ސްރީލަންކާގެ އަރުގަމް ބޭ އަށް ހަމަލާއެއް ދީފާނެ ކަމަށް ބުނެ އެގައުމުގައި ހުންނަ އެމެރިކާގެ އެމްބަސީން އެލާޓެއް ނެރެފިއެވެ.
އަރުގަމް ބޭ އަކީ ސާފިންގ އަށް މަޝްހޫރު ސަރަހައްދަކަށްވާއިރު، އެމްބަސީގެ ވެބްސައިޓްގައި ޝާއިޢުކުރި ޕޯސްޓެއްގައި ބުނެފައިވަނީ ހަމަލާދީފާނެ ކަމަށް ބެލެވެނީ އަރުގަމް ބޭ ގެ ފަތުރުވެރިކަމަށް މަޝްހޫރު ސަރަހައްދުތަކަށް ކަމަށެވެ.
އެމްބަސީން ބުނީ، މި ނުރައްކަލާއި ގުޅިގެން އެމްބަސީގެ މުވައްޒަފުންނަށް ވަކި ގޮތަކަށް އަންގަންދެން އަރުގަމް ބޭ އަށް ދަތުރުކުރުން މަނާކޮށްފައިވާކަމަށެވެ. އަދި އެމްބަސީން އިތުރުގޮތަކަށް އަންގަންދެން، އަރުގަމް ބޭ ސަރަޙައްދަށް ނުދިޔުމަށް އެމެރިކާގެ ރައްޔިތުންނަށް ވެސް ވަނީ އިލްތިމާސްކޮށްފައެވެ.
މި އެންގުމުގައި އެމްބަސީން ވަނީ ޝައްކުކުރެވޭ ހުރިހާ ޙަރަކާތެއް ލޯކަލް އޮތޯރިޓީތަކަށް ރިޕޯޓުކުރުމަށާއި، މޯބައިލް ފޯނެއް ނުވަތަ އެހެން ބާވަތެއްގެ މުވާސަލާތީ ވަސީލަތެއް ވެސް ގާތުގައި ބެހެއްޓުމަށާއި، އަދި އަޕްޑޭޓްތަކަށް ލޯކަލް މީޑިއާ މޮނިޓަރކުރުމަށް އެދިފައެވެ.
އެމެރިކާގެ އެމްބަސީން މިފަދައިން ބުނި ނަމަވެސް، މި ނުރައްކަލުގެ ބާވަތާއި އަދި މަސްދަރާ ބެހޭގޮތުން އިތުރު މަޢުލޫމާތެއް ދީފައެއް ނުވެއެވެ.
ސްރީލަންކާއަށް މިފަހުން ބޮމުގެ ނުރައްކާތެރި ހަމަލާއެއް ދީފައިވަނީ 2019 ވަނަ އަހަރެވެ. އެފަހަރު ދިން އީސްޓަރ ބޮމުގެ ހަމަލާގައި 279 މީހުން މަރުވިއިރު މީގެ ތެރެއިން 45 މީހުންނަކީ އެހެން ޤައުމުތަކުގެ މީހުންނެވެ.
Advertisement
This content is created and paid for by advertisers and does not involve Voice Journalists
