ޔޫތް މިނިސްޓްރީގެ ޑެޕިޔުޓީ މިނިސްޓަރު ކަމުގެ މަގާމުން މަރްޔަމް ޝިއުނާ އާއި މަލްޝާ ޝަރީފް އިސްތިއުފާ ދެއްވައިފިއެވެ.

ޝިއުނާ އާއި މަލްޝާ މަގާމުން އިސްތިއުފާ ދެއްވާފައިވަނީ މިއަދުގެ ވަގުތެއްގައެވެ. މިކަން ޝިއުނާއާއި މަލްޝާ ވަނީ ”ވޮއިސް“ އަށް ކަށަވަރު ކޮށްދެއްވާފައެވެ. 

އިންޑިއާގެ ބޮޑުވަޒީރު ނަރެންދުރަ މޯދީއަށް މަލާމާތްކޮށް ސޯޝަލް މީޑިއާ ޕްލެޓްފޯމްގައި ވާހަކަ ދައްކަވާފައިވާތީ ޔޫތު މިނިސްޓްރީގެ ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދު މަގާމުން ސަސްޕެންޑުކުރީ މި އަހަރުގެ ޖަނަވަރީ މަހުގެ ކުރީކޮޅުގައެވެ. 

އެވާހަކަ ތަކާއި ގުޅިގެން އިންޑިޔާގެ ގިނަ ބައެއްގެ ނުރުހުން ރާއްޖެއަށާ ސަރުކާރަށް އަމާޒުވެގެން ދިޔައެވެ. 

އަދި ރާއްޖެއާއި އިންޑިޔާގެ ގުޅުން ހީނަރުވެފައިވާ ކަމުގެ އަޑުތައްވެސް ފެތުރި އިންޑިޔާ ފަތުރުވެރިން ރާއްޖެ އަންނަ ނިސްބަތް ބޮޑުތަނުން ދަށްވިއެވެ. 

ނަމަވެސް، މިފަހުން ދެގައުމުގެ ގުޅުން ރަނގަޅުވެ، ރައީސް ޑރ މުހައްމަދު މުއިއްޒު މޯދީ ހުވައި ކުރުމުގެވރަސްމިއްޔާތަށް އިންޑިޔާއަށްވެސް ވަޑައިގެންނެވިއެވެ. އަދި އެ ގައުމުގެ މިނިސްޓަރ އޮފް އެކްސްޓާނަލް އެފެއާޒް ޖެއިންޝަންކަރ ރާއްޖެ ވަޑައިގެންފައިވެއެވެ.