ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) ހޯމް މިނިސްޓްރީގެ ދަށަށް ބަދަލުކުރަން ނިންމި ނިންމުމަށް ސިޓީ ތަކާއި އިދާރީ ދާއިރާތައް ހިންގުމާ ބެހޭ ވުޒާރާގެ ވަޒީރު އާދަމް ޝަރީފް އުމަރު މަރުހަބާ ދަންނަވައިފިއެވެ.

މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ ދަށުން ހިނގަމުންއައި ކޮމިއުނިކޭޝަންސް އޮތޯރިޓީ އޮފް މޯލްޑިވްސްއަކީ އިއްޔެއިން ފެށިގެން މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ދަށުން ހިނގަމުންދާ ތަނެއްގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ހަމަޖައްސަވައިފައެވެ.

މިކަމާއި ގުޅިގެން މިނިސްޓަރ ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ކޭމްގެ މުވައްޒަފުންނާއި މައިގަނޑު ޕާޓްނަރުންކަމުގައިވާ ދިރާގު، އޫރީދޫ، އާރްއޯއެލް، ސެޓްލިންކް އަދި ސްޓާލިންކްއާ އެކު މަސައްކަތްކުރުމަކީ ވަރަށް އުފެއްދުންތެރި އަދި މުހިންމު މަޢުލޫމާތު ލިބިލެއްވި ތަޖުރިބާއެއް ކަމަށެވެ.

Advertisement

އަދި ޓެލެކޮމް ޕާޓްނަރުންނާއެކު ޤައުމީ އަދި ބައިނަލްއަޤްވާމީ ފެންވަރުގައި ޚިދުމަތްތައް ފުޅާކޮށް ރަނގަޅުކުރުމަށް ވަރަށް އުފެއްދުންތެރި ބައްދަލުވުންތަކާއި މަސައްކަތު ބައްދަލުވުންތައް ބޭއްވިފައިވާ ކަމަށްވެސް ވިދާޅުވިއެވެ.

މީގެ އިތުރުން، އޫރީދޫގެ ޕީސް ކޭބަލް އިފްތިތާހުކުރުމާއި ދިރާގުގެ އެސްއީ-ޑަބްލިޔު-އީ-އެމްްއީ ސަބްމެރިން ކޭބަލް އިފްތިތާހުކުރުމުގެ ރަސްމިއްޔާތުތަކުގައި ބައިވެރިވެވަޑައިގަތް ކަމަށްވެސް މިނިސްޓަރ ޝަރީފް ވިދާޅުވިއެވެ.

އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ދިވެހިރާއްޖޭގައި ފުރަތަމަ ފަހަރަށް ބަރަހަނާ ސައިޓްތައް ބްލޮކްކުރުމުގެ ތާރީޚީ ނިންމުން ކޭމްއިން ނިންމާފައިވާ ކަމަށްވެސް ފާހަގަކުރެއްވިއެވެ.

މިނިސްޓަރ ޝަރީފް އިތުރަށް ވިދާޅުވެފައިވަނީ ހޯމް މިނިސްޓަރ އަލީ އިހުސާނުގެ ޤާބިލު ލީޑަރޝިޕްގެ ދަށުން ކޭމްއިން ޤައުމަށް ޚިދުމަތްކުރުމުގެ ދުވެލި ދެމެހެއްޓޭނެ ކަމަށް ފުރިހަމައަށް އިތުބާރުކުރައްވާ ކަމަށެވެ. އަދި ކޭމްގެ މުސްތަޤްބަލުގެ މަސައްކަތްތަކުގައި ކާމިޔާބީ އެދިވަޑައިގަންނަވާ ކަމަށްވެސް ވިދާޅުވިއެވެ.

މިއާއެކު، މިނިސްޓަރ ޝަރީފް ވަނީ ކޭމް، ދިރާގު، އޫރީދޫ، އާރްއޯއެލް، ސެޓްލިންކް އަދި ސްޓާލިންކްއިން ވަޒީރަށާއި ސިޓީ ތަކާއި އިދާރީ ދާއިރާތައް ހިންގުމާ ބެހޭ ވުޒާރާގެ ޓީމަށް ދެއްވާފައިވާ އެހީތެރިކަމާއި އެއްބާރުލެއްވުމަށް ޝުކުރު އަދާކުރައްވާފައެވެ.