ރޭ މާލޭގައި އަންހެނަކު ރަހީނުކުރި ފިރިހެންމީހާ ހައްޔަރު ކުރުމުގައި ފުލުހުން ބާރުގެ ބޭނުން ކުރި ގޮތުގެ އެތެރޭގެ ތަހުގީގެއް ނުހިންގާނެ ކަމަށް ހޯމް މިނިސްޓަރ އަލީ އިޙްސާން ވިދާޅުވެއްޖެއެވެ.

ރޭ މާލޭގެ ގެއެއްގައި އަންހެނަކު ރަހީނުކޮށްގެން ގެންގުޅެ، އޭނާގެ ކަރުގައި ވަޅި ޖައްސައިގެން މަގުމައްޗަށް ނެރުނު ފިރިހެނަކު ހައްޔަރުކޮށް، އަންހެން މީހާ ސަލާމަތްކުރުމަށް ފުލުހުން އަމަލުކުރި ގޮތުގެ އެތެރޭގެ ތަހުގީގެއް ފުލުހުން ހިންގަން ފަށައިފި ކަމަށާއި، މި ތަހުގީގު ހިންގުމަށް ފުލުހުންގެ ކޮމިޝަނަރަށް އެންގެވީ ހޯމް މިނިސްޓަރު ކަމަށް ނޫހަކުން ރިޕޯޓުކޮށްފައިވެއެވެ.

ނަމަވެސް، މި ޚަބަރާއޖި ގުޅިގެން އެކްސް ގައި ކުރެއްވި ޕޯސްޓެއްގައި ހޯމް މިނިސްޓަރ އިޙްސާން ވިދާޅުވެފައިވަނީ އެފަދަ ތަހުގީގެއް ހިންގުމަށް އަންގާފައި ނުވާނެ ކަމަށެވެ.

Advertisement

އިހްސާން ވިދާޅުވީ ފުލުހުން ކުރެއްވީ ވަރަށް ބުރަ މަސައްކަތެއް ކަމަށާއި، އެ މަސައްކަތުގެ ސަބަބުން ރަހީނުކޮށްފައިވާ އަންހެން ކުއްޖަކު ސަލާމަތްކުރެވުނު ކަމަށެވެ.

”އެކަމަށްޓަކައި ފުލުހުންނަށް ސާބަސް ދަންނަވަން. ފުލުހުން ބާރުގެ ބޭނުންކުރި ގޮތުގެ ތަހުގީގެއް ކުރަން އަންގާފައި ނުވާނެ“ އިޙްސާން ވިދާޅުވިއެވެ.

މި ހާދިސާގައި ފުރަތަމަ އަންހެން މީހާ ގޮވައިގެން ފިލަން މަސައްކަތްކުރި ފިރިހެނާ، އަންހެން މީހާގެ ކަރުގައި ވަޅި ޖައްސައިގެން ސައިކަލަކަށް އަރުވައި، ސައިކަލު ދުއްވަން އަންހެން މީހާއަށް މަޖުބޫރުކުރުވިއެވެ. ނަމަވެސް، އެ ސަރަހައްދުން އޭނާ ދިޔުމުގެ ކުރިން ފުލުހުން ވަނީ ސައިކަލުގެ ފަހަތުގައި ފިރިހެން މީހާ އިންދާ ބާރުގެ ބޭނުން ކޮށްގެން އޭނާ ބިންމައްޗަށް ވައްޓާލައިފައެވެ.

މި މައްސަލާގައި ރަހީނު ކުރެވުނު އަންހެން މީހާއަށް އައިޖީއެމްއެޗްގައި ފަރުވާ ދެމުންދާއިރު، އޭނާގެ ހާލު ރަނގަޅު ކަމަށާ، އަދި ފިރިހެން މީހާގެވެސް ހާލު ރަނގަޅު ކަމަށް ފުލުހުން މައުލޫމާތު ދެއެވެ.