ރައްޔިތުންގެ ހައްގުގައި، ސިޓީތަކާއި އިދާރީ ދާއިރާތައް ހިންގުމާއިބެހޭ ވަޒީރު އާދަމް ޝަރީފަށް ސިޓީއެއް އަރުވަން ދިޔުމުން، ވަޒީރު ފިއްލަވާފައިވާ ކަމަށް މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާޙީމް ނާޒިލް ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި އޮތީ، އޭސީސީގެ ގާނޫނަށް އިސްލާހް ގެނެސް، އެ ކޮމިޝަނުގެ ރައީސާއި ނާއިބަކީ ރައީސުލްޖުމްހޫރިއްޔާ އައްޔަނުކުރާ މެންބަރުން ކަމުގައި ހަދާ ގޮތަށް ގާނޫނަށް އިސްލާހު ގެނައުމުގެ ބިލަށް ބަހުސް ކުރުމެވެ.
އެ ބިލަށް ބަހުސް ކުރައްވަމުން ނާޒިލް ވިދާޅުވީ، ފެހި ގާނޫނު އަސާސީ އެކުލަވައި ލެވުނުއިރު، އެންމެ ބޮޑަށް ދެކެވުނު އެއް ވާހަކައަކީ، ރައްޔިތުންނަށް ބާރުތަކެއް ކަށަވަރު ކޮށްދިނުމުގެ ވާހަކަ ކަމަށެވެ.
”މި ސަރުކާރު އައުމާއިއެކީގައި އަޅުގަނޑުމެންނަށް އެންމެ ފުރަތަމަވެސް ފެނުނީ ލާމަރުކަޒީ ގޮތުން ރާއްޖެ ހިންގަން ރައްޔިތުން ހަވާލުކޮށްފައިވާ ކައުންސިލްތަކުގެ ބާރު މުށުތެރެއަށް ލީތަން.“
އިއްޔެގައިވެސް ހިގައިދިޔަ ކަމަކީ، އެ ވުޒާރާގެ ވަޒީރަށް (ވަޒީރު އާދަމް ޝަރީފަށް) ސިޓީއެއް ހަވާލުކުރަން ގުޅާފައި، ދެންނެވީމާ އަވަހަށް ވަޑައިގަންނަވާށޭ ވިދާޅުވީމާ އެތަނަށް ދިޔައީ. ރައްޔިތުންގެ ހައްގުގައި ދިޔައީ. (އެކަމަކު ވަޒީރު) ފިއްލެވީ. އެއީ ފިލި ވަޒީރު މިހާރު. ފިލައިފި. ދޮޅު ގަނޑިއިރު ވަންދެން އެތާ ތިބެގެންވެސް ވަޒީރަކަށް ނާދެވުނު. ފިލައިފި.
ހިތަދޫ ދެކުނު ދާއިރާގެ މެންބަރު އިބްރާޙީމް ނާޒިލް
ނާޒިލް އިތުރަށް ވިދާޅުވީ، މިއަދުގެ ބިލަކީވެސް ރައްޔިތުންގެ ބާރުތައް ބީވެގެން ދާތަން ފެންނަ ދުވަހެއް ކަމަށޭވެ. އެގޮތުން އޭސީސީގެ ބާރުތައް ރައީސުލްޖުމްހޫރިއްޔާގެ އަތްމައްޗަށް ”ދަމައިގަަންނަ“ ކަމަށާ، މާދަމާ ކުރާނެ ކަމަކީ އިލެކްޝަން ކޮމިޝަނުގެ ބާރުތައް ”ދަމައިގަތުން“ ކަމަށް އޭނާ ވިދާޅުވިއެވެ.
އަދި ގާނޫނު ތަކަށް ގެންނަ ބަދަލު ތަކަކީ ރައްޔިތުންނަށްޓަކައި ގެންނަންޖެހޭ ބަދަލުތައް ކަމަށާ އެހެން ނަމަވެސް ފެންނަމުންދަނީ އެފަދައިން ކަން ކުރާތަން ނޫން ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
