ބާރު ސްޕީޑުގައި ދުއްވާފައި ދިޔަ ކާރަކާއި ސައިކަލެއްޖެހި ރޭ ހިނގި އެކްސިޑެންޓުގައި ޒުވާނަކު ވަނީ ދުނިޔެ ދޫކޮށްފައެވެ. މި އެކްސިޑެންޓުގައި ލ. އިސްދޫއަށް އުފަން، އުމުރުން 23 އަހަރުގެ ހަސަން ސަމާހު ނިޔާވެފައިވަނީ، މެރަތަންގައި ބައިވެރިވާ މީހުން މެރަތަން އޮންނަ ސަރަހައްދަށް ގެންގޮސްދިނުމުގަ އި އުޅެނިކޮށް ކަމަށް މައުލޫމާތު ލިބެއެވެ. 

އެގޮތުން، ރޭ މެންދަމު ގާތްގަނޑަކަށް 02:48 ހާއިރު ރޭސް ކާރުން އެ ޒުވާނާ އިން ސައިކަލުގައި ޖެހި އެކްސިޑެންޓް ވުމާއެކު، ފަރުވާއަށް ހޮސްޕިޓަލަށް ގެންގޮފައިވާއިރު، ހޮސްޕިޓަލަށް ގެންދިޔަތާ މާ ގިނައިރެއް ނުވެ ޒުވާނާވަނީ ނިޔާވެފައެވެ. 

އެކްސިޑެންޓްވި ސަރަހައްދުގައި ސަމާހު ދުއްވަން އިން ސައިކަލުގެ ބައިތައް ހުރީ އެކި ދިމަދިމާއަށް ގޮސްފައެވެ. ސަރަހައްދުގައި ގިނަ އަދަދަކަށް ލޭވެސް  ހުއްޓެވެ. 

ފުލުހުން ބުނެފައިވާގޮތުން، މި އެކްސިޑެންޓާއި ގުޅިގެން މީހަކު ހައްޔަރުކޮށްފައިވާއިރު، އެގޮތުން، ހައްޔަރު ކޮށްފައި ވަނީ އައްޑޫ ސިޓީ ހިތަދޫ، ވައިލެޓްފިހި، އުމުރުން 26 އަހަރުގެ މުޙައްމަދު ވިސާމް ސިދުގީއެވެ.

މިއީ މި ފަހަކަށް އައިސް ރޭސް ކާރަކުން ޖެހި އެކްސިޑެންޓެއް ހިނގި ދެވަނަ ފަހަރެވެ. މީގެ ކުރިން ހިނގި އެކްސިޑެންޓްގައިވެސް ޒުވާނަކަށް ބޮޑެތި އަނިޔާވެފައިވާއިރު، މި އެކްސިޑެންޓްގައި ޒުވާނަކު ނިޔާވުމާއެކު ރޭސް ކާރު މަނާ ކުރުމަށް އާއްމުން ގޮވާލާ އަޑުތައް މިހާރު ވަނީ ގަދަވެފައެވެ.

އެގޮތުން މޯލްޑިވިއަންގެ ކުރީގެ އެމްޑީ އައިޝަތު ޖެނިފާ އެކްސްގައި ކުރި ޕޯސްޓެއްގައި ވަނީ މާލެއާއި ހުޅުމާލޭގައިވެސް ބާރު ސްޕީޑްގައި ދުއްވުމުގެ ޖާގަނެތް ކަމަށެވެ. 

މި ހާދިސާއާ ގުޅިގެން އެހެން މީހަކު ކޮށްފައިވާ ޕޯސްޓެއްގައި ބުނެފައިވާ ގޮތުން މިއީ ހަމައެކަނި "ސްޕޯޓްސް ކާރު" ނުވަތަ ރޭސިން އާ ގުޅުންހުރި މައްސަލައެއް ނޫން ކަމަށެވެ.

"ކޮންމެ އުޅަނދެއްގައި ވެސް ބާރަށް ދުއްވުމަކީ ނުރައްކާތެރި ކަމެއް، އެކަމަކު ރޭސިން އަކީ އެއަށްވުރެ ބޮޑު ކަންބޮޑުވުމެއް، އެއީ އެމައްސަލަ ގިނައިން ފެންމަތިވާތީ" މީހަކު ބުނެފައިވެއެވެ.

އެހެން މީހަކު ކުރި ޕޯސްޓެއްގައި އޭނާވަނީ ބާރަށް ދުއްވާ މީހުންނަށް ފިޔަވަޅު އެޅުމަށް ޤާނޫނުތައް އިސްލާހު ކުރުމަށް ގޮވާލާފައެވެ.

މީގެ އިތުރުންވެސް މީހަކު ވަނީ މިފަދަ ނުރައްކާތެރި ސަރަޙައްދުތައް ދެނެގަތުމަށްޓަކައި ރަނގަޅު ރިސްކް އެސެސްމަންޓެއް ހަދަންޖެހޭ ކަމަށެވެ. އަދި އޭގެ ފަހުން އެކަށީގެންވާ ކޮންޓްރޯލް ފިޔަވަޅުތައް އަޅަންޖެހޭ ކަމަށްވެސް ބުންޏެވެ.

މި އެކްސިޑެންޓާއި ގުޅިގެން ރޭސް ކާރުތައް ޙާއްސަ ހުއްދައެއްގެ ދަށުން ނޫނީ އެތެރެވިޔަ ނުދިނުމަށްވެސް ބަޔަކު ވަނީ ގޮވާލާފައެވެ. 

މި ނޫންވެސް އެތައް ބަޔަކު، ސްޕޯޓްސް ކާރު ދުއްވުން މަނާ ކުރުމަށް ގޮވަމުންދާއިރު، އެކަމާއި ގުޅިގެން ރައީސް ޑރ މުހައްމަދު މުޢިއްޒު މިއަދު އެކްސްގައި ކުރެއްވި ޕޯސްޓެއްގައި ވަނީ، ނުރައްކާތެރިކޮށް އަދި ބާރަށް ދުއްވާ ފަރާތްތަކާ މެދު ހަރުކަށި ފިޔަވަޅު އެޅުމަށްޓަކައި ގާނޫނަށް ބަދަލު ގެނެސް، އެކަން ތަންފީޒު ކުރައްވާނެ ކަމަށް ވިދާޅުވެފައެވެ. 

ރައީސް ވިދާޅުވި ގޮތުގައި، ނުރައްކާތެރިކޮށް ބާރު ސްޕީޑުގައި ދުއްވާ ދުއްވުންތައް ހުއްޓުވައި، މާލެއާއި ރާއްޖޭގެ އެހެނިހެން ރަށްރަށުގެ މަގުތަކަކީ އެންމެންނަށްވެސް އަމާންކަމާއެކު ބޭނުންކުރެވޭނެ ތަންތަންކަމުގައި ހެދުމަށްޓަކާ ސަރުކާރުން ކުރަންޖެހޭ އެންމެހާ ކަންކަން މިސަރުކާރުން ކުރާނެއެވެ.

”މިގޮތުން ރާއްޖޭގެ އެއްވެސް ރަށެއްގައި، އެއްވެސް ވަގުތަކު ބާރު ސްޕީޑުގައި ވެހިކަލް ދުއްވާ ފަރާތްތަކާމެދު ހަރުކަށި ފިޔަވަޅުތައް އެޅުމަށް ޤާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސް، އެކަންކަން ތަންފީޒުކުރަން ފަށަން ސަރުކާރުގެ ކަމާގުޅުންހުރި އިދާރާތަކަށް މިހާރުވާނީ އަންގާފައި.“ ރައީސް މުޢިއްޒު ވިދާޅުވިއެވެ.