުވަހު ކެބިނެޓުން ނިންމައިގެން ކަމަށެވެ.

"އެސްޓީއޯއިން ސަރުކާރަށް 2024 އޮގަސްޓް 25 ވަނަ ދުވަހު ޕްރޮޕޯސަލެއް ހުށަހެޅުނެވެ. މި ޕްރޮޕޯސަލް ގަބޫލުކޮށް، ފެނަކައަކީ އެސްޓީއޯގެ 100 އިންސައްތަ ހިއްސާވާ ކުންފުންޏަކަށް ބަދަލުކުރުމަށް، 2024 އޮގަސްޓް 25 ވަނަ ދުވަހު ސަރުކާރުން ވަނީ ނިންމާފައެވެ،" އެސްޓީއޯއިން ބުންޏެވެ. 

މިއާއެކު އެސްޓީއޯ އިން ބުނީ ސަރުކާރުގެ އެ ނިންމުމާ އެކު، އަންނަ އަހަރުން ފެށިގެން ފެނަކައަކީ އެސްޓީއޯގެ ސަބްސިޑަރީއަކަށް ބަދަލު ކުރުމަށް އިއްޔެ ބޭއްވި އެސްޓީއޯގެ ބޯޑު ބައްދަލުވުމުގައި ނިންމާފައިވާ ކަމަށާ އެ މަސައްކަތް ކުރުމަށް ފެނަކަ އާއި ފިނޭންސް މިނިސްޓްރީ ގުޅިގެން ޕްލޭނެއް އެކުލަވާލުމަށް ނިންމާފައިވާ ކަމަށެވެ. 

އެ ޕްލޭންގެ ދަށުން މިނިވަން އޮޑިޓު ފާމެއް މެދުވެރިކޮށް ފެނަކައިގެ ހާލަތު ދެނެގަތުމަށް ފައިނޭންޝަލް އަދިި ލީގަލް ޑިއު ޑެލިޖެންސް ހަދާނެ ކަމަށާ، ފެނަކައިގެ ހަރުމުދާ އަގުކޮށް މާލީ ހާލަތު ދެނެގަންނާނެ ކަމަށް އެސްޓީއޯއިން ބުނެފައިވެއެވެ. އަދި ހަމަ އެއާއެކު ފެނަކަ ރަނގަޅު މިންވަރަކަށް ބަދަލުކޮށް، ހިންގުން ހަރުދަނާކުރުމަށް ފިނޭންސް މިނިސްޓްރީއާ އެކު މަސައްކަތް ކުރާނެ ކަމަށްވެސް ބުނެފައިވެއެވެ. 

އެސްޓީއޯއިން އިތުރަށް ބުނީ ފެނަކައިގެ އިންޓަރިމް ބޯޑު އެކުލަވާލުމަށް ހަމަޖެހިފައި ވަނީ އެސްޓީއޯ އާއި ފިނޭންސް މިނިސްޓްރީ އާއި އެންވާރަމަންޓް މިނިސްޓްރީ ތަމްސީލު ކުރާ ފަރާތްތައް ހިމެނޭ ގޮތަށް ކަމަށެވެ.

އަދި އެސްޓީއޯގެ ދަށަށް ފެނަކަ މުޅިން ބަދަލުކުރެވުމާ އެކު، އެ ކުންފުނީގެ ޑިރެކްޓަރުންގެ ބޯޑު ދެން އެކުލަވާލާނީ އެސްޓީއޯގެ ގަވަރނަންސް ކޯޑާއި ސަބްސިޑަރީތަކަށް މެންބަރުން އައްޔަން ކުރާ އުސޫލާ އެއްގޮތަށް ކަމަށްވެސް ބުންޏެވެ.

އެސްޓީއޯއިން ބުނެފައިވާ ގޮތުން ފެނަކައިގެ ދަރަނީގެ ބޮޑު ބަޔަކީ އެސްޓީއޯ ގްރޫޕަށް ދައްކަންޖެހޭ ފައިސާ ކަމަށާ އެއީ އެސްޓީއޯއިން ގަނެފައިވާ ތެލަށް އެ ކުންފުނިން ދައްކަންޖެހޭ ފައިސާ ދަރަނީގެ ތެރޭގައި ހިމެނޭތީއެވެ. 

"މި ފައިސާ އެސްޓީއޯ ގްރޫޕަށް ލިބޭނެ ގޮތުގެ ޕްލޭނެއް ހެދި އެ އާއި އެއްގޮތަށް ފައިސާ ހޯދުމަށް މަސައްކަތްކޮށް ފެނަކައަކި ފައިދާވާނެ ކުންފުންޏަކަށް ހެދުމަށް އެސްޓީއޯއިން މަސައްކަތް ކުރާނެކަމުގެ ޔަގީންކަން މި ކުންފުނީގެ އެންމެހާ ހިއްސާދާރުންނާއި އެހެނިގެން ސްޓޭކް ހޯލްޑަރުންނަށް އަރުވަމެވެ،" އެސްޓީއޯއިން ބުންޏެވެ.