ސްރީލަންކާގެ ރިޔާސީ އިންތިހާބުގެ ވޯޓްލުން ފަށައިފިއެވެ.

މިއީ ސްރީލަންކާގެ އިޤްތިޞާދު ފުނޑުފުނޑުވެ، އޭގެ ސަބަބުން އާންމު ރައްޔިތުން މަގުމައްޗަށް ނުކުމެ އިހުތިޖާޖުކުރުމުން އޭރުގެ ރައީސް ގޮޓަބާޔާ ރާޖަޕަކްސާ ޤައުމުން ފިލައިގެން ދިޔުމަށްފަހު ބޭއްވޭ ފުރަތަމަ އިންތިޚާބެވެ.

ޖުމްލަ 38 ކެންޑިޑޭޓުން ވާދަކުރާ މި އިންތިހާބުގެ ވޯޓުލުން ފަށާފައިވަނީ އެގައުމުގެ ގަޑިން ހޮނިހިރު ދުވަހުގެ ހެނދުނު 7:00 ގައި އެވެ.

Advertisement

ގޮޓަބާޔާގެ ފަހުން ރައީސްކަމާ ހަވާލުވި ރަނިލް ވިކްރަމަސިން ވެސް މި އިންތިހާބުގައި ވާދަކުރައްވާއިރު، އައި.އެމް.އެފްގެ އެހީތެރިކަމާއެކު އިގްތިޞާދު ހަރުދަނާކުރުމަށް އަޅުއްވަމުންގެންދާ ޓެކްސް ބޮޑުކުރުން ފަދަ ފިޔަވަޅުތަކުގެ ސަބަބުން ވިކްރަމަސިންހައަށް އޮތް ތާއީދު ވަނީ ގެއްލިފައިވާތީ، އޭނާ އަށް މި އިންތިހާބު ކާމިޔާބު ނުކުރެވޭނެ ކަމަށް ގިނަ ބަޔަކު އަންނަނީ ބުނަމުންނެވެ.

ރަނިލް ވިކްރަމަސިންގެ އިތުރުން، މި އިންތިހާބުގައި ޖަނަތާ ވިމުކްތި ޕެރަމުނާ (ޖޭވީޕީ) ގެ ލީޑަރު އަނުރާ ކުމާރާ ދިސަނާޔަކޭ އާއި  1993 ގައި ހިނގި ހަނގުރާމައިގައި އަވަހާރަކޮށްލި ކުރީގެ ރައީސެއްގެ ދަރިއެއް ކަމަށްވާ ސަޖިތު ޕްރެމަދާސާ ވެސް ވާދަކުރައްވައެވެ.

ގާތްގަނޑަކަށް 17 މިލިއަން ސްރީލަންކާ މީހުންނަށް މިފަހަރުގެ އިންތިހާބުގައި ވޯޓުލުމުގެ ޙައްޤު ލިބިގެންވާއިރު، އެމީހުން ވޯޓު ކަރުދާހުގައި ތިން ކެންޑިޑޭޓަކު އިސްކަންދޭ ތަރުތީބުން ރޭންކް ކުރާނެއެވެ.

އިންތިހާބުގެ ވޯޓުލުން މެންދުރުފަހު 4:00 ގައި ނިމޭއިރު، އޭގެ ފަހުނ ގާތްގަނޑަކަށް 3 ގަޑިއިރާއި 30 މިނެޓު ފަހުން ވޯޓު ގުނަން ފެށޭނެ ކަމަށް ބެލެވެއެވެ. އަދި އިންތިހާބުގެ ނަތީޖާ އިޢުލާނުކުރެވޭނެ ކަމަށް ބެލެވެނީ އާދީއްތަ ދުވަހުއެވެ.