ޓެކްސް އެޕީލް ޓްރައިބިއުނަލް އިން ހުސްވެފައިވާ 4 މެމްބަރަކު އައްޔަނުކުރުމަށް ރައްޔިތުންގެ މަޖިލީހުގެ ތަޅުމަށް ހުށަހެޅި ނަންތަކުގެ ތެރެއިން 4 ބޭފުޅެއްގެ ނަން ފާސްކޮށްފިއެވެ.
ތަޅުމަށް ހުށަހެޅި ނަންތައް ފާސްކޮށްފައިވަނީ މިއަދު ބޭއްވި މަޖިލީހުގެ ޖަލްސާގައެވެ.
ޓެކްސް އެޕީލް ޓްރައިބިއުނަލަށް އައްޔަނުކުރުމަށް މެޖިލީހުގެ ވޯޓުން ފާސްވި ނަންތައް:
1. އަބްދުލް ޣަނީ މުހައްމަދު
2. ހަސަން ޒުހައިރު މުހައްމަދު
3. އިބްރާޙިމް ޝަރީފް
4. ޝިފްޒާ އަބްދުލް ގައްޔޫމް
ޓެކްސް އެޕީލް ޓްރައިބިއުނަލްގެ ހަތަރު މެންބަރަކު މަގާމުން ވަކިކޮށްފައިވަނީ އޮގަސްޓްމަހުގެ 26 ވަނަ ދުވަހުއެވެ. އެ ހަތަރު މެމްބަރުންނަކީ، ރައީސްކަމުގެ މަގާމުގައި ހުންނެވި މުހައްމަދު މުނައްވަރު އަލީ، ނައިބުރައީސް ހުސައިން ޒައިދާން ޖަލީލް، މެމްބަރު އަހުމަދު އަޝްރަފް އަދި މެމްބަރު ހަދީޖާ ނައީމެވެ.
އެ ހަތަރު ބޭފުޅުން ވަކިކުރައްވާފައިވަނީ މަޖިލީހުން ލަފާދިނުމުން ރައީސުލްޖުމްހޫރިއްޔާއެވެ.
ޓެކްސް އެޕީލް ޓްރިބިއުނަލުގެ 4 މެމްބަރަކު މަޤާމުން ވަކިކުރުމަށްފަހު، މެމްބަރުން އައްޔަނުކުރުމަށް ހުޅުވާލާފައިވަނީ މިދިޔަ އޮގަސްޓްމަހުގެ ތެރޭގައެވެ. ހުޅުވާލި މުއްދަތުގެ ތެރޭގައި 13 ފަރާތަކުން ވަނީ ކުރިމަތިލާފައެވެ.
ޓެކްސް ނެގުމާ ބެހޭ އިދާރީ ގާނޫނުގައިވާ ގޮތުން ޓްރައިބިއުނަލަށް މެމްބަރުން އައްޔަންކޮށް ވަކިކުރަނީ ރައީސުލްޖުމްހޫރިއްޔާއެވެ.
Advertisement
This content is created and paid for by advertisers and does not involve Voice Journalists
