ސްރީލަންކާއަށް އަންނަ ބޭރުގެ ރިސަރޗް އުޅަނދުފަހަރަށް ހުއްދަ ދިނުމާއި އެއާއި ގުޅޭ ކަންކަން ބަލަހައްޓާނެ ޚާއްސަ ކޮމިޓީއެއް އެކުލަވާލައިފިއެވެ.
ލަންކާގެ ޚާރިޖީ ވަޒީރު ވިޖިތަ ހެރަތު ވިދާޅުވީ އަންނަ އަހަރުން ފެށިގެން އާ އެސް،އޯ،ޕީ އަށް އަމަލުކުރަން ފަށާނެކަމަށާއި، ރިސަރޗް އުޅަނދުފަހަރު ލަންކާއަށް އައުން މަނާކޮށްފައި އޮތް އޮތުން މިއަހަރު ނިމެންދެން އެގޮތުގައި އޮންނާނެ ކަމަށެވެ.
ޚާއްސަ ކޮމިޓީއެއް އެކުލަވާލައި، ރިސަރޗް އުޅަނދުފަހަރުގެ ކަންކަން ބެލެހެއްޓުމަށް ނިންމީ، ރިސަރޗްގެ ނަމުގައި ޗައިނާގެ ޖާސޫސީ ބޯޓުފަހަރު ލަންކާގެ ސަރަހައްދުގެ ތެރެއިން އިންޑިއާއަށް ނުރައްކާކުރާކަމަށް އިންޑިއާއިން ކަންބޮޑުވުން ފާޅުކުރަން ފެށުމާ ގުޅިގެންނެވެ. ލަންކާއަށް މިވަގުތު މިގޮތަށް ރިސަރޗް އުޅަނދު ވަނުން މަނާކޮށްފައިވަނީވެސް އިންޑިއާގެ ޕްރެޝަރާ ހެދިއެވެ.
ދިރާސާކުރުމުގެ ނަމުގައި ޗައިނާގެ އުޅަނދުތައް މިދިޔަ އަހަރު ގިނަ އަދަދަކަށް މި ސަރަހައްދަށް އައެވެ. އަދި އިންޑިއާގެ ޕްރެޝަރާއިހެދި ލަންކާއަށް ނުވެއްދި އުޅަނދުފަހަރު ރާއްޖޭގެ ސަރަހައްދުގައިވެސް ހަރަކާތްތެރިވެ، އެކަން ރާއްޖޭގެ ނޫސްތަކުގައި ރިޕޯޓުވެސް ކުރިއެވެ.
ލަންކާގެ ރައީސް އަނޫރަ ކުމާރަ ޑިސަނަޔަކަ ދާދިފަހުން އިންޑިއާއަށް ކުރެއްވި ދަތުރުފުޅުގައި، އިންޑިއާގެ ސަލާމަތަށް ނުރައްކާވެދާނެ ކަމެއް ލަންކާގެ ސަރަހައްދުގެ ތެރޭގައި އެއްވެސް ބަޔަކަށް ކުރަން ނުދޭނެކަމުގެ ޔަގީންކަން އިންޑިއާގެ ބޮޑުވަޒީރު ނަރެންދްރަ މޯދީއަށް އެރުވިއެވެ.
Advertisement
This content is created and paid for by advertisers and does not involve Voice Journalists
