އިޒްރޭލު ޕާސްޕޯޓް މަނާކުރުމުގެ މައްސަލައިގައި ބޭނުންވަނީ އެ ޕާސްޕޯޓުގައި އެތެރެވާ އެންމެންގެ ބަދަލުގައި އެ ގައުމުގެ ސަރުކާރުގެ އިސްވެރިން މަނާކުރަން ކަމަށް، ޓޫރިސްޓުން ގެންނަ ޓްރެވަލް އެޖެންޓުންގެ ޖަމިއްޔާ ކަމަށްވާ މަޓާޓޯ އިން މިއަދު ބުނެފި އެވެ.
އިޒްރޭލް މީހުން ރާއްޖެ އައުން މަނާ ކުރުމަށް އިދިކޮޅު އެމްޑީޕީން އިމިގްރޭޝަން ގާނޫނަށް ހުށަހާޅާފައިވާ އިސްލާހަށް ހިޔާލު ހޯދުމަށް މަޖިލީހުގައި ސަލާމަތީ ހިދުމަތްތަކާ ބެހޭ ކޮމިޓީ، 241 ކޮމިޓީއަށް މިއަދު މަޓާޓޯގެ އިސް ބޭފުޅުން ވަނީ ހާޒިރުކޮށްފައެވެ.
އެ ކޮމިޓީގައި ވާހަކަ ދައްކަވަމުން، މަޓާޓޯގެ ރައީސް އަބްދުالله ގިޔާސް ވިދާޅުވީ މިފަދަ މައްސަލަ ތަކުގައި، ގޮތް ނިންމުމުގެ ކުރިން އާއްމުކޮށް އެ ޖަމިއްޔާއިން ދިރާސާަތައްކުރާ ކަމަށެވެ. އެހެން ނަމަވެސް، ވަގުތު ނުލިބުމުގެ ސަބަބުން އެކަން ނުކުރެވޭ ކަމަށާ، ވުމާއެކު، މި މައްސަލައާއި ގުޅިގެން ގޮތެއް ކަނޑައަޅަން މަޓާޓޯގެ ބައިނަލްއަގުވާމީ ޕާޓްނަރުންނާއި މެންބަރުންނާއި މަޝްވަރާ ކުރި ކަމަށެވެ.
އެގޮތުން، ގެސްޓްހައުސް އެސޯސިއޭޝަނުންވެސް އެދޭ ގޮތަށް، އެންމެ ރަނގަޅު ގޮތެއް ކަމަށް ފެންނަނީ ”ޓާގެޓެޑް އެޕްރޯޗެއް“ ނުވަތަ ވަކި ބަޔަކު މަނާކުރުން ކަމަށް ގިޔާސް ވިދާޅުވިއެވެ.
އަދި އިސްރާއިލުންވެސް ދިވެހިރާއްޖެ ބޯއިކޮޓް ކުރުމަށް އަންގާފައިވާ ކަމަށާ، ރާއްޖެއިންވެސް އެމީހުން ބޮއިކޮޓްކުރުމަށް ގޮވާލަމުންދާއިރު، އެ ޕާސްޕޯޓް އޮންނަ މީހުން ރާއްޖެ އައުމާމެދު ކުރިއަށް އޮތް ދެއަހަރުވެސް ނުވިސްނާނެ ކަމަށް ބެލެވޭ ކަމަށް އޭނާ ވިދާޅުވުއެވެ. ހަމަ އެހެންމެ، އައި ނަމަވެސް އަންނަނީވެސް މަދު ބައެއްކަންވެސް ފާހަގަކުރެއްވިއެވެ.
"ވަރަށް ކުޑަ މާކެޓެއް އެއީ. މީގައި ޗެލެންޖުތަކަކީ، އަޅުގަނޑަށް ހީވަނީ ޑުއަލް ޕާސްޕޯޓް ގެންގުޅޭ މީހުންހެން. މީގައި ރަޝިއާ ސެންކްޝަންގައި ވެސް ވަރަށް ގިނަ ރަޝިއާ މީހުން ވެސް، އަޅުގަނޑުމެންނަށް އެނގިފައިވާ ގޮތުގައި އެބަގެންގުޅޭ އިޒްރޭލް ޕާސްޕޯޓް ޕްލަސް އިއްޔެ ގެސްޓްހައުސް ބޭފުޅުން ވެސް ވިދާޅުވި ފަލަސްތީނުގައި އުޅޭ ބޭފުޅުން ވެސް އެ މީހުންނަށް ފަލަސްތީނު ޕާސްޕޯޓުން ޔޫރަޕް ގައުމުތަކަށް ނުދެވެއޭ. އެހެންވީމަ ޑުއަލް ޕާސްޕޯޓް އެބަގެންގުޅޭ. މުސްލިމުން ވެސް އެބަ ގެންގުޅޭ. އެހެންވީމަ މިކަމުގައި ވަރަށް ގިނަ އެހެން ކަންތައްތަކަށް ވެސް އަޅުގަނޑުމެން ވިސްނަން ޖެހޭ އެބަ. މީގައި އަޅުގަނޑުމެންގެ ފައިނޭންސް މިނިސްޓްރީން ވެސް އެބައޮތް ވިދާޅުވެފައި ރާއްޖޭގެ ރޭޓިން ޑައުންގްރޭޑިންއަށް އެފެކްޓް ކުރިއޭ. އެހެންވީމަ ހީވަނީ މިއީ ވަރަށް ކޮމްޕްލިކޭޓެޑް ވާހަކަތަކަށް ވިސްނަން ޖެހޭހެން،"
އެމްއެމްޕީއާރުސީގެ ޗެއާމަން އަދި މަޓާޓޯގެ ރައީސް ގިިޔާސް
ގިޔާސް ވިދާޅުވީ އެފަދަ ފިޔަވަޅެއް އަޅާއިރު ވަރަށް ގިނަ ކަންތައްތަކަކަށް ބަލަން ޖެހޭ ކަމަށާއި، އެގޮތުން އިސްރާއީލްގެ ފަހަތުގައި އެމީހުންގެ އެހީތެރިންގެ ގޮތުގައި ތިބީ، އެމެރިކާ، ޖަރުމަނު އަދި އިންޑިޔާ ފަދަ ގައުމުތައް ކަން ފާހަގަކުރެއްވިއެވެ. އަދި އެފަދަ ފިޔަވަޅަކާއި ގުޅިގެން ރާއްޖެއަށް ޑޮލަރު ލިބުން ދަތިވެދާނެ ފަދަ ގޮތަކަށް އެމެރިކާއިންވެސް ފިޔަވަޅެއް އަޅާފާނެ ކަމަށް އޭނާ ވިދާޅުވުއެވެ.
"... އަޅުގަނޑުމެންނަށް ފެންނަނީ ޓާގެޓެޑްކޮށްނޭ ބޮޑަށް ގެންދަން. އެއީ އިޒްރޭލުގެ ސަރުކާރާއި އިޒްރޭލުގެ އިސްވެރިންނަށް ޓާގެޓް ކޮށްގެން ގެންދިޔައްޔާ އޭ އަޅުގަނޑުމެންނަށް ފެންނަނީ،" އޭނާ ވިދާޅުވި އެވެ.
މަޖިލީހުގެ 241 ކޮމެޓީގެ އިއްޔެގެ ބައްދަލުވުމަށް ގެސްޓުހައުސް އެސޯސިއޭޝަންގެ ވެރިން ހާޒިރު ކުރުމުން، އެ ޖަމިއްޔާ އިން ވެސް ބުނީ ތާއީދުކުރަނީ ހަމައެކަނި އިޒްރޭލުގެ ސިފައިންވެސް ނުހިމެނޭ ގޮތަށް ވެރިންގެ ޕާސްޕޯޓް މަނާކުރުމަށް ކަމަށެވެ.
Advertisement
This content is created and paid for by advertisers and does not involve Voice Journalists
