ވެރިކަމާ ހަވާލުވާއިރު ޣައްޒާގައި ހަމާސް ޖަމާއަތުން ހައްޔަރުކުރި މީހުން ދޫކޮށްނުލައިފިނަމަ ނުރައްކާތެރި ނަތީޖާތަކެއް ކުރިމަތިވާނެކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރޫތް ސޯޝަލް ގައި ކުރި ޕޯސްޓެއްގައި ޓްރަމްޕް ބުނީ، 2025 ވަނަ އަހަރުގެ ޖެނުއަރީ 20 ވަނަ ދުވަހު އޭނާ ރައީސްކަމާ ހަވާލުވާއިރު ރަހީނުން ދޫކޮށްފައި ނުވާނަމަ، މެދުއިރުމަތީގައި "ވަރަށް ނުރައްކާތެރި ހާލަތެއް" މެދުވެރިވާނެ ކަމަށެވެ.
އިންސާނިއްޔަތާ ދެކޮޅަށް މި އަނިޔާވެރި ޢަމަލުތައް ހިންގި ފަރާތްތަކަށް އަދަބު ދެވޭނެކަމަށާއި، މިކަމަށް ޒިންމާވާ ފަރާތްތަކަށް އެމެރިކާގެ ތާރީޚުގައި އެއްވެސް މީހަކަށް ދީފައިވާ އަދަބަށްވުރެ ބޮޑު އަދަބެއް ދެވޭނެ ކަމަށްވެސް އޭނާ ބުނެފައިވެއެވެ.
ޓްރަމްޕް މިފަދައިން ބުނެފައިވަނީ ޣައްޒާގައި ޔަހޫދީން ހިންގަމުންދާ ގަތުލުއާއްމު، ޓްރަމްޕް ގެ ދެވަނަ ދައުރު ފެށުމުގެ ކުރިން ހުއްޓުވުމަށް އެއްބަސްވުމުގެ މަސައްކަތްތައް ކުރާ ކަމަށް ރިޕޯޓްތައް ބުނަމުންދާ ދަނޑިވަޅެއްގައެވެ.
ނަމަވެސް، ޓްރަމްޕްގެ މި އިންޒާރު ތަންފީޒުކުރާނެ ގޮތުގެ ތަފްސީލެއް ނުވަތަ އެމެރިކާގެ ސިފައިން ބޭނުންކުރުމުގެ ވާހަކައެއް ދައްކާފައިނުވި ނަމަވެސް، ޓްރަމްޕްގެ މި ބަޔާނުގައި ހަމައެކަނި ހަމާސްއިން ހައްޔަރުކުރި މީހުންނަށް އިޝާރާތްކޮށްފައިވާއިރު، ޣައްޒާގައި އިސްރާއީލުން ހިންގަމުންދާ ލާއިންސާނީ އަމަލުތައް ތަހައްމަލުކުރަން ޖެހިފައިވާ ފަލަސްޠީނު އާންމު ރައްޔިތުންނާ ބެހޭގޮތުން އެއްވެސް ވާހަކައެއް ދައްކާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
