ނިމިގެންދިޔަ އަހަރު ސްރީލަންކާއަށް 47,222 ދިވެހިން ޒިޔާރަތްކުރިކަމަށް، އެޤައުމުގެ ޓޫރިޒަމް ރިސާޗް އެންޑް ސްޓެޓިސްޓިކްސް ޑިޕާޓްމަންޓުން ހާމަކޮށްފިއެވެ.

ސްރީލަންކާގެ ތަފާސްހިސާބާ ބެހޭ އިދާރާއިން އާއްމުކުރި މައުލޫމާތުތަކަށް ބަލާއިރު، މިދިޔަ އަހަރު އެޤައުމަށް 2,053,465 ފަތުރުވެރިން ވަނީ ޒިޔާރަތްކޮށްފައެވެ. މީގެ ތެރެއިން އެޤައުމަށް ޒިޔާރަތްކުރި ދިވެހިންގެ އަދަދު 47,222 ހާހުގައި އުޅޭއިރު، ރާއްޖެ ހިމެނެނީ 10 ވަނައަށް އެންމެގިނައިން ފަތުރުވެރިން ޒިޔާރަތްކުރި މާކެޓްގެ ގޮތުގައެވެ. 

ނިމިގެންދިޔަ ޑިސެމްބަރުމަހު އެކަނިވެސް 6,903 ދިވެހިން ވަނީ ލަންކާއަށް ޒިޔާރަތްކޮށްފައެވެ. މިއީ މިދިޔަ އަހަރުގެ ޑިސެމްބަރުމަހާ އަޅާބަލާއިރު، 2.8 އިންސައްތަ އިތުރުވުމެކެވެ. މިދިޔަ އަހަރުގެ ޑިސެމްބަރުމަހު ލަންކާއަށް ޒިޔާރަތްކުރި ދިވެހިންގެ އަދަދަކީ 5,968 އެވެ.

Advertisement

ސްރީލަންކާއަކީ ދިވެހިން އެކި ބޭނުންތަކުގައި އެންމެ ގިނައިން ގޮސް އުޅޭ ޤައުމެވެ. އަދި ލަންކާއަކީ ރާއްޖެ ފިޔަވައި އެންމެގިނަ ދިވެހިން ދިރިއުޅެމުން އަންނަ ޤައުމެވެ. ސްރީލަންކާގެ ކަމާބެހޭ އިދާރާގެ ތަފާސްހިސާބަށް ބަލާއިރު، ގިނަ ދިވެހިން ލަންކާއަށް ދަތުރުކޮށްއުޅެނީ، ބޭސްފަރުވާގެ ހިދުމަތް ހޯދުމަށާއި، ޗުއްޓީ ހޭދަކޮށްލުމުގެ އިތުރުން ވިޔަފާރީގެ އެކި ބޭނުންތަކަށެވެ.

ނަމަވެސް 2019 ވަނަ އަހަރު އީސްޓާ ބޮމުގެ ހަމަލާ އާއި މި ފަހުން ލަންކާއަށް ކުރިމަތިވި މާލީ ދަތިތަކާހެދި އެކި ބޭނުންތަކުގައި އެޤައުމަށް ޒިޔުާރަތްކުރާ ދިވެހިންނާއި އަދި ދިރިއުޅެމުން އަންނަ ދިވެހިންގެ އަދަދު ވަނީ ވަރަށްބޮޑަށް ދަށަށް ގޮސްފައެވެ. ނަމަވެސް މިހާރު ލަންކާގެ އިގްތިސާދީ ހާލަތު ރަނގަޅުވަމުން އައުމާ ގުޅިގެން އެޤައުމަށް ޒިޔާރަތްކުރަމުން އަންނަ ދިވެހިންގެ އަދަދު ދަނީ އިތުރުވަމުންނެވެ.