ޖަޕާނުގެ ވެރިރަށް ޓޯކިޔޯއިން ގައުމުގެ އެހެން ސަރަހައްދުތަކަށް ބަދަލުވެ ކައިވެނިކުރާ އަންހެނުންނަށް މާލީ އެހީތެރިކަމެއް ފޯރުކޮށްދިނުމަށް ޖަޕާނު ސަރުކާރުން ވަނީ ނިންމައިފައެވެ. މި އައު ސިޔާސަތުގެ މައިގަނޑު މަޤްޞަދަކީ އެގައުމުގެ އެކި ސަރަހައްދުތަކުގައި ހުރި އާބާދީގެ ފަރަގު ކުޑަކުރުމާއި، ޤައުމުގެ ޖުމްލަ އުފަންވުމުގެ ރޭޓު މަތިކުރުމެވެ.

ޓޯކިޔޯގައި ވަޒީފާ އަދާކުރުމަށާއި މަތީ ތަޢުލީމު ހާސިލުކުރުމަށް ދިރިއުޅެމުންދާ އެކަނިވެރި އަންހެނުން، އެހެން ޑިސްޓްރިކްޓްތަކަށް ބަދަލުވެ ކައިވެނިކުރުމަށް ހިތްވަރުދިނުމުގެ ގޮތުން، އެފަދަ އަންހެނުންނަށް 7،000 ޑޮލަރާ ހަމައަށް މާލީ އެހީތެރިކަން ފޯރުކޮށްދޭން ވަނީ ނިންމާފައެވެ. މި އަދަދަކީ ގާތްގަނޑަކަށް 770،000 ޖަޕާނީ ޔެން އެވެ. މި އެހީތެރިކަމުގެ ތެރޭގައި ބަދަލުވުމުގެ ޚަރަދުތަކާއި، އައު ދިރިއުޅުމެއް ފެށުމަށް ބޭނުންވާ އަސާސީ ތަކެތި ހޯދުމަށް އެހީތެރިވުން ހިމެނެއެވެ.

މީގެ އިތުރުން، ކައިވެންޏަށް ބޭނުންވާ ފިރިހެނުން ހޯދުމަށް ކުރާ ދަތުރުތަކުގެ ޚަރަދުތައްވެސް ސަރުކާރުން ދޭން ނިންމާފައިވެއެވެ. މިއީ "އޮމިއައި" ނުވަތަ "އަނބިންނާ ބައްދަލުކުރުމުގެ ދަތުރުތައް" ކަމަށް ޖަޕާނުގައި ކިޔާ ޕްރޮގްރާމްތަކުގެ ބައެކެވެ. މި ޕްރޮގްރާމްތަކުގެ ދަށުން އެކަނިވެރި ފިރިހެނުންނަށް އެހެން ސަރަހައްދުތަކަށް ގޮސް، އެތަންތަނުގައި ތިބޭ އެކަނިވެރި އަންހެނުންނާ ބައްދަލުކޮށް، ކައިވެނީގެ ފުރުސަތުތައް ހޯދުމަށް މަގުފަހިކޮށްދެއެވެ.

މި ފިޔަވަޅުތަކަކީ ޖަޕާނުގައި ކުރިމަތިވެފައިވާ އާބާދީގެ ނާޒުކު މައްސަލަތަކަށް ހައްލެއް ހޯދުމަށް އަޅާ މުހިންމު ފިޔަވަޅުތަކެކެވެ. 2020 ވަނަ އަހަރުގެ ބޯހިމެނުމުގެ ހިސާބުތަކުން ދައްކާގޮތުގައި، ޓޯކިޔޯ ފިޔަވައި ޖަޕާނުގެ 47 ޑިސްޓްރިކްޓުގެ ތެރެއިން 46 ޑިސްޓްރިކްޓެއްގައި 15 އަހަރާއި 49 އަހަރާ ދެމެދުގެ އެކަނިވެރި އަންހެނުންގެ އަދަދު 9.1 މިލިއަނަށް އަރާއިރު، އެ އަދަދަކީ އެކަނިވެރި ފިރިހެނުންގެ އަދަދަށްވުރެ 11.1 މިލިއަން ނުވަތަ 20% އަށްވުރެ ދަށް އަދަދެކެވެ. ބައެއް ސަރަހައްދުތަކުގައި މި ތަފާތު 30% އާ ހަމައަށް އަރައެވެ.

ޖަޕާނުގެ އާދަކާދައިގައި ހިމެނޭ އެންމެ ޚާއްޞަ އެއް ސިފައަކީ މީހުންނަށް އިޙްތިރާމް ކުރުން ---

ދަށްވަމުންދާ އުފަންވުމުގެ ރޭޓާއި، ދުވަހެއް ދުވަހަކަށް މަދުވަމުންދާ މަސައްކަތްތެރިންގެ އަދަދާ ގުޅިގެން ކުރިމަތިވެފައިވާ އިޤްތިޞާދީ ގޮންޖެހުންތަކަށް ހައްލު ހޯދުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރަމުންނެވެ. 2023 ވަނަ އަހަރު ޖަޕާނުގައި އުފަންވި ކުދިންގެ އަދަދު ވަނީ 727،277 އަށް ދަށްވެފައެވެ. މިއީ އެ ޤައުމުގެ ތާރީޚުގައި ރެކޯޑު ކުރެވުނު އެންމެ ދަށް އަދަދެވެ. އަދި ދަރިމައިވުމުގެ ރޭޓު ވަނީ 1.20% އަށް ދަށްވެފައެވެ.

މިކަމާ ގުޅިގެން ސަރުކާރުން ވަނީ އިތުރު ފިޔަވަޅުތަކެއްވެސް އަޅާފައެވެ. އޭގެ ތެރޭގައި ދަރިން ހޯދާ ދެމަފިރިންނަށް މާލީ އެހީތެރިކަން ފޯރުކޮށްދިނުމާއި، ކުޑަކުދިން ބަލަހައްޓާ މަރުކަޒުތައް އިތުރުކުރުމާއި، އަދި ޓޯކިޔޯގައި ދައުލަތުގެ ރުހުން ލިބިފައިވާ ޑޭޓިންގ އެޕްލިކޭޝަނެއް ތަޢާރަފުކުރުން ހިމެނެއެވެ. މި އެޕްލިކޭޝަންގައި އާޓިފިޝަލް އިންޓެލިޖެންސް ބޭނުންކޮށްގެން، އެކަނިވެރި ފަރުދުންނަށް އެކަށޭނަ ޕާޓްނަރުން ހޯދައިދިނުމަށް މަސައްކަތް ކުރެވެއެވެ.

ޖަޕާނު ސަރުކާރުގެ މި އައު ސިޔާސަތަކީ ގައުމުގެ އާބާދީގެ ބަދަލުތަކަށް އަމާޒުކޮށްގެން އެޅޭ ވަރަށް މުހިންމު ފިޔަވަޅެކެވެ. މި ސިޔާސަތުގެ ސަބަބުން ގިނަ އަދަދެއްގެ އަންހެނުން ޓޯކިޔޯއިން އެހެން ސަރަހައްދުތަކަށް ބަދަލުވެ، އާބާދީގެ ތަފާތުވުން ކުޑަކުރުމަށް މަގުފަހިވާނެކަމަށް އުންމީދު ކުރެވެއެވެ. އަދި މިކަމުގެ ސަބަބުން ޖަޕާނުގެ އުފަންވުމުގެ ރޭޓު މަތިވެ، މުސްކުޅިވަމުންދާ އާބާދީގެ ގޮންޖެހުމަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށްވެސް ބެލެވެއެވެ.