ރައްޔިތުންގެ މަޖިލިސް އިދާރާގެ އެންމެ އިސް ތިން މަގާމުކަމަށްވާ އަމީންއާއްމާއި، ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމުގައި މިހާރުވެސް ތިއްބެވި ބޭފުޅުން އިތުރު ދައުރަކަށް އަލުން އެ މަގާމުތަކަށް މިއަދު އައްޔަނުކުރައްވައިފިއެވެ.

އެގޮތުން އައްޔަނު ކުރެވުނީ، އަމީންއާއްމުގެ މަގާމަށް ފާތިމަތު ނިއުޝާ، ކައުންސެލް ޖެނެރަލްގެ މަގާމަށް ފާތިމަތު ފިލްޒާ އަދި ސާޖެންޓް އެޓް އާމްސްގެ މަގާމަށް މޭޖާ ޖެނެރަލް ރިޓަޔާޑް ތަލްހަތު ހަސަނެވެ.

އެ ތިން ބޭފުޅުންގެ މަގާމު ދަމަހައްޓައި އިތުރު ދައުރަކަށް އައްޔަނުކުރުމަށް މެންބަރުންގެ އިއްތިފާގުން ފާސްކޮށްފައިވަނީ، މިދިޔަ މަހުގެ 25 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާގައެވެ.

އެގޮތުން އެދުވަހު ނެގި ވޯޓުގައި، ނިއުޝާ، އަމީން އާއްމުގެ މަގާމުގައި ބަހައްޓަން ފެންނަ ކަމަށް ވޯޓުގައި ބައިވެރިވެވަޑައިގެންނެވި 79 މެމްބަރުން ވޯޓު ދެއްވިއެވެ. ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަައެވެ.

އަދި ފިލްޒާ، ކައުންސެލް ޖެނެރަލްގެ މަގާމުގައި ބަހައްޓަން ފެންނަ ކަމަށް ވޯޓުގައި ބައިވެރިވެވަޑައިގެންނެވި 80 މެމްބަރުން ވޯޓު ދެއްވި އިރު ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.

ހަމަ އެހެންމެ ތޮލްހަތުގެ މަގާމު ދަމަހައްޓަން ފެންނަ ކަމަށް ވޯޓުގައި ބައިވެރިވެވަޑައިގެންނެވި 80 މެމްބަރުން ވޯޓު ދެއްވިއެވެ. ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.